អ្នកប្រហែលជាធ្លាប់ស្ដាប់ពីភាពជោគជ័យរបស់សហគ្រិន និងរឿងរបស់អ្នកដឹកនាំ​អាជីវកម្មផ្សេងទៀតដែលធ្វើអោយអ្នកមានអារម្មណ៍ពេញចិត្តចំពោះការងាររបស់ពួកគេ ហើយអ្នក​គិតថាអ្នកនឹងឆ្លងកាត់ដំណើរដូចគ្នានៃភាពជោគជ័យ ឬការពេញចិត្តបែបនោះក្នុងពេលឆាប់ៗខាងមុខ ​បន្ទាប់ពីអ្នកបានចាប់ផ្តើមបង្កើតអាជីវកម្មរបស់អ្នករួចហើយ។

ខណៈពេលដែលសមាសធាតុវិជ្ជមាននិងភាពរំភើបនៃភាពជាសហគ្រិនទាំងនេះពិតជាកើតឡើង​យ៉ាង​ពិតប្រាកដមែនហើយនឹងធ្វើឲ្យការងាររបស់អ្នកមានតម្លៃស័ក្តិសមនឹងអ្នកដែលរំពឹងទុកនោះ អ្នកត្រូវ​ចងចាំថាភាពជាសហគ្រិនក៏មានផ្នែកដែលមិនល្អផងដែរ។ គ្រប់យ៉ាងមិនមែនសុទ្ធតែរីករាយ និង​ ត្រៀមរួចជាស្រេចសម្រាប់អ្នកនោះទេហើយ ភាពជោគជ័យក្នុងរយៈពេលខ្លីទាំងនោះ គឺជាសមិទ្ធផលនៃការខិតខំប្រឹងប្រែងធ្វើការយ៉ាងអស់ពីលទ្ធភាពអស់រយៈពេលយ៉ាងយូរនិងការបរាជ័យច្រើន។

មុនពេលដែលអ្នកមានការរំភើបយ៉ាងខ្លាំងក្នុងការក្លាយជាសហគ្រិនមួយរូបនោះចូរបន្ធូរបន្ថយការរំពឹង​ទុករបស់អ្នកដោយការពិតនៃចំនុចមិនល្អខាងក្រោម៖

១. អ្នកនឹងមិនទទួលបានចំនូលភ្លាមនោះទេ

ការបង្កើនដើមទុនសម្រាប់អាជីវកម្មរបស់អ្នកគឺមានការលំបាក ហើយតាមធម្មតា វាគឺជាភាពភ្ញាក់ផ្អើល​ចំពោះសហគ្រិនវ័យក្មេងដែលគិតថាភាពជាកម្មសិទ្ធិនៃអាជីវកម្មមួយនឹងអាចទទួលបានប្រាក់ចំណេញ​យ៉ាងឆាប់រហ័ស។ការពិតគឺ សម្រាប់អាជីវកម្មភាគច្រើនអ្នកត្រូវចំណាយពេលពីរបីឆ្នាំដំបូងនៃ​ការ​ដំណើរការដើម្បីបង្កើតហេដ្ឋារចនាសម្ព័ន្ធនៃអាជីវកម្មរបស់អ្នកនិងធ្វើការដំណើរការហេដ្ឋារចនាសម្ព័ន្ធ​ទាំងនោះ។អ្នកនឹងត្រូវរ៉ាប់រងចំណាយច្រើនជាងប្រាក់ចំណូលដែលអ្នកនឹងទទួលបាន ហើយ​ជាលទ្ធផលអ្នកអាចនឹងមិនទទួលបានប្រាក់កម្រៃជាច្រើនខែ។ អ្នកនឹងត្រូវពឹងផ្អែកលើប្រាក់សន្សំឬ​ប្រាក់បម្រុងផ្ទាល់ខ្លួនរបស់អ្នកសម្រាប់ចំណាយប្រតិបត្តិការមូលដ្ឋាន ហើយសង្ឃឹមថាអ្វីៗនឹងប្រែជាល្អ​វិញនៅពេលអនាគត។

