អត្ថបទផ្សាយឡើងវិញ
ក្រៅពីផ្តល់ជាព័ត៌មានអ្នកបង្កើតប្លុកខ្លះ ក៏បានប្រើប្រាស់វា ធ្វើជាមធ្យោបាយក្នុងការរកប្រាក់ចំណូលផងដែរ។
កញ្ញា កែវ គូនីឡា គឺជាអ្នកសរសេរប្លុក ដ៏មានប្រជាប្រិយម្នាក់អាចរកប្រាក់ចំណូលបន្ថែម ពីការបង្កើតប្លុកនេះប៉ុន្តែមិនទទួលបានច្រើនណាស់ណានោះទេ។ បច្ចុប្បន្ន គូនីឡា គឺជាម្ចាស់ប្លុកមួយ ឈ្មោះថាBlueladayblog.com ដែលបានបង្កើតឡើង អស់រយៈពេល ៨ឆ្នាំមកហើយ។
ដោយមិនបង្ហាញពី ចំនួនប្រាក់ចំណូលដែលរកបានតាមប្លុក ម្ចាស់ប្លុក ដែលមានវ័យ២៧ឆ្នាំរូបនេះបាននិយាយថា៖ “បើទោះជាខ្ញុំ មិនសូវបានទទួល ប្រាក់ចំណូលពីវា តែដោយសារប្លុកនេះហើយ ដែលផ្តល់ការងារខាងក្រៅ ជាច្រើនដល់នាងខ្ញុំ។ ខ្ញុំត្រូវបានគេអញ្ជើញ ឲ្យធ្វើដំណើរទស្សនកិច្ច ស្ទើរជុំវិញពិភពលោកដោយសារតែខ្ញុំបានសរសេរអត្ថបទ ដ៏គួរអោយចាប់អារម្មណ៍ជាច្រើន“។
មកដល់ពេលនេះ ប្លុករបស់គូនីឡា បានចុះផ្សាយអត្ថបទ ប្រមាណជាង១០០អត្ថបទហើយអត្ថបទដែលទទួលបានការគាំទ្រ និងចូលចិត្តបំផុតនោះគឺការពិភាក្សាអំពី មនុស្សស្រលាញ់ភេទដូចគ្នា។
ផ្ទុយពីកញ្ញាកែវ គូនីឡា សម្រាប់លោក យ៉ន សេរីបុត្រ ដែលជាម្ចាស់ប្លុក ឈ្មោះថា ysereyboth.blogspot.com បានបង្ហើបថាលោកទទួលបានចំណូលច្រើគួរសម ពីការបង្កើតប្លុកនេះ។ អ្នកសរសេរប្លុក ដែលមានវ័យ២៣ឆ្នាំរូបនេះ បានបង្ហាញគន្លឹះ ពីការរកស៊ីតាមរយៈប្លុកថា គឺទីមួយ គេត្រូវដាក់គោលដៅ ថាតើចង់សរសេរពីអ្វី ? ហើយក្នុងករណី ដែលអ្នកសរសេរ មិនមានជំនាញឬចំណេះដឹង លើប្រធានបទមួយចំនួននោះ គឺគេអាចជួលអ្នកដ៏ទៃ ដែលមានសមត្ថភាព ឲ្យសរសេរនូវប្រធានបទទាំងនោះបាន។
លោកសេរីបុត្រ បន្ថែមថា “ ក្នុងនាមយើងជាBlogger យើងត្រូវដឹងថា អ្នកអាន ចូលចិត្តអត្ថបទបែបណា ថាតើប្រភេទអត្ថបទបែបណា ដែលអាចឲ្យអ្នកអាន មើលហើយចង់ធ្វើការចែករំលែកជាបន្ត។ ហើយចុងក្រោយ អត្ថបទអាចរកប្រាក់ចំណូល បានតាមរយៈការផ្សព្វផ្សាយ ពាណិជ្ជកម្ម ពីសេវាកម្មមួយរបស់ក្រុមហ៊ុនGoogle ពោលគឺ Google AdSense ដែលទាមទារឲ្យមានការសុំចុះឈ្មោះជាមុនសិន មុននឹងទទួលបានការផ្សព្វផ្សាយនានា»។
ការរកចំណូលបន្ថែម តាមរយៈប្លុក វាគឺជារឿងដ៏ពេញនិយមសម្រាប់យុវវ័យខ្លះ នៅក្នុងសម័យអ៊ីនធើណេតនេះ។ ក៏ប៉ុន្តែ ក្រៅពីអត្ថប្រយោជន៍ជាទឹកប្រាក់នេះ អ្នកសរសេរប្លុកសុទ្ធតែគូសបញ្ជាក់ដូចគ្នាថា ការសរសេរប្លុក គឺវាបានផ្តល់អត្ថប្រយោជន៍ជាច្រើនផ្សេងទៀតដែរដូចជា ពង្រឹងជំនាញសរសេរ និង ការគិតឲ្យបានកាន់តែស៊ីជម្រៅ។
