ស្ថិតក្នុងរយៈពេលដែលការអប់រំនៅកម្ពុជា ទទួលរងផលប៉ះពាល់ដោយសារតែការរីករាលដាល នៃជំងឺ Covid-19នេះ សិស្សានុសិស្សជាច្រើនលាននាក់ ហាក់កំពុងប្រឈមនឹងចំណោទជាច្រើន ដែលធ្វើឱ្យពួកគេបាក់ទឹកចិត្តឬប៉ះពាល់ដល់សមត្ថភាពនៃការសិក្សាជាដើម។
ពាក់ព័ន្ធនឹងបញ្ហានេះ លោក គីម ដារ៉ា ស្ថាបនិកគ្រឹះស្ថានអប់រំ Start Up Cambodia បានលើកឡើងថា ទោះបីជាស្ថិតក្នុងពេល Covid-19 កំពុងលុកលុយក៏ដោយ យើងមិនអាចទម្លាក់ដៃពីកិច្ចការអប់រំឡើយ។ យើងចាំបាច់ត្រូវតែបត់បែនតាមសភាពការណ៍ជាក់ស្តែង ដើម្បីឱ្យសិស្សនៅតែចង់ខិតខំរៀន និងផ្តោតសំខាន់លើការអភិវឌ្ឍសមត្ថភាពឱ្យសិស្សចេះ។
លោក គីម ដារ៉ា បានបញ្ជាក់ថា៖ «កំឡុងពេលនេះ ការលើកទឹកចិត្តគឺជាកិច្ចការងារមួយដែលចាំបាច់ ព្រោះសិស្សជាច្រើនបានប៉ះពាល់អារម្មណ៍យ៉ាងខ្លាំង ក្រោយការផ្លាស់ប្តូររបៀបរស់នៅ ពិសេសគឺទម្លាប់ក្នុងការសិក្សា»។
អ្នកអប់រំខាងលើបានបញ្ជាក់ផងដែរថា អ្នកអប់រំនិងអាណាព្យាបាលគួរកុំស្តីបន្ទោស តែបែរមកជួយលើកទឹកចិត្តឱ្យពួកគេខិតខំប្រឹងប្រែងបន្ថែមទៀត។ ចំណែកឯសិស្សខ្លួនឯងវិញ ក៏ត្រូវដឹងផងដែរពីកាតព្វកិច្ចរបស់ខ្លួនព្រោះការសិក្សារៀនសូត្រគឺជាកាតព្វកិច្ចរបស់សិស្ស។ ហេតុនេះក្នុងកាលៈទេសៈណាក៏ដោយ សិស្សចាំបាច់ត្រូវតែខិតខំរៀនសូត្រហើយការសិក្សារៀនសូត្រនេះ មិនមែនជាការបំពេញកតព្វកិច្ចសម្រាប់តែខ្លួនឯងម្នាក់ប៉ុណ្ណោះទេ តែវាជាកាតព្វកិច្ចក្នុងការជួយសង្គមផងដែរ ព្រោះយើងជាធនធានមនុស្សដែលសង្គមត្រូវការនៅថ្ងៃអនាគត។
ងាកមកក្រសួងអប់រំវិញ លោកយល់ឃើញថាក្រសួងបច្ចុប្បន្នក៏កំពុងប្រឹងប្រែងយ៉ាងខ្លាំង ដោយក្នុងនោះសូម្បីតែឯកឧត្តមរដ្ឋមន្ត្រីក៏បង្រៀនដោយផ្ទាល់ដែរ ដើម្បីលើកទឹកចិត្តដល់សិស្សានុសិស្ស។ ហេតុនេះមិនថាកាលៈទេសៈណានោះទេ ការអភិវឌ្ឍធនធានមនុស្សគឺត្រូវការគ្រប់ភាគីចូលរួម៕
