“ខ្ញុំមានអារម្មណ៍ វាពិតថាអស្ចារ្យ! វាពិតជាមិនគួររំពឹងទុកនិងមិនគួរឱ្យជឿ ពីព្រោះខ្ញុំមិនត្រឹមតែបានច្រៀងជាមួយសិល្បៈករដែលខ្ញុំស្រលាញ់ទេ ប៉ុន្តែខ្ញុំបានច្រៀងជាមួយនឹងមិត្តសំឡាញ់ខ្ញុំ នៅពេលតែមួយទៀត។ វាជាបទពិសោធន៍យ៉ាងពិសេសមួយដែលខ្ញុំមិនអាចភ្លេចបាន។’’ សុភ័គបានប្រាប់ក្រមាប៉ុស្ដិ៍
ការចាប់ផ្តើមក្នុងវិស័យតន្ត្រី
សុច្ចរានិងសុភ័គ ជាមិត្តភក្តិ ជិតស្និតនឹងគ្នាតាំងពីពូកគេ រៀនជាមួយគ្នានៅថ្នាក់ទី១០ នៃសាលា អន្តរជាតិ អាយ ស៊ី អេស។ ដោយចិត្តស្រលាញ់តន្ត្រី ក្រៅពីការសិក្សា ពួកគេតែងតែច្រៀងកំសាន្តលេង នៅក្នុងថ្នាក់ជាមួយគ្នា ដែលភាគច្រើនមានសុច្ចរាជា អ្នកលេងឧបករណ៍ភ្លេង។ សុភ័គបាននិយាយយ៉ាងញញឹមអំពីអារម្មណ៍ដំបូងថា “ពួកយើងគ្រាន់តែ លេងកំសាន្តលេង មិនដែលគិតថាអាចធ្វើវាបានល្អយ៉ាងនេះទេ”។
មិនយូរប៉ុន្មាន ពួកគេក៏បានសំរេចចិត្តបង្ហោះវីដេអូចំរៀង ដែលពួកគេច្រៀងលើបណ្តាញសង្គម Facebook និងYoutube។ លី សុច្ចរា បានប្រាប់ថា ពួកគេគ្រាន់តែមាន ពេលវេលាសប្បាយរីករាយពេលបានច្រៀងហើយចង់ចែករំលែកភាពសប្បាយរីករាយរបស់គេ និងបង្ហាញពីការស្រលាញ់វិស័យតន្ត្រីទៅកាន់មិត្តភក្តិដ៏ទៃ។
និយាយពីបទចំរៀងដែលពួកគេច្រៀងវិញ ភាគច្រើនជាបទបរទេសហើយបទជាភាសាអង់គ្លេសបែបចង្វាក់ប៉ុបនិងយឺត។ គិតរហូតមកដល់ពេលនេះ សុច្ចរានិងសុភ័គ បានបង្ហោះវីដីអូលើប្រព័ន្ធអ៊ីនធឺណេតប្រហែលចំនួន១០បទ ដែលក្នុងនោះមានមួយបទចំណងជើងថា Domino យកលំនាំតាមតារាចម្រៀង Jessie J ។ ពួកគេក៏ធ្លាប់ឈ្នះការប្រកួតចម្រៀងក្នុងកម្មវិធី UmTeenUnited និង ជាប់ជាអ្នកចំរៀងពិរោះជាងគេ ក្នុងកម្មវិធីប្រលងចំរៀងរបស់តារាអន្តរជាតិ Jessie J រហូតបានច្រៀងជាមូយកញ្ញា Jessie Jផ្ទាល់។
បន្ថែមពីលើនេះ យុវតីស្រស់សោភីពីររូបនេះបានរៀបរាប់ថា ពួកគេមានគំរោងអភិវឌ្ឍ ទេពកោសល្យសិល្បៈ អោយល្អជាងមុន តាមរយៈការសរសេរ និងបង្កើតបទចំរៀងផ្ទាល់ខ្លួន។សុភ័គបាននិយាយទៀតថា''ការគាំទ្ររបស់សាធារណ:ជន កាន់តែធ្វើអោយពូកគាត់ មានភាពជឿជាក់ក្នុងការច្រៀង និងកាន់តែស្រលាញ់សិល្ប:តន្ត្រីជាងមុនទៀត’’។
អត្ថបទដោយ សុខ សុភ័ក្ត្របញ្ញា
