រាជធានីភ្នំពេញ៖ ថ្ងៃទី ១៩ ខែកក្កដា ឆ្នាំ ២០២២ ឯកឧត្តម លឹម គានហោ រដ្ឋមន្រ្តីក្រសួងធនធានទឹក និងឧតុនិយម បានអនុញ្ញាតឱ្យឯកឧត្តម H.E Mr. MIYAZAKI Masao សមាជិកសភា និងជាអនុរដ្ឋមន្រ្តីក្រសួងកសិកម្មជប៉ុន និងសហការី ចូលជួបសម្ដែងការគួរសម និងពិភាក្សាការងារ ស្តីពីកិច្ចសហប្រតិបត្តិការ (គម្រោងជំនួយ) លើវិស័យធនធានទឹក នាទីស្តីការក្រសួង ។
ឯកឧត្តមរដ្ឋមន្រ្តី បានជម្រាបជូន ឯកឧត្តម H.E Mr. MIYAZAKI Masao អំពីសមិទ្ធផល និងការងារដែលក្រសួងសម្រេចបាន និងកំពុងអនុវត្ត ព្រមទាំងកិច្ចការងារចំពោះមុខក្នុងក្របខណ្ឌវិស័យធនធានទឹក និងឧតុនិយម ដើម្បីរួមចំណែកដោះស្រាយនូវបញ្ហាប្រឈមក្នុងបរិបទនៃបម្រែបម្រួលអាកាសធាតុ សំដៅធានានូវសន្តិសុខទឹកសម្រាប់បំពេញតម្រូវការប្រើប្រាស់ និងការអភិវឌ្ឍន៍ប្រកបដោយចីរភាព ។
ជាមួយគ្នានេះ ឯកឧត្តមរដ្ឋមន្រ្តី ក៏បានស្នើឯកឧត្តម H.E Mr. MIYAZAKI Masao ដែលជាអ្នកបច្ចេកទេសមានបទពិសោធន៍ និងធ្លាប់ជាជំនាញការប្រចាំក្រសួងធនធានទឹក និងឧតុនិយម ផងនោះ ធ្វើការពិចារណា និងជួយជម្រុញគម្រោងកែលម្អ និងស្តារឡើងវិញនូវប្រព័ន្ធស្រោចស្រព និងប្រព័ន្ធដោះទឹកភាគនិរតីរាជធានីភ្នំពេញ (CP-P14) ឲ្យឆាប់បានដំណើរការក្នុងពេលឆាប់ៗនេះ ។
ឯកឧត្តម H.E Mr. MIYAZAKI Masao បានបង្ហាញនូវសេចក្តីរីករាយ ដោយបានជួបពិភាក្សាការងារដោយផ្ទាល់ជាមួយឯកឧត្តមរដ្ឋមន្រ្តីនាពេលនេះ និងបានវាយតម្លៃខ្ពស់ចំពោះសមិទ្ធផលការងារលើវិស័យធនធានទឹក និងឧតុនិយម ដែលក្រសួងសម្រេចបាន ក៏ដូចជាកិច្ចការបន្តដែលត្រូវអនុវត្តក្នុងបេសកកម្មរួមចំណែកដល់ការអភិវឌ្ឍ និងការរីកលូតលាស់សេដ្ឋកិច្ចប្រទេសកម្ពុជាឲ្យបានកាន់តែប្រសើរថែមទៀត ។
ឯកឧត្តម H.E Mr. MIYAZAKI Masao បានជម្រាបជូនឯកឧត្តមរដ្ឋមន្រ្តី នូវការប្តេជ្ញាចិត្ត បន្តរួមចំណែកជួយរបស់រាជរដ្ឋាភិបាលជប៉ុន ដើម្បីធ្វើឲ្យសេដ្ឋកិច្ចកម្ពុជាមានការរីកចំរើន តាមរយៈការធ្វើយ៉ាងណាឲ្យមាននិរន្តរភាពសម្រាប់ប្រព័ន្ធស្បៀងអាហារ ការធ្វើឲ្យប្រសើរឡើងនូវបទដ្ឋានបច្ចេកទេសធារាសាស្រ្ត និងការផ្តល់ជំនួយផ្នែកបច្ចេកទេស ដោយជំនាញការដែលមានបទពិសោធន៍ ។
ពាក់ព័ន្ធនឹងគម្រោងកែលម្អ និងស្តារឡើងវិញនូវប្រព័ន្ធស្រោចស្រព និងប្រព័ន្ធដោះទឹកភាគនិរតីរាជធានីភ្នំពេញ (CP-P14) ឯកឧត្តម H.E Mr. MIYAZAKI Masao សន្យាថានឹងធ្វើការពិភាក្សាគ្នាជាមួយអង្គការ JICA ដើម្បីបន្តជម្រុញគម្រោងនេះឲ្យចេញជារូបរាងឡើង បន្ទាប់ពីការសិក្សាដំណាក់កាលទី ១ ដែលកុងស៊ុលតង់គម្រោង បានជ្រើសរើសយកអនុគម្រោងរលាំងជ្រៃ ស្ថិតក្នុងខេត្តកំពង់ស្ពឺ និងផ្នែកខ្លះនៃអនុគម្រោងកណ្តាលស្ទឹង-បាទី ស្ថិតក្នុងខេត្តកណ្តាល និងខេត្តតាកែវ សម្រាប់យកមកអនុវត្តការងារសាងសង់ ដែលមានថវិកាសរុបចំនួនជាង ៥១ លានដុល្លារអាមេរិក ។
នៅក្នុងដំណាក់កាលទី ២ កុងស៊ុលតង់គម្រោង បានជ្រើសរើសយកអនុគម្រោងស្លាគូ ស្ថិតក្នុងខេត្តតាកែវ អនុគម្រោងប្រឡាយ ៣៥ ស្ថិតក្នុងខេត្តកំពង់ស្ពឺ អនុគម្រោងស្រះប្រាំបី ស្ថិតក្នុងខេត្តកណ្តាល និងផ្នែកខ្លះនៃអនុគម្រោងកណ្តាលស្ទឹង-បាទី ស្ថិតក្នុងខេត្តកណ្តាល និងខេត្តតាកែវ សម្រាប់យកមកអនុវត្តការងារសាងសង់ ដែលត្រូវការថវិកាសរុបចំនួនជាង ៧០ លានដុល្លារអាមេរិក ។