កញ្ញា Catherine V Harry អ្នកសរសេរប្លុកដ៏ល្បីល្បាញមួយរូបទៀត បានលើកឡើងថា Blog បានផ្តល់អារម្មណ៍ ដ៏រីករាយដល់នាងនៅពេលដែលអ្នកអាន អាចរៀន និង ពេញចិត្តចំពោះ ចំណេះដឹងថ្មីៗដែលពួកគេទទួលបានតាមរយៈការអាន អត្ថបទរបស់នាង។ កញ្ញា Catherine V Harry គឺជាម្ចាស់ប្លុកA Dose of Cath ហើយនាងបានសរសេរ អត្ថបទប្រមាណជា៤០រួចមកហើយ នៅក្នុងប្លុកនេះ ដែលភាគច្រើនទាក់ទងទៅនឹង បញ្ហាសុខភាពបន្តពូជ និងសិទ្ធិស្មើគ្នាចំពោះផ្លូវភេទ ។
ម្ចាស់គេហទំព័រ ADose of Cath ដែលមានរាងតូចស្តើង បាននិយាយ ទាំងទឹកមុខញញឹមតិចៗថា ប្លុកបានផ្តល់កំរៃដល់នាងពីព្រោះក្នុងប្លុក មានពាណិជ្ជកម្មជាច្រើនត្រូវបានចុះផ្សាយចាប់តាំងពីបាន ចុះឈ្មោះក្នុងសេវាមួយ របស់ក្រុមហ៊ុន Google ។ បើមានអ្នកចុចទស្សនា ប្លុកកាន់តែច្រើននោះ មានន័យថា នាងអាចទទួលបាននូវប្រាក់ចំណូលកាន់តែច្រើនផងដែរ។
កញ្ញា Catherine V Harry បញ្ជាក់ថា«អ្នកណាក៏អាចបង្កើត blogបានដែរហើយគ្រប់គ្នាគួរតែមានវា វាជាវេទិកាផ្តល់ឱកាស ដល់យើងជាយុវជនបញ្ចេញមតិនិង អ្វីដែលយើងជឿជាក់ថា ត្រឹមត្រូវដើម្បីចែករំលែកដល់យុវជនផ្សេងទៀត»។
ទោះបីប្លុក ផ្តល់អត្ថប្រយោជន៍យ៉ាងច្រើន បែបនេះក៏ដោយ ប៉ុន្តែយុវវ័យខ្មែរខ្លះហាក់មិនទាន់បានយល់ពី គុណសម្បត្តិរបស់វានៅឡើយនោះទេ ខណៈដែលយុវវ័យមួយចំនួនក៏បានចាប់ផ្តើមបង្កើតប្លុកនេះ។
យុវជន ផេង ដាវីដ គឺយុវជនម្នាក់ដែលបានបង្កើតប្លុកមួយ ឈ្មោះថាsparkthefireandash.blogspot.com ។ប្លុកនេះ ទើបបានបង្កើតឡើងតែជិត ២សប្តាហ៍ប៉ុណ្ណោះ តែមានអត្ថបទ ប្រមាណជា៩អត្ថបទ ត្រូវបានបង្ហោះរួមមកហើយ ដែលភាគច្រើន ពាក់ព័ន្ធនឹងជីវិតប្រចំាថ្ងៃបរិស្ថាន និងអត្ថបទលើកទឹកចិត្តមួយ
ចំនួនទៀត។ លោកផេង ដាវីដ ដែលទើបតែបញ្ចប់ ការសិក្សានៅវិទ្យាស្ថានភាសាបរទេស ជឿជាក់ថា “ប្លុកជាកន្លែងដែលអាចចែករំលែក នូវអ្វីដែលយើងចូលចិត្ត ចែករំលែកគំនិត និង ភាពច្នៃប្រឌិតរបស់យើងទៅកាន់ពិភពលោក»។
ជាសារចុងក្រោយ កញ្ញា គូនីឡា បានបង្ហើប ពីគន្លឹះធ្វើយ៉ាងណា ដើម្បីសរសេរប្លុក(Blog)អោយទទួលបានប្រជាប្រិយភាពច្រើននោះ គឺយុវជន គួរសរសេរនូវអ្វី ដែលខ្លួនឯងស្រលាញ់ចូលចិត្ត ជាមុនសិន ពីព្រោះប្លុក គឺជាកម្មសិទ្ធរបស់យើង។ ផ្ទុយមកវិញ បើអ្នកគិតថា ការសរសេរប្លុកគឺជាការងាររកប្រាក់ចំណេញនោះ អ្នកត្រូវធ្វើការស្រាវជ្រាវផ្នែកទីផ្សារ ឲ្យបានល្អិតល្អន់ជាមុនសិនថាតើអត្ថបទអ្វីដែលអ្នកអានចូលចិត្ត និងកុំភ្លេចដាក់ការស្រលាញ់ ទៅលើអ្វីដែលអ្នកកំពុងធ្វើផងដែរ៕
