មុននេះបន្តិចក្រសួងសុខាភិបាលបានចេញផ្សាយសេចក្តីណែនាំមួយចំនួនស្តីពីការអនុវត្តគម្លាតសុវត្ថិភាពសង្គមដើម្បីបង្ការ និងទប់ស្កាត់ការចម្លងវីរុសកូវីដ-១៩ទៅក្នុងសហគមន៍។ចំណុចទាំងនោះត្រូវបានក្រសួងណែនាំដូចខាងក្រោម៖
១.ការរក្សាគម្លាតសុវត្ថិភាពបុគ្គលដោយ៖
រក្សាគម្លាតសុវត្ថិភាពពីម្នាក់ ទៅម្នាក់ទៀតដូចជា អង្គុយ ឈរ ឬឈររង់ចាំ ឬឈរជជែកគ្នាឲ្យនៅគម្លាតពីគ្នា យ៉ាងតិច ១.៥ម៉ែត្រឡើងទៅ។
ចៀសវាងការឱប ថើប ចាប់ដៃ ដោយជំនួសមកវិញនូវការអនុវត្ត ការសំពះ ឬការលើកដៃជាសញ្ញា ឬការងក់ក្បាល ដែលមានចម្ងាយគម្លាតពីគ្នាឱ្យបានយ៉ាងតិច ១.៥ម៉ែត្រ ឡើង។
ក្នុងករណីមានការដឹកនាំការប្រជុំ ការបណ្តុះបណ្តាល និងសិក្ខាសាលា ត្រូវខិតខំធ្វើតាមប្រព័ន្ធអនឡាញ តែក្នុងករណីដែលចាំបាច់ខានមិនបានត្រូវធ្វើនៅទីតាំងណាមួយ អ្នករៀបចំត្រូវធានាថា ទីកន្លែងប្រជុំ គឺធំទូលាយ មានខ្យល់ចេញចូល ត្រូវរៀបចំឱ្យមានការរក្សាគម្លាតសុវត្ថិភាព ពីម្នាក់ទៅម្នាក់ទៀតយ៉ាងតិច ១.៥ម៉ែត្រឡើង វាស់កម្តៅបុគ្គលចូលរួម អ្នកចូលរួមទាំងអស់ត្រូវពាក់ម៉ាស់ជាចាំបាច់ និងអនុវត្តអនាម័យលាងដៃជាប់ជាប្រចាំ និងចៀសវាងការទៅកៀកគ្នា កាន់គ្នា ឬប៉ះពាល់គ្នា។ បុគ្គលដែលមានបញ្ហាសុខភាព មិនត្រូវមកចូលរួមនោះទេ។
២.ការរក្សាគម្លាតសុវត្ថិភាពសង្គមដោយ៖
ចៀសវាង ឬបើចៀសមិនបាន ត្រូវកាត់បន្ថយឱ្យបានជាអតិប្បរមា នូវការជួបជុំគ្នាក្នុងសង្គមដែលមានមនុស្សម្នាច្រើនដូចជា ការរៀបអាពាហ៍ពិពាហ៍ ពិធីបុណ្យនានា មានដូចជា ការជួបជុំគ្នាក្នុងពិធីបុណ្យជាតិ ពិធីបុណ្យសាសនា ពិធីបុណ្យប្រពៃណី ឬពិធីបុណ្យផ្សេងៗ ការប្រគុំតន្ត្រី ការដើរលេងជួបជុំ បរិភោគអាហារជាមួយមិត្តភក្តិខាងក្រៅផ្ទះ ការជួបជុំពិធីខួបកំណើត ឬការធ្វើឡើងផ្ទះក្នុងទ្រង់ទ្រាយធំ ការធ្វើដំណើរកម្សាន្តប្រមូលផ្តុំគ្នាច្រើនជាដើម។
ចៀសវាងការហាត់ប្រាណជាក្រុមនៅតាមក្លឹប ឬហាត់ជាក្រុមនៅទីតាំងដែលមានការប្រមូលផ្តុំគ្នានៅក្នុងទីកន្លែងបិទជិត។
ចៀសវាងទីកន្លែងដែលមានមនុស្សម្នាច្រើន។
អ្នកដែលមានហានិភ័យខ្ពស់នៃការចម្លងជំងឺ ដូចជាជនចាស់ជរា ជនដែលមានជំងឺប្រចាំកាយ ស្រ្តីមានផ្ទៃពោះ និងកុមារតូចៗជាដើម មិនត្រូវចូលរួមដំណើរ ជួបប្រជុំគ្នា ឬបើមានការចាំបាច់បំផុតនោះ ត្រូវតែមានការអនុវត្តកិច្ចការពារខ្លួនឱ្យបានល្អ និងផ្តល់មធ្យោបាយជំនួសវិញ (ឧទាហរណ៍ប្រើទូរសព្ទ ប្រើជាសារសម្លេង ប្រើជាបែបទំនាក់ទំនងតាមវីដេអូ សម្រាប់ការចូលរួមរបស់ពួកគេ)
លុបចោល ឬពន្យារពេលការជួបជុំ ឬការប្រជុំ និងព្រឹត្តិការណ៍ដែលបង្កឱ្យមានមនុស្សច្រើន។
មិនគួរចេញក្រៅផ្ទះ ទៅកាន់ទីកន្លែងដែលមានមនុស្សម្នាច្រើន បើមិនចាំបាច់៕
