សូមចូល Telegram ក្រមាប៉ុស្ដិ៍ ទទួលបានអត្ថបទឆាប់រហ័ស
ទំនាក់ទំនងក្នុងសង្គមរស់នៅតែងកើតមានខ្លះនូវវិវាទ ជម្លោះបើទោះបីជាក្នុងរង្វង់មិត្តភក្តិក៏ដោយនៅពេលខ្លះ។ ដូចនេះ ជាការណែនាំជាចំណុចពិចារណាមួយចំនួនលោកស្រី Kristen Newton ជាសហគ្រិនអាមេរិកមួយរូបហើយក៏ជាគ្រូបង្វឹកផ្នែកទំនាក់ទំនងសង្គមក៏បានចែករំលែកជាចំណុចខ្លីៗសាមញ្ញៗទៅលើបញ្ហាខាងលើនេះដូចខាងក្រោម៖
១.រក្សាគម្លាតបន្តិចរួចពិចារណាអំពីកំហុស
ចំណុចនេះគឺបង្រៀនឱ្យយើងស្មោះត្រង់ចំពោះខ្លួនឯង។ អ្នកអាចពិចារណានូវអ្វីដែលជាហេតុបង្កឡើងនាំឱ្យមានជម្លោះរវាងអ្នកនិងមិត្តភក្តិ។ សម្រាប់ចំណុចនេះអាចនឹងត្រូវការពេលវេលាសម្រាប់ពិចារណាព្រោះថាពេលអ្នកមិនដឹងភ្លាមៗទេសម្រាប់រឿងមួយចំនួន។ ដូចនេះគួរមានពេលសម្រាប់មើលពីមូលហេតុដែលនាំឱ្យបង្កជាជម្លោះនោះ។
២.និយាយផ្សះផ្សាវិញនៅពេលវេលាសមគួរមួយ
នៅពេលដែលអ្នកគិតថាសមគួរ និងមានទំនុកចិត្តថាដល់ពេលដែលអ្នកគួរសុំនិយាយទៅកាន់ភាគីមិត្តភក្តិប្រាប់ពីជំហរដែលនាំឱ្យបង្កមានជម្លោះកើតឡើងព្រោះថានរណាៗក៏មិនចង់ឱ្យរឿងនេះកើតឡើងដែរក្នុងទំនាក់ទំនង ប៉ុន្តែគឺគំនិតខ្វែងគ្នានោះទេដែលនាំឱ្យមានការអាក់អន់ចិត្តខ្លះ។ ដូចនេះការបញ្ជាក់ពីគោលគំនិតអ្នក ហើយព្យាយាមសម្របសម្រួលជាសាមគ្គីភាពគឺជារឿងល្អបំផុតមួយ។ ហើយបើមានជាកំហុសដែលបានកើតឡើងអំឡុងពេលជម្លោះអ្នកក៏គួរហ៊ានសុំទោស និងទទួលកំហុសនៅពេលនេះ។ អ្នកអាចចាំថាអ្នកមិនបានបាត់បង់តម្លៃឡើយនៅពេលអ្នកហ៊ានទទួលកំហុសហើយកែប្រែបើទោះបីភាគីមិត្តភក្តិមិនព្រមទទួល ឬមិនឆ្លើយតបនៅពេលនោះក៏ដោយ។ មិត្តភាពសាមគ្គីភាពគឺជារឿងមួយមិនអាចខ្វះបានក្នុងទំនាក់ទំនង។
៣.រៀនអប់រំចិត្តប្រសិនបើទំនាក់ទំនងនោះមិនអាចដូចដើម
អ្នកបានព្យាយាមស្រោចស្រង់ទំនាក់ទំនងនោះឡើងវិញទៅតាមសមត្ថភាពដែលអ្នកមានរួចរាល់ហើយ ប៉ុន្តែករណីដែលនៅតែមិនអាចមានការយល់ព្រមផ្សះផ្សាពីភាគីម្ខាងទៀតនោះគឺដល់ពេលវេលាមួយដែលអ្នកត្រូវរៀនកាត់ចិត្ត។គឺសម្តៅលើការអប់រំចិត្តថាអ្នកបានព្យាយាមរួចរាល់ហើយហើយអ្វីៗគឺប្រព្រឹត្តទៅតាមដំណើរដែលពេលខ្លះអ្នកមិនអាចគ្រប់គ្រងឬបង្ខំបានទេ។ ព្យាយាមលើកទឹកចិត្តខ្លួនឯងហើយបង្កើតទំនាក់ទំនងថ្មីៗដែលមានសុខភាពទំនាក់ទំនងល្អប្រសើរហើយនៅពេលដែលអ្នកមានចិត្តនឹងនរអ្នកនៅតែអាចគិតដល់រឿងល្អៗ និងចេះធ្វើឱ្យទំនាក់ទំនងជាច្រើនទៀតល្អប្រសើរតាមរយៈការរៀន និងកែប្រែកំហុសពីមុនៗដែលជាមូលដ្ឋាន និងជាមេរៀនសម្រាប់កែប្រែកំហុសនោះកុំឱ្យកើតមាន៕
