រាជធានីភ្នំពេញ៖ នៅក្នុងដំណាក់កាលជំងឺកូវីដ១៩នេះ ធនាគារអភិវឌ្ឍន៍ជនបទ និងកសិកម្ម បានផ្តល់ឥណទានប្រមាណជាង ១០លានដុល្លារ ពីអ្នកស្នើសុំខ្ចីឥណទានជាង ១០០សំណើ ខណៈសំណើសុំមានជាង៤៥០ គិតជាទំហំទឹកប្រាក់ប្រមាណ ៤៥លានដុល្លារ។ នេះបើតាមការរៀបរាប់របស់លោក កៅ ថាច អគ្គនាយកធនាគារអភិវឌ្ឍន៍ជនបទ និងកសិកម្ម ក្នុងសន្និសីទសារព័ត៌មានស្ដីពី «ដំណើរការ និងនីតិវិធីនៃគម្រោងហិរញ្ញប្បទានទ្រទ្រង់សហគ្រានធុនតូចនិងមធ្យម SME» ដែលរៀបចំដោយអង្គភាពអ្នកនាំពាក្យរាជរដ្ឋាភិបាល នៅព្រឹកថ្ងៃទី៣០ ខែកក្កដានេះ នាទីស្ដីការគណៈរដ្ឋមន្ដ្រី។
លោកបានថ្លែងថា៖ «ទំហំឥណទានដែលយើងអនុម័តជាង ១០០ បានតែជាង ១០លានដុល្លារទេ។ បើអ្នកខ្ចីជាសហគ្រាសធុនតូច និងមធ្យមតែម្តង ជាការកែច្នៃ អាហ្នឹងវាទំហំធំណាស់ ១លាន ២លានឡើងទៅ ដែលយើងអាចធ្វើកិច្ចការងារនេះបាន»។
លោកបន្តបញ្ជាក់ថា ចំពោះអ្នកដែលអាចទទួលបាននូវឥណទាននៅទំហំប្រាក់៥០លានដុល្លារនេះបាន គឺទី១ អ្នកដាំដុះបន្លែផ្លែឈើ។ ទី២អ្នកចិញ្ចឹមសត្វ មានចិញ្ចឹមគោ ក្របី ទា មាន់។ ទី៣ ផ្នែកវរីវប្បកម្ម មានការចិញ្ចឹមត្រី ចិញ្ចឹមកង្កែប ចិញ្ចឹមអន្ទង់ និងទី៤ សហគ្រាសធុនតូចនិងមធ្យមដែលធ្វើការកែច្នៃ ផលិតផលកសិកម្មដែលយើងមានច្រើនហើយដែលកំពុងសស្រាក់ស្រាំក្នុងការផលិត ដូចជាទឹកស្វាយ ធ្វើមៀនកំប៉ុង អំបុកកំប៉ុង។ល។ដែលយកផលិតផលកសិកម្មមកធ្វើការកែច្នៃ ហើយក្រៅពីនេះគឺមិនអាចស្នើរសុំបានទេ៕
