លោកអ្នកប្រាកដជាស្គាល់ហើយលោក Elon musk ដែលជាមេដឹកនាំកំពូលក្នុងក្រុមហ៊ុន ផលិតរថយន្ត Tesla ដ៏ល្បី និងមានតម្លៃបំផុតនៅលើពិភពលោក។ នាពេលថ្មីៗនេះ លោក Elon ត្រូវបានគេចាត់ទុកថាជាមហាសេដ្ឋីលំដាប់ទីមួយ ដែលមានជាងគេនៅទូទាំងពិភពលោក ជាមួយនឹងទ្រព្យសម្បត្តិសរុបចំនួន១៨៨,៥ពាន់លានដុល្លារ សហរដ្ឋអាមេរិក។ 

ស្របជាមួយគ្នានេះដែរលោកJeff Bezos ត្រូវបានធ្លាក់មកនៅតំណែងជាមហា សេដ្ឋីលំដាប់ទីពីរ នៅទូទាំងពិភពលោកខណៈដែលទ្រព្យសម្បត្តិរបស់លោក Elon Musk មានចំនួនច្រើនជាងដែលទ្រព្យសម្បត្តិរបស់លោកJeff Bezos ប្រមាណជាង ១,៥ពាន់ លានដុល្លារ។

លោក​ Elon Musk កំពុងតែមានការកើនឡើងប្រភពនៃប្រាក់ចំណូលជាច្រើនផ្នែក ទៅលើការធ្វើភាគហ៊ុន និងក្រុមហ៊ុនជាច្រើនទៀតដែលលោកជាស្ថាបនិកផងដែរ។

ភាគហ៊ុនរបស់លោកនៅក្រុមហ៊ុនផលិតរថយន្តម៉ាក Tesla បានកើនឡើង ៧,៤ភាគរយ ក្នុងកម្រិតខ្ពស់បំផុតដែលមានតម្លៃរហូតដល់ ៨១១,៦១ដុល្លារអាមេរិក ក្នុងមួយភាគហ៊ុន ដោយឡែកចំពោះទឹកប្រាក់ដែលលោកទទួលបានចំណេញ ពីក្រុមហ៊ុន Tesla គឺមានរហូតទៅដល់ ៤២ពាន់លានដុល្លារ ខណៈដែលភាគហ៊ុន របស់លោកមានចំនួន២០ភាគរយនៃក្រុមហ៊ុនទាំងមូល។ 

ក្រុមហ៊ុន Tesla Inc នេះមិនត្រឹមតែផលិតរថយន្តប្រើថាមពលអគ្គិសនីនោះទេ ថែមទាំងមានរោងចក្រផលិតនិងស្ដុកទុកថាមពលពន្លឺព្រះអាទិត្យ ដើម្បីចែកចាយជាច្រើនកន្លែងក្នុងពិភពលោក។

សូមជម្រាបដែរថា លោក Elon Musk ក៏ធ្លាប់ជាសហស្ថាបនិក និងបានលក់ក្រុមហ៊ុនទូទាត់ PayPal Holdings Inc ដែលឥឡូវនេះកំពុងតែដឹកនាំក្រុមហ៊ុន ត្រូវបានគេមើលឃើញថានឹងមានការរីកចម្រើនខ្លាំងបំផុតលើពិភពលោកនាពេលខាងមុខ។

ជាមួយគ្នានេះដែរលោកក៏បានបង្កើតក្រុមហ៊ុន Boring Company ដើម្បីធ្វើផ្លូវរូងក្រោមដីនៅខាងក្រោមផ្លូវទីក្រុងដែលមានសកម្មភាពមមាញឹក សម្រាប់ប្រព័ន្ធដឹកជញ្ជូនសាធារណៈ អគ្គិសនីដើម្បីចៀសវាងការកកស្ទះចរាចរណ៍នៅទីក្រុងនានានៃសហរដ្ឋអាមេរិក។ ក្រៅពីក្រុមហ៊ុនទាំងអស់ដែលបានរៀបរាប់នៅខាងលើលោក Elon Musk ក៏ជាប្រធាន ក្រុមហ៊ុន SpaceX និងក្រុមហ៊ុន Neuralink ដែលជាក្រុមហ៊ុនមួយកំពុងបង្កើតម៉ាស៊ីនខួរក្បាលល្បឿនលឿន ដើម្បីភ្ជាប់ខួរក្បាលមនុស្សទៅនឹងកុំព្យូទ័រ។ 

យ៉ាងណាមិញគួរបញ្ជាក់ផងដែរថា ទឹកប្រាក់ដែលបានមកពីផលចំណេញនៃក្រុមហ៊ុនជាច្រើនខាងលើនេះហើយដែលធ្វើឱ្យលោក Elon Musk បានក្លាយខ្លួនជាកំពូលមហាសេដ្ឋីដែលមានជាងគេនៅលើពិភពលោក៕