គ្នាយើងមួយចំនួនច្រើនត្អូញត្អែរពីរឿងឡើងគីឡូ មិនសប្បាយចិត្តនឹងរូបរាង ដោយសារមានពិធីជួបជុំច្រើនដូចជាជប់លៀងមិត្តភក្តិ ខួបកំណើត ឬការជាដើម។ ហើយនេះ ក៏ជាលេសពេញនិយមផងដែរសម្រាប់គ្នាយើងចូលចិត្តញ៉ាំ។ តែយ៉ាងណាមិញ បើយើងសម្គាល់ឃើញថាទម្លាប់ចង់ញ៉ាំកើតសឹងគ្រប់ពេលដែលការឃ្លានជាញឹកញាប់ នោះនឹងធ្វើឱ្យរាងកាយទទួលយកអាហារលើសពីតម្រូវការ ឬទទួលយកធាតុកាល់ឡូរីច្រើន នាំឱ្យយើងកើនទម្ងន់។
តាមរយៈការស្រាវជ្រាវជាច្រើន បង្ហាញនៅលើគេហទំព័រ Life Hack បានលើកឡើងនូវមូលហេតុទូទៅធំៗ មួយចំនួន ដែលធ្វើឱ្យយើងកើតមានបញ្ហាចំណង់ញ៉ាំសឹងតែគ្រប់ពេលនោះមានដូចជា៖
ហត់អស់កម្លាំង៖ នៅពេលហត់នឿយ ភាគច្រើនយើងអាចឃើញអាហារថាជារង្វាន់ ឬជាប្រភពប៉ះប៉ូវថាមពល ដែលពេលខ្លះយើងបង្កើតចេញជាទម្លាប់ញ៉ាំថ្មីដោយខ្លួនឯង ដោយចូលចិត្តជម្រុញចិត្តញ៉ាំចំណីច្រើនក្រោយពេលហត់អស់កម្លាំង។
អារម្មណ៍ធុញថប់ឬអផ្សុក៖ សកម្មភាពដែលនាំឱ្យយើងទម្លាប់ឃ្លានមិនរើសពេលផងដែរនោះ គឺការចំណីក្រៅពេលកំដរមាត់ព្រោះអផ្សុក ថែមពីនោះការមានចំណីចំណុកអំឡុងពេលការមើលទូរទស្សន៍ ឬភាពយន្តកម្សាន្ត ក៏នាំឱ្យយើងភ្លេចខ្លួនញ៉ាំច្រើនមិនបានគិតប្រមាណផងដែរ។
ភេសជ្ជៈជាតិអាល់កុល ឬជាតិស្រវឹង៖ ភេសជ្ជៈញ៉ាំលេងសម្រាប់បង្កើនបរិយាកាសរីករាយ ក៏នាំឱ្យមានចំណីចំណុកអាហារបន្ថែមដើម្បីក្លែម។ ក្នុងនោះជាតិប្រៃជាតិផ្អែម ឬជាតិខ្លាញ់ក្នុងចំណីដោយអមជាមួយភេសជ្ជៈ ធ្វើឱ្យយើងមានអាការៈស្រេកជាតិទឹក និងបន្តញ៉ាំភេសជ្ជៈទាំងនោះបន្ថែម ដែលបង្កចេញជាទម្លាប់មិនល្អថ្មី។
ញ៉ាំទឹកមិនបានគ្រប់គ្រាន់៖ ការស្រាវជ្រាវក៏បានបង្ហាញថាកង្វះជាតិទឹក ឬមិនបានញ៉ាំទឹកឱ្យបានគ្រប់គ្រាន់តាមតម្រូវការប្រចាំថ្ងៃ ក៏អាចឱ្យយើងយល់ច្រលំថាឃ្លាន ហេវហត់ហើយមានទំនោររកចំណីចំណុកមកញ៉ាំជំនួសឱ្យការស្រេក ហើយសឹងនឹងគ្រប់ពេល។
ដោយសារដើមហេតុសំខាន់ៗខាងលើនេះ អាចធ្វើឱ្យយើងពេលខ្លះក្លាយជាទម្លាប់ឃ្លានមិនរើសពេលបាន ដូចនេះយើងអាចរិះរកវិធីផ្សេងៗដើម្បីកាត់បន្ថយចំណងបញ្ហាទាំងនោះផងដែរ៕
