សូមចូល Telegram ក្រមាប៉ុស្ដិ៍ ទទួលបានអត្ថបទ ព័ត៌មាន អប់រំ
ភ្នំពេញ៖ ក្នុងនាមជាភ្នាក់ងារអចលនទ្រព្យម្នាក់ ត្រូវដឹងថា ខ្លួនមានការងារធ្វើ គឺអាស្រ័យលើទំហំនៃការទំនាក់ទំនង ដែលយើងមាន អាចជាអតិថិជន (អ្នកទិញ)ចាស់ ឬក៏មាននណាម្នាក់ណែនាំគាត់មកឱ្យយើង ដែលនេះ គឺជាចំណុចនៃការកសាងទំនុកចិត្ត។
លោក ម៉ាន់ ច័ន្ទឌី អគ្គនាយកក្រុមហ៊ុន Premium Group បានឱ្យដឹងថា ភ្នាក់ងារអាចទទួលបានអតិថិជន (អ្នកទិញ) តាមរយៈការណែនាំបន្ត (Referral) ពីអ្នកទិញបច្ចុប្បន្ន ដែលត្រូវកសាងទំនុកចិត្តចំពោះអ្នកទិញបច្ចុប្បន្ន។
លោក ម៉ាន់ ច័ន្ទឌីថ្លែងថា «យើងត្រូវដឹងថា អ្នកទិញអចលនទ្រព្យរបស់យើងបច្ចុប្បន្ន គឺជាប្រភពដ៏សំខាន់ក្នុងការណែនាំអ្នកទិញអចលនទ្រព្យថ្មីផ្សេងៗទៀត មកឱ្យយើង ពីព្រោះ ពួកគាត់បានចំណាយពេលច្រើនធ្វើការជាមួយនឹងយើង»។
លោក ម៉ាន់ ច័ន្ទឌី បញ្ជាក់ទៀតថា ដូច្នេះ ក្នុងនាមជាភ្នាក់ងារ អាចបង្កើនទំនុកចិត្តបន្ថែមទៀតជាមួយអតិថិជន តាមរយៈការបង្ហាញអំពីចំណុចវិជ្ជមាននៃអចលនទ្រព្យ ដោយសួរសំនួរពាក់ព័ន្ធចំណង់ចំណូលចិត្តមួយចំនួន ឬ ផ្តល់យោបល់ខ្លះៗ ដល់អតិថិជន និងបង្ហាញពីប្រវត្តិការងារក្នុងសង្គមរបស់យើងឱ្យគាត់បានដឹង និងស្គាល់។
លោក ម៉ាន់ ច័ន្ទឌី បន្ថែមថា នៅពេលដែលភ្នាក់ងារចាប់ផ្តើមធ្វើការជាមួយអ្នកទិញអចលនទ្រព្យ និងកំពុងប្រឡូកក្នុងវិស័យអលនទ្រព្យស្រាប់ ភ្នាក់ងារត្រូវតែធ្វើយ៉ាងណា ផ្តល់សេវាឱ្យបានល្អបំផុតដល់អតិថិជនច្រើនជាងដៃគូប្រកួតប្រជែង។ ជាពិសេសគឺមិនត្រូវធ្វើអ្វីទៅតាមតែទម្លាប់ដែលធ្លាប់បានរៀន ឬអនុវត្ត កន្លងមកនោះដែរ ព្រោះពេលខ្លះ ធ្វើឱ្យអ្នកទិញ មានភាពមិនស្រណុកក្នុងចិត្ត ដែលអាចធ្វើឱ្យពួកគាត់គិថា ភ្នាក់ងារយើងចង់អោយពួកគាត់ទិញ ដើម្បីបានកម្រៃជើសារ។
លោក ម៉ាន់ ច័ន្ទឌី ដែលមានបទពិសោធន៍លើវិស័យអចលនទ្រព្យជាច្រើនឆ្នាំ បានលើកឡើងនូវគន្លឹះមួយចំនួន អាចជួយបង្កើតទំនុកចិត្ត របស់អ្នកទិញអលនទ្រព្យបច្ចុប្បន្ន អោយជួយណែនាំអតិថិជនថ្មីៗ ល្អៗ ឱ្យដល់យើងមានដូចខាងក្រោយនេះ៖
១)យើងត្រូវបង្ហាញអតិថិជនដែលចង់ទិញអលចនទ្រព្យ នូវព័ត៌មានអចលនទ្រព្យដែលមាន។ ២) ត្រូវក្លាហានបង្ហាញចំណុចមិនល្អរបស់អលចនទ្រព្យ ឬការបញ្ចុះតម្លៃ ជូនដល់អតិថិជន។ និង ៣) ត្រូវផ្តល់ព័ត៌មានដែលទាក់ទងនឹងទីតាំងអចលនទ្រព្យនៅជុំវិញដល់អតិថិជន ដើម្បីឱ្យគាត់បានដឹង មុននឹងសម្រេចចិត្តក្នុងការទិញ៕
