សូមចូល Telegram ក្រមាប៉ុស្ដិ៍ ទទួលបានអត្ថបទឆាប់រហ័ស
ស្ថិតក្រោមស្ថានភាពលំបាកទាំងអស់គ្នាដោយរងផលប៉ះពាល់ពីជំងឺផ្លូវដង្ហើមកូវីដ-១៩ តែរឿងមួយចាំបាច់ដែលយើងអាចធ្វើបាននោះគឺមើលថែរក្សាសមាជិកក្នុងគ្រួសារ និងខ្លួនអ្នកផ្ទាល់។ អ្នកអាចស្វែងយល់ថារូបអ្នកផ្ទាល់ក៏ជាចំណែកសំខាន់មួយក្នុងការបង្កើតបរិស្ថានល្អៗនៅក្នុងផ្ទះប្រសិនបើអ្នកស្រ្តេសឬម៉ួហ្មងនោះវាជារឿងពិបាកក្នុងការបង្កើតបរិយាកាសល្អក្នុងផ្ទះដូចនេះ តាមរយៈលោកស្រីវេជ្ជបណ្ឌិត Lisa Damour ជាគ្រូពេទ្យចិត្តសាស្រ្តអាមេរិកនិងជាអ្នកម្តាយមួយរូបបានចែករំលែកជាចំណេះដឹងខ្លីៗជា៣ចំណុចដូចខាងក្រោមតាមរយៈមូលនិធិអង្គការសហប្រជាជាតិដើម្បីកុមារ (UNICEF)៖
១.ទទួលបានការគាំទ្រផ្នែកសង្គម
ចំណុចនេះសម្តៅទៅលើនរណាជាទីទុកចិត្តរបស់អ្នកដែលអ្នកអាចសុំជំនួយស្មារតីបានមានន័យថា មនុស្សជិតស្និទ្ធិរបស់អ្នកដែលអ្នកអាចប្រាប់ពីការបារម្ភ ឬទុក្ខលំបាករបស់អ្នក។ ពួកគេជាអ្នកចាំជួយនិងយល់អារម្មណ៍របស់អ្នកផ្ទាល់ហើយពួកគេជាអ្នកផ្តល់ភាពកក់ក្តៅដល់អ្នក។
២.ភាពសប្បាយរីករាយដែលបន្លប់ទុក្ខព្រួយអ្នក
គឺមានន័យថាអ្នកអាចសុំច្បាប់សម្រាកវិសម្សកាលពីការព្រួយកង្វល់លើរឿងជំងឺរាតត្បាតដោយឱ្យខួរក្បាលបានសម្រាកលំហែខ្លះ។ អ្នកអាចរកអ្វីដែលចំណូលចិត្តជាការកម្សាន្តដែលអ្នកចូលចិត្តដែលអាចធ្វើឱ្យអ្នកបានរីករាយឡើងវិញដូចនេះអ្នកនឹងបំពេញតួនាទីជាប៉ាម៉ាក់សកម្មឡើងវិញសម្រាប់កូនៗ។
៣.មានពេលមើលថែរក្សាខ្លួនអ្នក
អ្នកអាចមើលថែរក្សាខ្លួនអ្នកបានដូចជាការគេងឱ្យបានគ្រប់គ្រាន់សកម្មក្នុងសកម្មភាពប្រចាំថ្ងៃញ៉ាំអាហារល្អដល់សុខភាពអ្នក។ ការថែរក្សាខ្លួនអ្នកនៅអំឡុងពេលនេះគឺជារឿងសំខាន់មួយត្រូវធ្វើគឺដើម្បីអ្នកអាចមើលថែកូនៗរបស់អ្នកដោយផ្តល់ភាពកក់ក្តៅដល់ពួកគេ។ គួរចាំថា ក្មេងៗនឹងរៀន ឬយកគំរូពីអ្នកផងដែរក្នុងការសម្របដោះស្រាយនឹងភាពប្រឈមផ្សេងៗ។ ពួកគេមើលទៅប៉ាម៉ាក់របស់ពួកគេនៅក្នុងពេលវេលាដែលលោកអ្នកជួបដោះស្រាយបញ្ហាទាំងនោះ។ ដូចនេះ ការរៀនសម្របខ្លួនដោះស្រាយបញ្ហាថែរក្សាខ្លួនអ្នកផ្ទាល់ពិសេសក្នុងបរិបទកូវីដ-១៩នេះគឺជាគំរូល្អដល់កូនៗក្មេងៗ នូវអ្វីដែលពួកគេអាចមើលខ្លួនផងដែរទាំងនៅពេលបច្ចុប្បន្នក៏ដូចជាអនាគតខាងមុខ៕
