សូមចូល Telegram ក្រមាប៉ុស្ដិ៍ ទទួលបានអត្ថបទឆាប់រហ័ស
ផ្ទះជាទីជម្រកស្នាក់អាស្រ័យ និងជាកន្លែងពិសេសសម្រាប់យើងជាម្ចាស់ផ្ទះអាចច្នៃទ្រព្យសម្បត្តិអចលនទ្រព្យនេះជាបរិស្ថានមួយជាទីផ្តល់សុភមង្គលនិងភាពរីករាយដល់ខ្លួនឯងនិងសមាជិកគ្រួសារព្រមទាំងសាច់ញាតិផងដែរ។ ទៅតាមបទពិសោធអ្នកមានបទពិសោធមុនៗ ក៏បានចែករំលែកជាចំណុចមួយចំនួន ដែលអ្នកអាចច្នៃផ្ទះទៅជាកន្លែងមានប្រយោជន៍ និងមានឥទ្ធិពលជួយផ្លាស់ប្តូរជីវិតអ្នកក៏ថាបានដែលចំណុចនោះមានដូចជា៖
១.បង្កើតភាពរីករាយពីចំណុចតូចៗដែលអ្នកមាន
រូបថតអនុស្សាវរីយ៍សល់ពីដំណើរកម្សាន្តថ្នាំពណ៌លាបផ្ទះផ្ទាំងគំនូរដែលធ្លាប់បានទិញ ឬរូបភាព និងវត្ថុសម្រាប់តុបតែងដាក់តាំងក្នុងផ្ទះ គឺអ្នកអាចយករបស់ទាំងនោះទៅច្នៃទៅតាមលទ្ធភាពជាសកម្មភាពរៀបចំតុបតែងផ្ទះអ្នកទាំងក្នុងនិងក្រៅឱ្យមានភាពទាក់ទាញ។ មិនត្រឹមតែធ្វើឱ្យផ្ទះបានស្អាតរបៀបរៀបរយថែមទាំងបង្កើតបរិយាកាសរីករាយសម្រាប់អ្នកផងដែរ។ ម្យ៉ាងទៀតអ្នកក៏អាចរិះរករៀបចំកន្លែងទុកដាក់របស់របរឱ្យបានស្អាតមានសណ្តាប់ធ្នាប់ ឬអាចច្នៃបង្កើតជាកន្លែងការិយាល័យសម្រាប់ធ្វើការរៀនសូត្រ ដែលមានអមដោយពាក្យស្លោក ឬQuoteអប់រំល្អៗជាដើម។
២.ប្រែក្លាយទម្លាប់សកម្មភាពមួយនៅក្នុងផ្ទះទៅជាភាពរីករាយ
ចំណុចតូចៗតែជាការអនុវត្តរៀងរាល់ថ្ងៃនឹងនាំឱ្យអ្នកមានទំនុកចិត្តខ្លួនឯងព្រមដោយភាពរីករាយក្នុងផ្ទះឧទាហរណ៍ការបោសសម្អាតផ្ទះរៀបចំទុកដាក់ឱ្យមានសណ្តាប់ធ្នាប់ល្អ ឬការតុបតែងផ្ទះដោយខ្លួនអ្នក ឬមួយសូម្បីតែការចូលផ្ទះបាយធ្វើម្ហូបដែលបង្កជាភាពរីករាយដល់អ្នករួមទាំងសមាជិកគ្រួសារផងដែរ។ ផ្តើមពីសកម្មភាពតូចៗណាមួយដែលអ្នកអាចធ្វើវាឱ្យចេញជាសកម្មភាពរីករាយសម្រាប់អ្នក និងក្រុមគ្រួសារមិនថារៀបចំកន្លែងឱ្យក្មេងៗរៀបចំសម្អាតរបស់របរក្នុងផ្ទះរៀបចំទីកន្លែងសម្រាប់ទុកដាក់របស់ផ្សេងៗដែលអ្នកអាចច្នៃពីគំនិតអ្នក។
៣.បង្កើតបរិយាកាសឱ្យកើតមានពីគំនិតរបស់អ្នកផ្ទាល់
យើងនឹងជួបអារម្មណ៍អស្ចារ្យនៅពេលអ្នកបានធ្វើអ្វីមួយបានលេចជារូបរាងឡើងដូចនេះអ្នកអាចច្នៃផ្ទះរបស់អ្នក ឬបន្ទប់របស់អ្នកផ្ទាល់ទៅជាអ្វីដែលអ្នកចង់បាន។ ជាឧទាហរណ៍មួយអ្នកចង់រចនាបន្ទប់អ្នកឱ្យទៅជាបន្ទប់សិល្បៈមានព័ណ៌ស្រស់ស្អាតហើយថែមទាំងមានសល់ Spaceសម្រាប់ធ្វើលំហាត់ប្រាណយ៉ូហ្គា(Yoga) នោះអ្នកអាចច្នៃឱ្យចេញជារូបរាងឡើងដែលមានន័យថាពេលខ្លះគំនិតដើមរបស់អ្នក ក៏បានចូលរួមចំណែកជាគំនិតថ្មីៗសម្រាប់ពិភពលោកផងដែរ។ អ្នកអាចច្នៃផ្ទះបាយអ្នកឱ្យមានកន្លែងធ្វើភេសជ្ជៈ ឬមានសួនបន្លែតូចមួយក្បែរផ្ទះឬជាបណ្ណាល័យសៀវភៅឬជាទីកន្លែងដាក់តាំងវត្ថុអនុស្សាវរិយ៍របស់អ្នកដែលធ្លាប់បានសម្រេចជោគជ័យលើការងារទាំងក្នុង និងក្រៅប្រទេសជាដើមដែលនេះគឺអ្នកអាចធ្វើទៅតាមលទ្ធភាព និងចំណង់ចំណូលចិត្តរបស់អ្នកដែលនាំមកនូវភាពរីករាយដល់អ្នកតាមរយៈការតុបតែងផ្ទះនេះ៕