២.ជីវិតផ្ទាល់ខ្លួនរបស់អ្នកនឹងឆ្លងកាត់រឿងដែលមិនសមប្រកប

ទោះបីជាអ្នកដោះស្រាយអ្នកបំពេញតួនាទីរបស់អ្នកបានល្អយ៉ាងណាក៏ដោយឬទោះបីជាអ្នកមានការ​ប្តេជ្ញាចិត្តចំពោះការផ្តល់អាទិភាពដល់ទំនាក់ទំនងផ្ទាល់ខ្លួនរបស់អ្នកខ្លាំងយ៉ាងណាក៏ដោយទំនាក់ទំនងទាំងនោះនឹងជួបរឿងដែលមិនសមប្រកបដរាបណាអ្នកនៅតែបន្តបង្កើតអាជីវកម្មរបស់​អ្នក។ អ្នកនឹងធ្វើការជាច្រើនម៉ោងពេលខ្លះអ្នកត្រូវធ្វើការនៅផ្ទះហើយអ្នកនឹងត្រូវនិយាយទូរសព្ទដើម្បី​ដោះស្រាយបញ្ហាអាជីវកម្មនៅពេលយប់ នៅចុងសប្តាហ៍និងនៅថ្ងៃឈប់សម្រាក។ស្ទើរតែគ្រប់​ពេលវេលាដែលអ្នកនឹងមិនចាប់​អារម្មណ៍លើអ្វីផ្សេងឡើយអ្នកគិតតែអំពីបញ្ហាដែលអាជីវកម្មរបស់អ្នក​កំពុងជួបប្រទះនិងសម្ពាធផ្នែកហិរញ្ញវត្ថុដែលអ្នកនឹងត្រូវរ៉ាប់រងនឹងធ្វើឲ្យទំនាក់ទំនងរបស់អ្នកមានការ​ប្រេះឆា។

៣. ការព្យាយាមដោះស្រាយបញ្ហាគ្រប់យ៉ាងឲ្យបានក្នុងពេលតែមួយ នឹងធ្វើឲ្យអន្តរាយដល់ខ្លួនអ្នក

ក្នុងនាមជានាយកប្រតិបត្តិនៃអាជីវកម្មផ្ទាល់ខ្លួនរបស់អ្នកអ្នកនឹងត្រូវពាក់មួកជាច្រើន។ អ្នកនឹងធ្វើការងារមួយចំនួនដែលអ្នកចូលចិត្តធ្វើប៉ុន្តែអ្នកក៏នឹងត្រូវធ្វើជាអ្នកគ្រប់គ្រង អ្នកត្រួតពិនិត្យ អ្នកបច្ចេកទេសប្រធានផ្នែកធនធានមនុស្ស និងអ្នកស្វែងរកទីផ្សារក្នុងពេលតែមួយ។ ទោះបីជាអ្នក​នៅពេលដំបូងនៃការធ្វើជាសហគ្រិនរបស់អ្នកអ្នកមានភាពរំភើបចំពោះទំនួលខុសត្រូវទាំងនោះខ្លាំង​យ៉ាងណាក៏ដោយ ការប្រែប្រួលកម្រិតនៃការខិតខំប្រឹងប្រែងរបស់អ្នកនឹងធ្វើឲ្យមានភាពទន់ខ្សោយ​ទៅៗជាបន្តបន្ទាប់ដោយមិនអាចជៀសផុតបានឡើយ។

៤. អារម្មណ៍របស់អ្នកនឹងយកឈ្នះលើខ្លួនអ្នក

មានជាច្រើនលើកដែលអារម្មណ៍របស់អ្នកនឹងផ្ទុះឡើងហើយនឹងយកឈ្នះលើខ្លួនអ្នក ទោះបីជាអ្នក​ព្យាយាមរំងាប់អារម្មណ៍ទាំងនោះឬព្យាយាមស្វែងរកកន្លែងដ៏ល្អមួយសម្រាប់បញ្ចេញអារម្មណ៍ទាំង​នោះក៏ដោយ។អ្នកបានបណ្តាក់ទុនជាច្រើនទៅលើសហគ្រាសរបស់អ្នកដើម្បីទប់ស្កាត់កុំឲ្យអារម្មណ៍​ទាំងនេះកើតឡើង។អ្នកអាចមានអារម្មណ៍ក្រៀមក្រំ និងគ្មានកម្លាំងចិត្តចំពោះការវិវឌ្ឍរបសអ្នកឬមាន​ភាពភ័យខ្លាចថា អ្នកនឹងមិនទទួលបានប្រាក់ចំណេញក្នុងអំឡុងពេលដ៏សមស្របមួយ។នៅពេល​ដែលអារម្មណ៍របស់អ្នក​យកឈ្នះលើខ្លួនអ្នកបានអ្នកនឹងមានអារម្មណ៍មិនរីករាយជាខ្លាំងហើយអ្នក​នឹងធ្វើការសម្រេចចិត្តដែលអាក្រក់បំផុត។

៥.គ្មានអ្វីដែលនឹងកើតឡើង តាមវិធីដែលអ្នកចង់ឲ្យវាកើតឡើងនោះទេ

ផែនការអាជីវកម្មរបស់អ្នកអាចរៀបរាប់យ៉ាងលម្អិតអំពីដំណាក់កាលនីមួយៗដែលអ្នកបានប្រមើល​មើលជាមុនសម្រាប់រយៈពេលពីរបីឆ្នាំដំបូងនៃក្រុមហ៊ុនរបស់អ្នកប៉ុន្តែទោះបីជាអ្នកបានធ្វើការ​ស្រាវជ្រាវ​ច្រើន​ប៉ុណ្ណាក៏ដោយ អ្នកនឹងមិនអាចទស្សន៍ទាយអំពីអ្វីគ្រប់យ៉ាងបានឡើយ។ទោះបីជា​អ្វីដែលអ្នកអាច​ទស្សន៍ទាយជាមុនបានក៏ដោយក៏វានឹងមិនកើតឡើងតាមអ្វីដែលអ្នកបាន​ប្រមើលមើលជាមុន​ទាំងស្រុង​នោះឡើយ។ក្នុងនាមជាសហគ្រិនមួយរូប អ្នកត្រូវបង្ខំចិត្តសម្របតាមហើយពេលខ្លះអ្នកត្រូវសម្របតាមអ្វីដែលអ្នកមិនចង់សម្របតាមទៀតផង។

