ការប្រកួតប្រជែងនៅក្នុងពាណិជ្ជកម្ម គឺសម្តៅទៅលើការដណ្តើមឧត្តមភាពក្នុងការលក់ផលិតផល ហើយការប្រកួតប្រជែងនេះត្រូវបានបែងចែកជា២ប្រភេទគឺ៖ ការប្រកួតប្រជែងពេញលេញ និងការប្រកួតប្រជែងផ្តាច់មុខ។
***កត្តានាំឱ្យមានការប្រកួតប្រជែង
ការប្រកួតប្រជែងកម្រិតខ្ពស់ គឺកើតឡើងនៅពេលដែលនៅលើទីផ្សារមានអ្នកផ្គត់ផ្គង់ ឬអ្នកលក់ផលិតផលដូចគ្នាមានចំនួនច្រើន។
ការប្រកួតប្រជែងផ្តោតលើផលិតផលមួយប្រភេទ ឬជំនាញឯកទេស នៅលើទីផ្សារអ្នកលក់ផលិតផលដូចគ្នាច្រើន ប៉ុន្តែផ្តោតទៅលើលក្ខណៈពិសេសខុសៗគ្នានៃផលិតផលដោយបំពេញតម្រូវការតូចៗនៅលើទីផ្សារ។
ការប្រកួតប្រជែងកម្រិតទាប ស្ថានភាពប្រកួតប្រជែងនោះកើតមាននៅពេលដែលនៅលើទីផ្សារមានអ្នកផ្គត់ផ្គង់ ឬលក់ផលិតផលដូចគ្នាមានចំនួនតែពីរ ឬបីប៉ុណ្ណោះ។
ការប្រកួតប្រជែងផ្តាច់មុខ គឺជាស្ថានភាពប្រកួតប្រជែងដែលនៅក្នុងឧស្សាហកម្មមានអ្នកផ្គត់ផ្គង់ ឬលក់ផលិតផលតែមួយ ឬផ្តាច់មុខតែឯង។ ជាទូទៅក្រុមហ៊ុនផ្តាច់មុខតែងទទួលប្រយោជន៍ពីការប្រកួតប្រជែង និងមានឥទ្ធិពលក្នុងការគ្រប់គ្រងថ្លៃផលិតផល។
***កម្លាំងប្រកួតប្រជែង
កម្លាំងប្រកួតប្រជែងនៃគូប្រជែងនៅលើទីផ្សារ៖ ត្រូវតែស្វែងយល់ឱ្យបានច្បាស់ពីគូប្រជែងដែលកំពុងប្រកួតប្រជែងនៅលើទីផ្សារ។
ការគំរាមកំហែងនៃគូប្រជែងដែលចូលថ្មី៖ ការគំរាមកំហែងរបស់គូប្រជែងដែលចូលថ្មីប្រសិនបើផលិតផលថ្មីរបស់ពួកគេបានទទួលជោគជ័យនៅពេលដំបូង។ ទីផ្សារខ្លះមានភាពងាយស្រួលក្នុងការជ្រៀតចូល ប៉ុន្តែទីផ្សារមានការពិបាកដោយហេតុមានរបាំងប្រកួតប្រជែងដែលធ្វើឱ្យគូប្រជែងចូលថ្មីមានការពិបាក។ របាំងប្រកួតប្រជែងមានដូចជា តម្រូវការលើធនធានសម្រាប់វិនិយោគមានកម្រិតខ្ពស់ ជាពិសេសធនធានហិរញ្ញវត្ថុ ធនធានមនុស្ស សំដៅលើបច្ចេកវិទ្យា និងបទពិសោធច្រើនឆ្នាំដើម្បីផលិតផលដែលចំណាយថ្លៃដើមតិច។
***ការប្រកួតប្រជែងនៅក្រៅប្រទេស
កើតឡើងនៅពេលដែលក្រុមហ៊ុនមួយចាប់ផ្តើមអាជីវកម្មផលិតផល និងលក់ផលិតផលនិងសេវាកម្មនៅទីផ្សារក្រៅប្រទេស។ ក្រុមហ៊ុនជាច្រើនបានពង្រីកអាជីវកម្មចេញទៅក្រៅប្រទេស។ទីផ្សារក្រៅប្រទេសជាទីផ្សារដែលគួរឱ្យចាប់អារម្មណ៍ នៅពេលដែលទីផ្សារទាំងនោះមានការលូតលាស់ខ្លាំងជាងទីផ្សារក្នុងស្រុក។
