ខេត្តឧត្តរមានជ័យ៖ រោងចក្រនេះ ផលិតអគ្គិសនីពីធ្យូងថ្មកម្លាំង ២៦៥ មេហ្គាវ៉ាត់ នឹងចាប់ផ្តើមដំណើរការនៅចុងឆ្នាំ ២០២១ ឬដើមឆ្នាំ ២០២២ ដោយប្រើរ៉ែធ្យូងថ្ម ដែលមាននៅក្នុងស្រុកត្រពាំងប្រាសាទ ខេត្តឧត្តរមានជ័យ។
រាជរដ្ឋាភិបាលកម្ពុជាកាលពីខែកុម្ភៈ ឆ្នាំ ២០២០ បានអនុម័តឱ្យក្រុមហ៊ុន Han Seng Coal Mine Co Ltd (HSCMC) វិនិយោគលើរោងចក្រផលិតអគ្គិសនីពីធ្យូងថ្មកម្លាំង ២៦៥ មេហ្គាវ៉ាត់ នៅក្នុងស្រុកត្រពាំងប្រាសាទ ខេត្តឧត្តរមានជ័យ ក្នុងតម្លៃ ២៩៤,៣ លានដុល្លារ។
អភិបាលរងខេត្តឧត្តរមានជ័យ លោក ឌី រ៉ាដូ បានប្រាប់សារព័ត៌មានថា ការសាងសង់រោងចក្រផលិតអគ្គិសនីពីធ្យូងថ្មកម្លាំង ២៦៥ មេហ្គាវ៉ាត់ ក្នុងខេត្តឧត្តរមានជ័យកំពុងមានដំណើរការទៅមុខជាប្រចាំ ដោយការសាងសង់ហេដ្ឋារចនាសម្ព័ន្ធជិតបញ្ចប់អស់ហើយ ដោយនៅរង់ចាំតែការយកម៉ាស៊ីនមកដំឡើងប៉ុណ្ណោះ។
លោកបន្តថា បើតាមទិដ្ឋភាពការងារ គឺរោងចក្រនេះនឹងអាចចាប់ដំណើរការតាមការកំណត់របស់រដ្ឋាភិបាល ដោយនៅចុងឆ្នាំនេះ ក្រុមហ៊ុននឹងធ្វើតេស្តសាកល្បងម៉ាស៊ីន និងនៅដើមឆ្នាំ ២០២២ ចាប់ផ្តើមដំណើរការជាផ្លូវការ។
បច្ចុប្បន្នប្រទេសកម្ពុជា អាចផលិតថាមពលអគ្គិសនីបានពី ៧០ ទៅ ៨០ ភាគរយនៃតម្រូវការប្រើប្រាស់ក្នុងស្រុកសរុប ខណៈសល់ពីនោះបានមកពីការនាំចូលពីប្រទេសជិតខាង៕ និងបើយោងតាមរបាយការណ៍របស់អាជ្ញាធរអគ្គិសនីកម្ពុជា បង្ហាញថា គិតត្រឹមឆ្នាំ ២០២០ ថាមពលអគ្គិសនីដែលផលិតក្នុងស្រុកបានពីរោងចក្រដុតធ្យូងថ្ម មានចំនួន ២៣,១៥ ភាគរយ រោងចក្រប្រេងខ្មៅ ២២,០៨ ភាគរយ ប្រភពវារីអគ្គិសនី ៤៥,៦០ ភាគរយ ថាមពលពីពន្លឺព្រះអាទិត្យ ៨,១២ ភាគរយ និងពីជីវម៉ាស់ មានចំនួន ១,០៥ ភាគរយ៕
