អាហារដែលមានតម្លៃសមរម្យនិងសំបូរជីវជាតិល្អជួយដល់សុខភាពគ្រប់គ្នាប្រាកដជាចង់បាន។ ជាមួយគ្នានេះការចូលរួមចំណែកពីយើងទាំងអស់គ្នា ដើម្បីទទួលបានគោលដៅនេះ គឺអាចធ្វើបានតាមរយៈសកម្មភាពប្រចាំថ្ងៃមួយចំនួន។ តាមរយៈ អង្គការស្បៀងអាហារពិភពលោក Food and Agriculture Organization of the United Nations (FAO) បានបង្ហាញនូវសកម្មភាពមួយចំនួនដែលយើងគ្រប់គ្នាអាចជួយដល់រឿងទាំងនេះដូចជា៖
១.ទិញអាហារដាំដុះផ្ទាល់ក្នុងតំបន់មូលដ្ឋាន
យើងអាចគាំទ្រកសិករដោយទិញផលិតផលអាហារដែលបានដាំដុះដោយផ្ទាល់នៅតាមមូលដ្ឋាន ក្នុងតំបន់ក៏ដូចជាទីផ្សារកសិផលក្នុងសហគមន៍ជាដើម។ ការធ្វើបែបនេះអ្នកបានជួយជម្រុញសេដ្ឋកិច្ចកសិករ ដែលបានដាំដុះក្នុងតំបន់និងជម្រុញឱ្យមានការដាំដុះដំណាំម្ហូបអាហារប្រកបដោយចីរភាព។
២.ជ្រើសទិញបន្លែ ផ្លែឈើ ម្ហូបអាហារតាមរដូវកាល
តើអ្នកដឹងទេ? អ្នកនឹងរួមចំណែកកាត់បន្ថយការបញ្ចេញផ្សែងកាបូននៅពេលអ្នកទិញផលិតផលតាមរដូវកាល។ នេះមានន័យថានៅពេលតម្រូវការម្ហូបអាហារមិនចំរដូវកាលច្រើន នឹងនាំឱ្យមានការនាំចូលអាហារពីប្រទេសក្រៅដែលតម្រូវឱ្យមានការដឹកជញ្ជូនដើម្បីបំពេញតម្រូវការក្នុងទីផ្សារ។ ម្យ៉ាងទៀត ការញ៉ាំបន្លែផ្លែឈើតាមរដូវកាលធម្មជាតិរបស់វាគឺមានរសជាតិឆ្ងាញ់និងជីវជាតិល្អជាងបន្លែ ឬផ្លែឈើមិនតាមរដូវកាល។
៣.ការដាំបន្លែនៅផ្ទះ
មានទីកន្លែងខ្លះនៅផ្ទះដូចជាយ៉រ ឬឡៅតឿអ្នកអាចច្នៃជាសួនឬកន្លែងសម្រាប់ដាំបន្លែបង្ការផ្សេងៗបានហើយអ្នកនឹងបានរៀនដោយខ្លួនឯងពីការដាំដុះបន្លែព្រមទាំងរីករាយនឹងផលដែលអ្នកដាំបានដោយខ្លួនឯងផងដែរ។
៤.ជ្រើសប្រភេទអាហារសុខភាពនិងផ្សេងៗគ្នា
អាហារដែលល្អសម្រាប់សុខភាពមានបន្លែ-ផ្លែឈើនឹងរួមចំណែកជាវិជ្ជមានទៅដល់សុខភាពរបស់យើង។ ម្យ៉ាងទៀតការជ្រើសរើសប្រភពអាហារសុខភាពផ្សេងៗគ្នាចម្រុះច្រើនមុខ នឹងជួយទៅដល់ផលិតកម្មអាហារសុខភាពគ្រប់ប្រភេទឱ្យកើតឡើងច្រើន។ ហើយនេះបានជួយទាំងសុខភាពយើង ព្រមទាំងសុខភាពដីនិងបរិស្ថានដាំដុះផងដែរនៅពេលដំណាំលើដីត្រូវបានដាំឆ្លាស់គ្នា។
៥.ឥទ្ធិពលទម្លាប់ទិញអាហារល្អៗ
នៅពេលអ្នកទិញអាហារបន្លែធម្មជាតិដែលល្អសម្រាប់សុខភាពនោះ នឹងក្លាយជាគំរូល្អទៅដល់អ្នករស់នៅជុំវិញខ្លួនអ្នកផងដែរដោយទម្លាប់ល្អក្នុងការទិញចំណីអាហារល្អ នឹងបង្កើនសកម្មភាពល្អជាប្រយោជន៍ទៅដល់សុខភាព។
គួររំលឹកផងដែរថាសកម្មភាពមួយចំនួនខាងលើនេះត្រូវបានលើកឡើងដោយអង្គការស្បៀងអាហារពិភពលោក។ ការលើកឡើងនេះ គឺដើម្បីការចូលរួមចំណែកទាំងអស់គ្នាសម្រាប់ជួយដល់ប្រព័ន្ធស្បៀងអាហារ ដែលរងបញ្ហាប្រឈមនានារាប់ទាំងការផ្លាស់ប្តូរអាកាសធាតុ វិបត្តិកូវីដ-19 និងបញ្ហាសេដ្ឋកិច្ចនានា ដែលបានរងផលប៉ះពាល់ពីបញ្ហាប្រឈមផ្សេងៗទៀតជាដើម៕