ការប្រកួតប្រជែងនៅក្រៅប្រទេសមានលក្ខណៈទូលំទូលាយ និងជារឿយៗបង្កើតឱ្យមាននូវទម្រង់ប្រកួតប្រជែង និងកម្លាំងប្រកួតប្រជែងថ្មីៗជាច្រើននៅលើទីផ្សារ។ និន្នាការប្រកួតបច្ចុប្បន្ននៅលើទីផ្សារក្រៅប្រទេសគឺឆ្ពោះទៅរកការបង្កើតសម្ព័ន្ធភាពជំនួយឬកិច្ចព្រមព្រៀងរវាងក្រុមហ៊ុនពីរ ឬច្រើនធ្វើអាជីវកម្មរួមគ្នាដើម្បីសម្រេចគោលដៅរួម។ កម្លាំងប្រកួតប្រជែងក្រៅប្រទេសជះឥទ្ធិពលទៅលើពាណិជ្ជកម្មពិភពលោកនិងធនធានរបស់ប្រទេសនីមួយៗហើយការប្រកួតប្រជែងនេះ គឺជំរុញឱ្យក្រុមហ៊ុននីមួយៗត្រូវតែខំប្រឹងដើម្បីជ្រៀតចូល និងប្រកួតនៅលើទីផ្សារក្រៅប្រទេស។
***ពេលខ្លះកើតមានអំពើនៃការប្រកួតប្រជែងមិនស្មោះត្រង់
អំពើនៃការប្រកួតប្រជែងណាដែលផ្ទុយពីគោលការណ៍នៃការអនុវត្តទៀងទាត់នៅក្នុងវិស័យឧស្សាហកម្មពាណិជ្ជកម្ម សេវាកម្មត្រូវចាត់ទុកថាជាការប្រកួតប្រជែងមិនស្មោះត្រង់(មាត្រា២២នៃច្បាប់ស្តីពី ម៉ាកពាណិជ្ជនាមនិងអំពើនៃការប្រកួតប្រជែងមិនស្មោះត្រង់)
ទង្វើទាំងឡាយដូចខាងក្រោមត្រូវចាត់ទុកថាបានបង្កើតនូវអំពើនៃការប្រកួតប្រជែងមិនស្មោះត្រង់៖១.ការបង្កើតឱ្យមានការភាន់ច្រឡំតាមមធ្យោបាយណាមួយជាមួយសហគ្រាស ជាមួយទំនិញឬជាមួយសកម្មភាពឧស្សាហកម្មពាណិជ្ជកម្ម ឬសេវាកម្មនៃគូប្រកួតប្រជែង។
២.ការពោលអះអាងមិនត្រឹមត្រូវក្នុងពាណិជ្ជកម្មដែលធ្វើឱ្យខូចកេរ្ត៍ឈ្មោះសហគ្រាស ទំនិញ ឬសកម្មភាពឧស្សាហកម្មពាណិជ្ជកម្ម ឬសេវាកម្មនៃគូប្រកួតប្រជែង។
៣.ការបញ្ជាក់ ឬការពោលអះអាងដែលបានប្រើប្រាស់នៅក្នុងពាណិជ្ជកម្មហើយដែលអាចធ្វើឱ្យសាធារណជនភាន់ច្រឡំអំពីប្រភេទដំណើរការផលិតលក្ខណៈ ភាពសមស្របសម្រាប់គោលបំណងរបស់គេឬបរិមាណនៃទំនិញ។ (មាត្រា២២នៃច្បាប់ស្តីពី ម៉ាកពាណិជ្ជនាមនិងអំពើនៃការប្រកួតប្រជែងមិនស្មោះត្រង់)។
ប្រភព៖នាយកដ្ឋានស្រាវជ្រាវផ្សព្វផ្សាយនិងបណ្តុះបណ្តាលច្បាប់ក្នុងវិស័យព្រហ្មទណ្ឌនៃក្រសួងយុត្តិធម៌
