នាថ្ងៃអបអរទិវានារីអន្តរជាតិ៨មីនា ឆ្នាំ២០២១ អត្ថបទក្រមាប៉ុស្តិ៍មួយនេះ ក៏សូមលើកឡើងពីនារី៣រូបដែលបានរួមចំណែកក្នុងសង្គមតាមរយៈការច្នៃស្នាដៃសិល្បៈរបស់ខ្លួនទៅជាប្រយោជន៍ក្នុងសង្គម ដើម្បីចូលរួមទប់ស្កាត់នូវការរាលដាលនៃជំងឺផ្លូវដង្ហើមកូវីដ-១៩។ តោះ!ទៅដឹងថាតើពួកគេបានធ្វើអ្វីខ្លះ?
១.កញ្ញា Avesta Rastan មកពីសហរដ្ឋអាមេរិក
មានវ័យ២៥ឆ្នាំហើយមានតួនាទីជាអ្នកសម្របសម្រួលរូបក្រាហ្វិកវិទ្យាសាស្រ្តនៅរដ្ឋកាលីហ្វ័រញ៉ា។ នៅពេលផ្ទុះការរាលដាលនៃជំងឺនេះ ដោយនាងសម្គាល់ឃើញថាពុំមានរូបបែបព័ត៌មានច្រើនទេដែលបង្ហាញពីរបៀបដែលមេរោគកូវីដ-១៩ចម្លងទៅមនុស្ស។ ដូចនេះកញ្ញាដែលមានដើមកំណើតអ៊ីរ៉ង់កាត់កាណាដារូបនេះបានច្នៃជំនាញរបស់ខ្លួនគូរចេញនូវរូបផ្ទាំងព័ត៌មានក្នុងកម្រិតបច្ចេកទេសវេជ្ជសាស្រ្តជួយដល់សាធារណជនអាចស្វែងយល់និងដឹងពីផលប៉ះពាល់នៃកូវីដក៏ដូចជារបៀបការពារខ្លួន។
ស្នាដៃរបស់កញ្ញាសញ្ជាតិអាមេរិករូបនេះបានទទួលការអារម្មណ៍និងគាំទ្រច្រើនពីសាធារណជនរហូតដល់វេទិការសេដ្ឋកិច្ចពិភពលោក (World Economic Forum) ចែករំលែកស្នាដៃរបស់នាងហើយរហូតដល់មានគម្រោងស្នើសូមឱ្យបកប្រែស្នាដៃនាងជាភាសាផ្សេងៗ ដើម្បីជាប្រយោជន៍ផ្សព្វផ្សាយទៅសង្គមឱ្យយល់ដឹង និងទប់ស្កាត់នូវវីរុសផ្លូវដង្ហើមដែលកំពុងយាយីពិភពលោកនេះ។
“អ្នកអាចចូលរួមជួយបាននូវគ្រប់អ្វីដែលអ្នកអាចធ្វើបាន" នេះជាសម្តីរបស់កញ្ញាAvesta Rastanបានលើកឡើង។
២.លោកស្រីវេជ្ជបណ្ឌិត Radhika Patnala មកពីប្រទេសអាល្លឺម៉ង់
លោកស្រីវេជ្ជបណ្ឌិតគឺជាអ្នកវិទ្យាសាស្រ្តផ្នែកសិក្សាប្រព័ន្ធសរសៃប្រសាទ ហើយក៏ជាស្ថាបនិកនៃក្រុមហ៊ុនSci-Illustrate។
