ខេត្តព្រៃវែង៖ សម្តេចតេជោ ហ៊ុន សែន នាយករដ្ឋមន្រ្តីកម្ពុជា បានប្រកាសពីការមិនគាំទ្រឲ្យក្រុមហ៊ុន នាំចូលជ្រូកពីថៃព្រោះជាការសម្លាប់អ្នកចិញ្ចឹមជ្រូកនៅកម្ពុជា។ ការមានប្រសាសន៍បែបនេះ ក្នុងឱកាសដែលសម្ដេចតេជោ អញ្ជើញចុះទៅពិនិត្យមើលមជ្ឈមណ្ឌលស្រាវជ្រាវ និងអភិវឌ្ឍន៍ពូជត្រី នៅស្រុកពាមរក៍ ខេត្តព្រៃវែង នាព្រឹក ទី១៤ ខែកក្កដានេះ។
សម្តេចតេជោ ហ៊ុន សែន បានមានប្រសាសន៍ថា៖ «មានក្រុមហ៊ុនមួយ តាមរយៈក្រសួងកសិកម្ម រុក្ខាប្រមាញ់និងនេសាទបានស្នើសុំនាំជ្រូក ១លានក្បាលពីថៃ។ តែខ្ញុំបានចារថាឲ្យសិក្សាសិន»។
សម្តេចតេជោ ហ៊ុន សែន បញ្ជាក់ថា បើសិនជាយល់ព្រមឲ្យនាំជ្រូកចូលពីថៃ នោះជាការសម្លាប់អ្នកចិញ្ចឹមជ្រូកក្នុងស្រុក។ តែបើមានការនាំចូលជ្រូកពីក្រៅ គឺត្រឹមតែបំពេញតម្រូវការក្នុងស្រុកដែលយើងខ្វះខាតជាង ១០% បានហើយ៕
