សុចរិតភាព ជារឿងសំខាន់ខ្លាំងណាស់សម្រាប់មនុស្សម្នាក់ៗ ព្រោះប្រសិនបើគ្មានសុចរិតភាព មនុស្សនឹងបាត់បង់តម្លៃនិងការទុកចិត្តពីគ្រប់ផ្នែកទាំងអស់នៃជីវិត។
ពាក់ព័ន្ធនឹងបញ្ហានេះ លោក ព្រើន សុវង្ស ព្រឹទ្ធបុរសរងពុទ្ធិកមហាវិទ្យាល័យវិទ្យាសាស្ត្រអប់រំ និងព័ត៌មានវិទ្យាទទួលបន្ទុកដេប៉ាតឺម៉ត់ ថ្នាក់ឆ្នាំសិក្សាមូលដ្ឋាននៃពុទ្ធិកសាកលវិទ្យាល័យព្រះសីហនុរាជ បានលើកឡើងថា សុចរិតភាពជាផ្នែកសំខាន់បំផុតដែលស្ថាប័នទាំងអស់ចង់បានពីបុគ្គលិក ព្រោះគ្មានក្រុមហ៊ុនសហគ្រាសណាចង់បានមនុស្សកឹបកេង ឬកេងប្រវ័ញ្ចនោះទេ។
ក្រុមហ៊ុននានា សុខចិត្តជ្រើសរើសមនុស្សដែលមិនសូវមានជំនាញខ្លាំង ដើម្បីយកមកបណ្តុះបណ្តាលឱ្យខ្លាំងប្រសើរជាងយកមនុស្សខ្លាំងស្រាប់តែមិនមានសុចរិតភាព ព្រោះបើគ្មានសុចរិតភាពចំណេះដឹងកាន់តែខ្លាំង ការគំរាមកំហែងក៏កាន់តែធំផងដែរសម្រាប់ស្ថាប័ន។
លោក ព្រើន សុវង្ស បាននិយាយថា៖ «ស្ថាប័នដែលត្រូវការអ្នកដែលមានសុចរិតភាពខ្លាំងជាងគេ គឺស្ថាប័នហិរញ្ញវត្ថុឬធនាគារជាដើម។ ហេតុនេះហើយទើបកន្លងមក គេបង្កើតជាប្រព័ន្ធនៃការគ្រប់គ្រងយ៉ាងល្អិតល្អន់ដើម្បីជ្រើសរើសមនុស្សល្អៗឱ្យបម្រើការងារប្រកបដោយភាពច្បាស់លាស់និងសុចរិតភាព»។
លោកសាស្រ្តាចារ្យ បានបន្ថែមទៀតថាជាមតិមកពីម្ចាស់សហគ្រាសភាគច្រើន គាត់បានបញ្ជាក់ថា អ្នកដែលប្រតិបត្តិឬទទួលការអប់រំតាមបែបព្រះពុទ្ធសាសនាច្រើន ជាអ្នកដែលងាយស្រួលធ្វើការងារជាមួយគ្នានិងជាមនុស្សដែលទុកចិត្តបាន។ ហេតុនេះហើយ ទើបនិស្សិតដែលចេញពីពុទ្ធិកសាកលវិទ្យាល័យឬអ្នកធ្លាប់បួសរៀនភាគច្រើនត្រូវបានគេទុកចិត្តឱ្យបម្រើការងារនៅក្នុងវិស័យហិរញ្ញវត្ថុ ព្រោះពួកគាត់ផ្តោតតម្លៃសំខាន់លើអំពើល្អ សន្តិភាព និងសុចរិតភាព។តែទោះជាយ៉ាងនេះក្តី លោកក៏បានបញ្ជាក់ផងដែរថា គ្រប់មនុស្សទាំងអស់ដែលទទួលបានការអប់រំពីស្ថាប័នតែមួយមិនមែនសុទ្ធតែល្អទាំងអស់នោះទេតែពួកគេក៏ត្រូវការធ្វើការក្នុងស្ថាប័នដែលមានប្រព័ន្ធគ្រប់គ្រងច្បាស់លាស់ផងដែរដើម្បីធានាពីសុចរិតភាព៕
