(ត្បូងឃ្មុំ)៖ តារាកំប្លែងដ៏ល្បីនៅកម្ពុជា នាយកុយ និងនាយក្រិនបានជួបគ្រោះថ្នាក់ចរាចរណ៍ នៅលើផ្លូវលេខ៧៣ ភូមិថ្នល់ ឃុំតំបែរ ស្រុកតំបែរខេត្តត្បូងឃ្មុំ ដោយរថយន្ដបែកកង់រេទៅបុកដើមឈើ នេះបើតាមការចុះផ្សាយ របស់សារព័ត៌មាន Freshnews។
បើតាមស្នងការនគរបាលខេត្តត្បូងឃ្មុំ លោកឧត្តមសេនីយ៍ទោ បែន រ័ត្នបានប្រាប់អង្គភាពនេះថា ហេតុការណ៍គ្រោះថ្នាក់ចរាចរណ៍ ដែលកើតនៅព្រឹកថ្ងៃទី ២០ខែមករា ឆ្នាំ២០១៩នេះ បណ្ដាលមកពីរថយន្តបែកកង់រ៉េ ទៅបុកដើមឈើ ។ រថយន្ដ ដែលតារាកំប្លែងទាំងពីរនាក់ធ្វើដំណើរនេះម៉ាកឡង់គ្រីស័រ ពណ៌ស ពាក់ផ្លាកលេខភ្នំពេញ2AR-9968។
លោកបានបញ្ជាក់ទៀតថា រថយន្ដនេះបើកបរដោយឈ្មោះ ជួង ជី (ហៅនាយកុយ)អាយុ៦៤ឆ្នាំ រស់នៅរាជធានីភ្នំពេញ រងរបួសកែងដៃស្តាំ និងអ្នករួមដំណើរឈ្មោះ ទេស សុជន(នាយក្រិន) អាយុ៣៩ឆ្នាំ រាជធានីភ្នំពេញ ដោយជនរងគ្រោះទាំងពីរធ្វើដំណើរមកពីខេត្តរតនគិរី ទៅរាជធានីភ្នំពេញ៕
