ភ្នំពេញ៖ អង្គភាព CMAC ធ្វើការរំដោះផ្ទៃដីចម្ការមីន/ចម្ការគ្រាប់សរុបចំនួនជាង៣៥.៦៥២.០០០ម៉ែត្រក្រឡា ស្មើនិងរុករកឃើញនិងកម្ទេចចោលគ្រាប់មីន និងយុទ្ធភណ្ឌមិនទាន់ផ្ទុះគ្រប់ប្រភេទសរុបចំនួន១៥.៣៤៨គ្រាប់។ នេះបើយោងតាម ការលើកឡើងរបស់ឯកឧត្តម ហេង រតនា ក្នុងកិច្ចប្រជុំប្រចាំខែឧសភា។
សូមជម្រាបថា វឌ្ឍនភាព៤ខែ(មករា-មេសា ២០២១) ក្នុងឆ្នាំ២០២១នេះ អង្គភាពCMAC សម្រេចបានលទ្ធផលប្រកបដោយជោគជ័យគួរឲ្យកត់សម្គាល់ ទោះបីជាស្ថិតក្នុងស្ថានភាពការរាតត្បាតនៃជម្ងឺកូវីដ-១៩នៃព្រឹត្តិការណ៍សហគមន៍ ២០ កុម្ភៈ ២០២១ ដែលគំរាមកំហែងដល់សុខភាពសាធារណៈ និងកិច្ចប្រតិបត្តិការរបស់អង្គភាពCMACយ៉ាងណាក្តី។
លទ្ធផលប្រតិបត្តិការក្នុងរយៈពេល៤ខែ ឆ្នាំ២០២១នេះ អង្គភាពCMACធ្វើការរំដោះផ្ទៃដីចម្ការមីន/ចម្ការគ្រាប់សរុបចំនួនជាង៣៥.៦៥២.០០០ម៉ែត្រក្រឡា ស្មើនឹង៩៤,១៣% នៃផែនការ៤ខែ ឬស្មើនឹង៣១,៣៨% នៃផែនការប្រចាំឆ្នាំ២០២១ ដោយរុករកឃើញនិងកម្ទេចចោលគ្រាប់មីន និងយុទ្ធភណ្ឌមិនទាន់ផ្ទុះគ្រប់ប្រភេទសរុបចំនួន១៥.៣៤៨គ្រាប់។
ទន្ទឹមនឹងនេះ ក៏បានធ្វើការអប់រំយល់ដឹងពីគ្រោះថ្នាក់ដោយសារគ្រាប់មីន និងសំណល់ជាតិផ្ទុះពីសង្គ្រាម ដល់ក្រុមគោលដៅបានចំនួន៥.៨១៨លើក ស្មើនឹង១៩៨.៧៣៧ខ្នងផ្ទះ។
ឯកឧត្តម ហេង រតនា៖ ការគិតគូរជាយុទ្ធសាស្ត្ររបស់យេីងគឺ ត្រូវខិតខំរៀនរស់នៅតាមប្រក្រតីកម្មថ្មី ដោយត្រូវធ្វេីការងារនិងប្រតិបតិ្តការ ជាមួយបរិស្ថានថ្មីនៃវីរុសកូវីដ១៩! ។
