ជំនឿទំនៀមទំលាប់ប្រពៃណីខ្មែរ សុទ្ធតែមានលក្ខណៈពិសេស អស្ចារ្យទាំងអស់ ខ្មែរមានជំនឿ ចំពោះចង្កូមខ្លាថាពេលគេយកមកដាក់ពាក់ជាបន្តោងនៅក ដើម្បីការពារសត្វព្រៃហើយបើចង្កូមខ្លានោះមានប្រហោង វាកាន់តែមានប្រសិទ្ធភាពទៅទៀត ព្រោះព្រាយបីសាចភ័យខ្លាចខ្លាំងណាស់។ ក្រៅពីនេះប្រជាពលរដ្ឋខ្មែរ ក៏មានជំនឿទៅលើវត្ថុផ្សេងៗ ទៀតជាពិសេស ខ្នាយតាន់របស់ជ្រូកព្រៃ។
ជាក់ស្ដែងប្រជាជនខ្មែររស់នៅក្នុង ខេត្តបន្ទាយមានជ័យ បាត់ដំបង ពោធិ៍សាត់ ក៏ដូចគ្នានឹងប្រជាជនខ្មែរដែលរស់នៅក្នុងខេត្តសុរិន្ទ្រ ស៊ីសាកេតនិងបុរីរម្យ ក្នុងប្រទេសថៃនាពេលបច្ចុប្បន្ននេះដែរ ពួកគេនៅតែមានជំនឿយ៉ាងខ្លាំងទៅលើខ្នាយតាន់របស់ជ្រូកព្រៃ ថាគឺជាវត្ថុស័ក្តិសិទ្ធិដែលនាំមកនូវសិរីមង្គលនិងសេចក្តីសុខចម្រុងចម្រើន នេះបើយោងតាម សៀវភៅ វប្បធម៌ អរិយធម៌ មូលដ្ឋានគ្រឹះអរិយធម៌ខ្មែរ របស់សាស្ដ្រាចារ្យបណ្ឌិត មីសែលត្រាណែ ភាគ ១បោះពុម្ព ឆ្នាំ២០១៣ ។
ការមានជំនឿលើខ្នាយតាន់ជ្រូកព្រៃរបស់ប្រជាជនខ្មែរ ស្ទើរតែមានលក្ខណ:ជាទូទៅក្នុងសង្គមខ្មែរ ជាពិសេសនៅតំបន់ជួរភ្នំដងរែក នេះយោងតាមសៀវភៅខាងលើបានឲ្យឱ្យដឹងថា ជ្រូកព្រៃមានទម្លាប់រស់នៅជាហ្វូងរបស់វា ហើយនៅក្នុងហ្វូងជ្រូកនីមួយៗ គេឃើញមានមេហ្វូងមួយជាជ្រូកឈ្មោលដែល មិនត្រឹមតែមានមាឌធំហើយខ្លាំងជាងគេទេ វាថែមទាំងកាចសាហាវទៀតផង។ ពេលដែលមានកូនជ្រូកព្រៃទើបនឹងកើតមក មេហ្វូងជ្រូកព្រៃដ៏កាចសាហាវខ្លាំងនេះសម្លាប់នូវកូនជ្រូកព្រៃឈ្មោលណាដែលវាទទួលស្គាល់ថា មានមហិទ្ធិឫទ្ធិដូចវា។ តាមការសន្និដ្ឋានរបស់អ្នកស្រុករស់នៅតំបន់ជួរភ្នំដងរែកបានឱ្យដឹងថា ការបំផ្លាញកូនខ្លួនឯងដូច្នេះ បណ្តាលមកពីមេហ្វូងខ្លាចក្រែងកូនឈ្មោលនៅក្នុងហ្វូងនោះនឹងដណ្តើមអំណាចធ្វើជាមេហ្វូងទៅថ្ងៃក្រោយ ។
ប៉ុន្តែពេលមេហ្វូងពេលដែលវាជិតស្លាប់ ទើបវាទុកកូនឈ្មោលណាដែលប្រកបលក្ខណៈសម្បត្តិរឹងមាំ មានដុះខ្នាយវែងជាងគេបន្តិចដើម្បីទុកដឹកនាំហ្វូងជ្រូកព្រៃបន្តពីវាទៀត។ ចំពោះមេហ្វូងជ្រូកព្រៃដល់ពេលដែលវាចាស់ជរាខ្លាំងទៅ វាដើរទៅរកកន្លែងណាស្ងាត់ និងមានដើមឈើផង ដើម្បីយកខ្នាយតាន់របស់វាទាំងពីរ ទៅកាច់បំបាក់ទុកបង្កប់ចោលនៅនឹងដើមឈើនោះ។
ហេតុដូច្នេះហើយ ប្រជាជនខ្មែរនៅតាមតំបន់ព្រៃភ្នំដងរែក និងតំបន់ខ្ពង់រាបដទៃទៀត មានជំនឿថា អ្នកដែលរើសបានខ្នាយ តាន់ជ្រូកព្រៃយកមកពាក់ គឺគេនឹងមានសេចក្តីសុខសិរីសួស្តី ឫទ្ធិអំណាចជាក់ជាពុំខាន។ បារមីនៃខ្នាយតាន់នេះនឹងនៅរក្សាការពារ មិនឱ្យសត្រូវជិតឆ្ងាយណាមកបៀតបៀន ឬយកឈ្នេះលើខ្លួនគេបានឡើយ។ មហិទ្ធិឫទ្ធិរបស់ខ្នាយតាន់នៅត្រង់ថាបារមី ឬវត្ថុស័ក្តិសិទ្ធិ ជាពន្លឺនៅលើថ្ងាសជ្រូកព្រៃ ដែលតាមថែរក្សាគាំពារជានិច្ចកាល។ បារមីនេះឯងដែលពិបាកនឹងមាននរណាម្នាក់អាចសម្លាប់វាដោយងាយបានឡើយ។
ចំពោះបងប្អូនជនជាតិខ្មែរលើក៏មានជំនឿដូចគ្នានេះដែរ។ គេបានចាត់ទុកជំនឿនេះជាទំនៀមទម្លាប់ប្រពៃណីប្រចាំជនជាតិទៀតផង។ គេយល់ថា បារមីខ្នាយតាន់ជ្រូកព្រៃសម្រាប់ជួយការពារនឹងសត្វព្រៃដ៏កាច សាហាវផ្សេងៗឬអាវុធដូចជាព្រួញស្នជាដើម ដោយហេតុថានៅតំបន់ព្រៃភ្នំពុំមានគ្រាប់កាំភ្លើងឬជាតិផ្ទុះឡើយ ។
ចំពោះ អ្នកមានខ្នាយតាន់ជ្រូកព្រៃ តែងតែកាន់ត្រណមមួយចំនួនយ៉ាងខ្ជាប់ខ្ជួន ហើយគួបផ្សំនឹងមន្តអាគមបន្ថែមផងនោះធ្វើឱ្យខ្នាយតាន់ ជ្រូកព្រៃដែលមានបារមីកាន់ស្រាប់កាន់តែខ្លាំងក្លាមួយកំរិតថែមទៀត ៕