មានកំណើតនៅប្រទេសឥណ្ឌា ហើយបានសិក្សារៀនសូត្រនៅប្រទេសសឹង្ហបុរី និងអូស្រ្តាលី មុននឹងមករស់នៅនិងបម្រើការងារនៅអាល្លឺម៉ង់ លោកស្រីនិយាយថាផ្នែកមួយដ៏មានន័យលើអាជីពវិទ្យាសាស្រ្តរបស់លោកស្រីនោះគឺការងារដែលពាក់ព័ន្ធក៏ដូចជាបន្ថែមពីលើកិច្ចការវិទ្យាសាស្រ្តនោះ។ ជាក់ស្តែង ក្រុមហ៊ុនរបស់លោកស្រីគឺបានផលិតនូវរូបភាពរចនាឡើងទៅតាមតម្រូវការអតិថិជនក្នុងផ្នែកវេជ្ជសាស្រ្ត តែបន្ថែមពីលើនោះលោកស្រីបានបង្កើតចេញជារូបភាពបង្ហាញជាទម្រង់លម្អិតអំពីរបៀបដែលមេរោគកូវីដចូលទៅនឹងប្រតិកម្មនៅក្នុងរាងកាយមនុស្សយើង។
ដោយសារលោកស្រីធ្វើការក្នុងវិស័យពិសោធនៅឡាបូដូច្នេះរូបភាពរចនាឡើងរបស់លោកស្រីមានភាពលម្អិតនិងស៊ីជម្រៅជារូបព័ត៌មានមានប្រយោជន៍ ហើយត្រូវបានគម្រោងផ្សេងៗទាក់ទងដើម្បីផលិតជារូបភាពជាដំណាក់កាលៗបន្ថែម។លោកស្រីផ្ទាល់ក៏បានបង្ហាញភាពរីករាយក៏ព្រោះស្នាដៃដែលបង្ហាញពីទិដ្ឋភាពការងារក្នុងឡាបូពិសោធវិទ្យាសាស្រ្តត្រូវបានផ្សព្វផ្សាយឱ្យប្រជាពលរដ្ឋបានយល់ដឹងពីតម្លៃកិច្ចការទាំងនោះ។
“ជំងឺរាតត្បាតនេះធ្វើឱ្យមនុស្សជាច្រើនភ្ញាក់រលឹក"។នេះបើតាមលោកស្រីវេជ្ជបណ្ឌិតបានលើកឡើង។
៣.កញ្ញា Nujuum Hashi មកពីប្រទេសសូម៉ាលី
មានអាយុ២៦ឆ្នាំកញ្ញា Nujuum Hashi ធ្លាប់បានកើតកូវីដ-១៩កាលពីដើមឆ្នាំ២០២០កន្លងទៅ។ទោះបីកូវីដ-១៩ចូលរាងកាយនាងមែនប៉ុន្តែវាមិនអាចបំផ្លាញគោលដៅកិច្ចការជាប្រយោជន៍របស់ Hashi នោះទេ។
មុនឆ្លងកូវីដ-១៩ កញ្ញា Nujuum Hashi គឺជាបុគ្គលិកពេទ្យដែលត្រូវទៅបម្រើការនៅប្រទេសកេនយ៉ាង។ក្រោយពីពេលដឹងថាបានឆ្លងកូវីដត្រូវដាក់ដោយឡែកនិងសម្រាកព្យាបាលខ្លួនប៉ុន្តែHashi បានបន្តកិច្ចការមានប្រយោជន៍ដោយប្រើសមត្ថភាពគូររូបរបស់នាងបង្ហាញទៅដល់មនុស្សជាច្រើនលើពិភពលោកពីបទពិសោធន៍ដែលបានជួបក៏ដូចជារបៀបថែរក្សាខ្លួននិងប្រុងប្រយ័ត្នពីមេរោគផ្លូវដង្ហើមនោះ។ កិច្ចការមានប្រយោជន៍បានអប់រំណែនាំប្រជាជនជាច្រើននៅបណ្តាប្រទេសអាហ្វ្រិកនិងជាកម្លាំងសំខាន់ដែលចូលរួមជាមួយប្រទេសនានាជុំវិញពិភពលោកទប់ស្កាត់នូវជំងឺផ្លូវដង្ហើមសកលនេះ។
Nujuum Hashi និយាយបែបនេះថា"បើខ្ញុំអាចតតាំងប្រឆាំងនឹងកូវីដ-១៩បានអ្នកឯទៀតក៏អាចធ្វើបានដែរ"៕
ប្រភព៖ BBC
