ភ្នំពេញ ៖ សុនខ ចំនួន១០ក្បាល ពីអង្គភាពCMAC នឹងត្រូវបានប្រើប្រាស់ដើម្បី ស្រាវជ្រាវ និងធ្វើតេស្តរកមេរោគកូវីដ-១៩ នៅពាក់កណ្តាលខែក្រោយនេះ ខណៈសុនខទាំងនេះ ត្រូវបានបង្ហាត់ រួចរាល់ហើយដោយមន្ត្រីជំនាញ CMAC ។
នៅព្រឹកថ្ងៃទី២៣ ខែមិថុនា តាមការថ្លែងប្រាប់ទៅកាន់BTV ឯកឧត្តម ហេង រតនា ដែលជាប្រតិភូរាជរដ្ឋាភិបាលទទួលបន្ទុកអគ្គនាយកកម្ចាត់មីនកម្ពុជា (CMAC) បានលើកឡើងថា សុនខ ចំនួន១០ក្បាល នឹងត្រូវបានប្រើប្រាស់ដើម្បី ស្រាវជ្រាវ និងធ្វើតេស្តរកមេរោគកូវីដ-១៩ នាពេលឆាប់ៗខាងមុខនេះ។ មន្ត្រីស៊ីម៉ាក់ និងក្រសួងសុខាភិបាល រំពឹងទុកថា ប្រតិបត្តិការប្រើប្រាស់សុនខនេះ នឹងទទួលបានគុណខ្ពស់។
ឯកឧត្តម ហេង រតនា បានបញ្ជាក់ថា សុនខទាំង១០ក្បាលនេះ ដែលត្រូវបានមន្ត្រីជំនាញបង្វឹកឱ្យមានសមត្ថភាពគ្រប់គ្រាន់ហើយនោះ នឹងត្រូវបែងចែកជាពីរក្រុម និងនៅរង់ចាំតែសម្ភារ បន្ថែមសម្រាប់ប្រើប្រាស់ក្នុងប្រតិបត្តិការតែប៉ុណ្ណោះ។
សូមជម្រាបដែរថា កាលពីខែមេសា ក្រុមជំនាញសុនខ Getxent ដែលបានផ្តល់អំណោយ ជាឧបករណ៍ចាប់ក្លិនវីរុសកូវីដ១៩ សំរាប់ហ្វឹកហ្វឺនសុនខហិតអ្នកផ្ទុកវីរុសកូវីដ១៩ និងគាំទ្រក្រុមការងារស្រាវជ្រាវនិងអភិវឌ្ឍន៍បច្ចេកទេសសុនខហិតរកអ្នកវីរុសកូវីដ១៩នៅកម្ពុជា ដែលជាគំនិតផ្តួចផ្តេីមនិងអនុសាសន៍ដ៍ខ្ពង់ខ្ពស់សម្តេចតេជោ ក្នុងគោលបំណងស្វែងរកគ្រប់បច្ចេកទេស និងលទ្ធភាពដេីម្បីការពារសុខភាពប្រជាពលរដ្ឋកម្ពុជារួចផុតពីជម្ងឺកូវីដ១៩
ឯកឧត្តម ហេង រតនា៖ ការហ្វឹកហាត់សុនខប៉ុន្មានខែមកនេះ ក្រុមមន្ត្រីជំនាញរបស់CMAC ពុំមានបញ្ហាលំបាកអ្វីនោះឡើយ និងប្រកបដោយទំនុកចិត្តខ្ពស់ ព្រោះនៅប្រទេសផ្សេង ក៏បានប្រើប្រាស់រួចហើយ ដូចជា ប្រទេសអាល្លឺម៉ង់ រុស្ស៊ី និងប្រទេសមួយចំនួនទៀត៕