៦.អ្នកនឹងធ្វើការសម្រេចចិត្តដែលនឹងអន្ទងតាមប្រាណអ្នក

ក្នុងនាមជាសហគ្រិនមួយរូបអ្នកនឹងធ្វើជាអ្នកសម្រេចចិត្តចម្បងសម្រាប់ក្រុមហ៊ុនរបស់អ្នកហើយអ្នក​ធ្វើការសម្រេចចិត្តដែលពិបាក បង្កើតឲ្យមានសម្ពាធនៅគ្រប់ពេលទាំងអស់ដែលអ្នកកាន់កាប់​មុខតំណែងនោះ។ការសម្រេចចិត្តមួយចំនួននឹងស្ថិតនៅជាប់នឹងខ្លួនអ្នកទោះបីជាអ្នកបានធ្វើការ​សម្រេចចិត្តដ៏ត្រឹមត្រូវ និងសមហេតុផលមួយក៏ដោយ។អ្នកនឹងត្រូវផ្លាស់ប្តូរទិសដៅក្រុមហ៊ុន។ អ្នកនឹង​ត្រូវចាកចេញពីដៃគូរបស់អ្នក។អ្នកត្រូវលះបង់ទស្សនៈវិស័យមួយផ្នែករបស់អ្នកដើម្បីក្រុមហ៊ុន។ អ្នកនឹងត្រូវបណ្តេញបុគ្គលិក។

ការសម្រេចចិត្តទាំងនេះមិនមែនជាការងាយស្រួលនោះទេប៉ុន្តែអ្នកត្រូវតែធ្វើ ហើយវានឹងអន្ទងតាម​ប្រាណរបស់អ្នក។

៧. អ្នកនឹងបរាជ័យ

ក្រុមហ៊ុនទាំងមូលរបស់អ្នកអាចត្រូវបិទទ្វារ។ប្រសិនបើមិនបិទទ្វារទេ នឹងមានការបរាជ័យផ្សេងទៀត ទោះបីជាធ្ងន់ធ្ងរ ឬតូចតាចក្តី ដែលនឹងរារាំងដល់ផែនការរបស់អ្នកនិងកាត់បន្ថយតម្លៃនៃ​ទស្សនៈវិស័យ។ ភាពបរាជ័យគឺជៀសមិនផុតឡើង ហើយវាគឺជារឿងសំខាន់ជាផ្នែកមួយនៃភាពជា​សហគ្រិន ទោះបីជាទទួលស្គាល់ថាវាមិនងាយស្រួលក្នុងការទទួលយកក៏ដោយ។ឧបសគ្គនៃភាព​បរាជ័យធ្លាប់បង្ហាញខ្លួន និងតែងតែបំបាក់ទឹកចិត្តរបស់អ្នកនៅពេលដែលអ្នកកំពុងតែដឹកនាំអាជីវកម្ម​មួយហើយការធ្វើការងារឆ្លងកាត់ភាពបរាជ័យនោះ មានពេលមួយចំនួន គឺពិបាកខ្លាំងណាស់។ទោះបី​ជាយ៉ាងណាក៏ដោយ សមត្ថភាពក្នុងការងើបឈរឡើងវិញពីភាពបរាជ័យទាំងនេះគឺជាអ្វីដែលកាត់​ផ្តាច់ភាពជោគជ័យខ្លាំងបំផុតពីភាពជោគជ័យផ្សេងទៀត។

ខ្ញុំមិនមែនកំពុងតែព្យាយាមទាញអ្នកចេញពីការក្លាយជាសហគ្រិនមួយរូបនោះទេ។ភាពជាសហគ្រិន គួរតែជាការងារមួយដែលពោរពេញដោយភាពរំភើបនិងផ្តល់ផលប្រយោជន៍ដល់អ្នកដែល​ជ្រើសរើសបន្តអាជីវកម្មរបស់ខ្លួនបន្តទៅទៀត។ផ្ទុយមកវិញ ចេតនារបស់ខ្ញុំគឺដើម្បីជួយជំនាន់​ក្រោយ​ដែលចាប់ផ្តើមអាជីវកម្មដោយខ្លួនឯងក្នុងការរៀបចំខ្លួនសម្រាប់ការពិតដែលអាក្រក់នៃភាពជាម្ចាស់នៃអាជីវកម្មមួយដែលអាចកើតឡើងនៅពេលខ្លះដូច្នេះពួកគេអាចយល់ដឹងកាន់តែច្បាស់អំពី​ឧបសគ្គដែលនៅខាងមុខពួកគេហើយត្រៀមខ្លួនសម្រាប់ផ្លូវមួយនេះដោយផ្អែកលើភាពជាក់ស្តែង៕