ក្នុងវិស័យអាជីវកម្ម ចំនួនសហគ្រិនឬអ្នកគ្រប់គ្រងធំៗក្នុងក្រុមហ៊ុនជាស្រ្តី គេអាចសង្កេតឃើញថាមានការកើនឡើងគួរកត់សម្គាល់។ អ្វីដែលកាន់តែពិសេសទៀតដោយការស្រាវជ្រាវមួយធ្វើឡើងដោយធនាគារវិនិយោគHSBC បានរកឃើញថាសហគ្រិនស្រ្តី គឺមានអាជីវកម្មរបស់ពួកគេជោគជ័យក្នុងអត្រាដ៏ច្រើនពិសេសក្នុងតំបន់អាស៊ី។ ទន្ទឹមនឹងនោះក៏មានស្ត្រីសហគ្រិនអាស៊ីឆ្លាតវៃមួយចំនួនត្រូវបានមហាជនទាំងក្នុងប្រទេស និងក្រៅប្រទេសកោតសរសើរទាំងការដឹកនាំអាជីវកម្មនិងគំនិតច្នៃប្រឌិតរបស់ពួកគេ រហូតដល់ចាត់ទុកជាបុគ្គលគំរូទៀតផង។ ជាឧទាហរណ៍មួយក្រមាប៉ុស្តិ៍ សូមលើកឡើងពីសហគ្រិនស្ត្រីឆ្នើមហ្វីលីពីនមួយរូបគឺលោកស្រី Reese Fernandez-Ruiz ដែលមនុស្សគ្រប់គ្នាមិនសរសើរមិនបាន៖
មនុស្សជាច្រើនអាចគិតថាអាជីវកម្ម គឺសម្តៅទៅលើតែប្រាក់ចំណេញតែមួយមុខប៉ុណ្ណោះប៉ុន្តែមិនដូច្នោះទេ។ តួយ៉ាង លោកស្រី Reese Fernandez-Ruiz ដែលបានទទួលពានរង្វាន់កាលពីឆ្នាំ២០១០ ពីកម្មវិធី Rolex's Young Laureate ជាកម្មវិធីដែលផ្តល់ថវិកាគាំទ្រលើសហគ្រិនភាព ដែលជួយដល់ភាពប្រសើរទៅដល់ពិភពលោកដែលក្នុងលោកស្រីបានដំណើរការក្រុមហ៊ុនឈ្មោះថា Rags2Riches ជាអាជីវកម្មជួយកែលម្អលើវិស័យបរិស្ថានដែលឆ្លើយតបទៅនឹងបញ្ហាផ្ទាល់នៅក្នុងប្រទេស របស់លោកស្រី។
អ្វីទៅដែលគួរឱ្យសរសើរលោកស្រីReese?
ជំនួសឱ្យការដំណើរការផលិតសំលៀកបំពាក់តាមបែបធម្មតាលោកស្រី Reese ជាមួយសហការីវ័យក្មេងផ្សេងទៀតបានគិតពីវិធីចាប់ផ្តើមអាជីវកម្មដែលឆ្លើយតបទៅនឹងបញ្ហាកើតឡើងពោលគឺបញ្ហាបរិស្ថាន។ ដែលនេះគឺមិនមែនផ្តោតលើតែប្រាក់ចំណេញតែមួយនោះទេ គឺមានគោលដៅធ្វើឱ្យពិភពលោកក្លាយជាកន្លែងដែលប្រសើរនិងជាទីគួររស់នៅ។
យើងអាចទាយខ្លះបានថាក្រុមហ៊ុនលោកស្រី នឹងធ្វើអ្វីប្រហាក់ប្រហែលទៅនឹងឈ្មោះក្រុមហ៊ុនរបស់គាត់។ នោះគឺការកែច្នៃឡើងវិញនូវក្រណាត់សំលៀកបំពាក់ដែលគេបោះចោលលែងត្រូវការ ទៅដោយមានបច្ចេកទេសលាយបញ្ចូលទៅនឹងសម្ភារៈ និងវត្ថុធាតុដើមធម្មជាតិមួយចំនួនផលិតចេញជាសម្ភារៈប្រើប្រាស់ទាន់សម័យ និងមានគុណភាពសម្រាប់បញ្ចេញលក់នៅតាមបណ្តាហាងលក់រាយនានា។ មិនត្រឹមតែជាផលិតផលជួយបរិស្ថានប៉ុណ្ណោះទេតែបានជួយគាំទ្រដល់ជីវភាពអ្នកស្រុកជាច្រើនក្នុងប្រទេសហ្វីលីពីន។
យ៉ាងណាមិញគំនិតបន្ថែមថ្មី មិនបានឈប់ស្ងៀមមួយកន្លែងឡើយ ក្រោយពេលបានទទួលគំនិតពីអ្នករចនាម៉ូដបែបទាន់សម័យ ក្រុមហ៊ុនរបស់សហគ្រិនស្រ្តីហ្វីលីពីនឆ្នើមរូបនេះបានបំប៉នជំនាញហត្ថកម្ម ដល់មនុស្សប្រមាណ៩០០នាក់ដែលភាគច្រើនមកពីតំបន់ក្រីក្រពីក្នុងប្រទេសហ្វីលីពីនមករួមគ្នា បម្លែងសំណល់សម្រាមដែលគេបោះចោលឱ្យក្លាយជាវត្ថុប្រើប្រាស់អាចលក់បានមានតម្លៃឡើងវិញដូចជាកាបូបដៃ ប្រអប់វ៉ែនតា និងឧបរករណ៍សង្ហារឹមផ្សេងៗទៀតផង។
មកទល់ពេលនេះក្រុមហ៊ុនរបស់លោកស្រី Reese បានរីកចម្រើនព្រមទាំងផ្តល់ការងារដល់បុគ្គលិកស្ត្រីប្រមាណ៣០០នាក់បន្ថែមទៀតផង។ ហើយអ្វីដែលគ្រប់គ្នាសរសើរលោកស្រីថែមទៀតនោះ គឺអ្វីដែលលោកស្រីបានលើកឡើងថា៖"ខ្ញុំមិនចង់ត្រឹមតែបង្កើតជីវភាពនិងចំណូលតែមួយមុខប៉ុណ្ណោះទេ តែខ្ញុំចង់បង្កើតនូវផលិតផលអ្វីដែលជួយដល់បរិស្ថានបានយូរអង្វែងហើយវាក៏ជាយុទ្ធសាស្រ្តឈ្នះឈ្នះសម្រាប់គ្រប់គ្នាផងដែរ"៕
