កញ្ញា Qing Ru-Lim
យើងប្រាកដជាធ្លាប់ដឹង ឮហើយ អំពីឆាតសម្រាប់ឆ្លើយឆ្លងសារ ទាក់ទងគ្នា ដែលមានតាំងតែទសវត្សឆ្នាំ៩០រហូតដល់ដើមឆ្នាំ២០០០ ដែលមានដូចជា Yahoo! Messenger MSN ហើយក្រោយមកការវិវឌ្ឍន៍បច្ចេកវិទ្យា កាន់តែរីកចម្រើនក៏មាន Apps ឆាតដូចជា Viber និងFacebook Messenger ជាដើម។
យ៉ាងណាមិញយុវតីដើមកំណើតនៅសឹង្ហបុរី គឺកញ្ញា Qing Ru-Lim ជាសហស្ថាបនិកនៃ Zopim ដែលជា Apps ផ្តោតសំខាន់លើការសម្រួលសារទំនាក់ទំនងក្នុងវិស័យសេវាអាជីវកម្មបានទទួលជោគជ័យខ្លាំង រហូតក្លាយជាសេដ្ឋីទាំងនៅវ័យក្មេងទៀតផង។
បទពិសោធខ្លះៗពីកញ្ញា Qing Ru-Lim
ជានិស្សិតផ្នែកទស្សនវិជ្ជានៃសាកលវិទ្យាល័យជាតិសឹង្ហបុរី ប៉ុន្តែក្តីស្រមៃយុវតីQing Ru-Lim ពុំមានបំណងចូលបម្រើការងារជាមន្រ្តីរដ្ឋនោះទេ តែចំណេះដឹងរបស់យុវតីសឹង្ហបុរីរូបនេះ បានអនុវត្តជោគជ័យទៅលើវិស័យអាជីវកម្មឯកជន។ ក្រោយពេល Lim បានជួបវិស្វករ៤រូប ដែលជាអ្នកអភិវឌ្ឍ គំនិតនៃ Apps ឆាត Zopim Lim ត្រូវបានវិស្វករសឹង្ហបុរីទាំង៤រូបនោះ អនុញ្ញាតឱ្យក្លាយជាសមាជិកនៃសហស្ថាបនិក Zopim។ ដោយសារភាពវៃឆ្លាត និងភាពក្លាហានក្នុងការនិយាយជាសាធារណៈ Lim ត្រូវបានជ្រើសជាតំណាង Zopim ទៅជួបក្រុមអ្នកវិនិយោគនៅ Silicon Valley ដែលជាបណ្តុំអ្នកវិនិយោគលើបច្ចេកវិទ្យាហើយទទួលលទ្ធផលយ៉ាងជោគជ័យ។
យ៉ាងណាមិញដំណើរផ្លូវក្នុងនាមជាសហគ្រិននៅវ័យក្មេង ពុំងាយស្រួលឡើយដោយក្រុមរបស់ Lim និងវិស្វករទាំង៤ ត្រូវធ្វើការក្នុងរយៈពេល៧ឆ្នាំ ដើម្បីអភិវឌ្ឍកម្មវិធីឆាត Zopimជាបន្តបន្ទាប់ ដោយមានប្រាក់ខែត្រឹម៥០០ដុល្លារ។ លទ្ធផលពីការប្រឹងប្រែង ការព្យាយាម៧ឆ្នាំ បានហុចផល នៅពេលដែលមានក្រុមហ៊ុនបច្ចេកវិទ្យាអាមេរិក បានទិញ Appsនេះ ក្នុងតម្លៃជាង៣០លានដុល្លារហើយបានធ្វើឱ្យសហគ្រិនសឹង្ហបុរីទាំង៥នាក់ ក្លាយជាសេដ្ឋី។ ដោយឡែកកម្មវិធី Zopim បានក្លាយជាចំណែកសំខាន់មួយក្នុងការផ្តល់ភាពងាយស្រួលក្នុងវិស័យទំនាក់ទំនងនៃការផ្តល់សេវាដល់អតិថិជន ដោយបានផ្តល់មុខងារឆ្លើយតបទៅកាន់អតិថិជនក្នុងទំនាក់ទំនងអាជីវកម្មប្រកបដោយប្រសិទ្ធិភាព។
កញ្ញា Chow Paredes
គ្រប់គ្នាអាចគិតថា ការលក់អចលនទ្រព្យ ពុំចាំបាច់មានជំនាញឬភាពច្នៃប្រឌិត ប៉ុន្តែកញ្ញាជនជាតិហ្វីលីពីន Chow Paredes មានទស្សនៈខុសប្លែកពីនេះ។ដោយពូកែខាងផ្នែកជំនាញទំនាក់ទំនង Chow បានអភិវឌ្ឍខ្លួនពីអ្នកលក់ធម្មតាទៅជាម្ចាស់ក្រុមហ៊ុនផ្តល់សេវាលក់អចលនទ្រព្យដ៏ជោគជ័យនៅប្រទេសហ្វីលីពីន។
បទពិសោធខ្លះៗពី កញ្ញា Chow Paredes
សហគ្រិនវ័យក្មេងជនជាតិហ្វីលីពីនរូបនេះ មានដើមកំណើតពីគ្រួសារជាមេធាវី ហើយយុវតីរូបនេះក៏នៅបន្តតាមលំអានគ្រួសារ ប៉ុន្តែគឺផ្តោតទៅលើ ការលក់ដែលជាចំណង់ចំណូលចិត្តរបស់នាង។ ដោយសារចំណូលចិត្តនិងបានប្រឡូកមានបទពិសោធជាអ្នកលក់អចលនទ្រព្យជាច្រើនឆ្នាំ កញ្ញា Chow បានចាប់ផ្តើមដំណើរការក្រុមហ៊ុនដោយខ្លួនឯងនៅឆ្នាំ២០១៣ ដែលមានឈ្មោះថា Zipmatch។
Zipmatch ដែលជាក្រុមហ៊ុនផ្តល់សេវាជួយដល់អ្នករកទិញអចលនទ្រព្យ ក៏ដូចជាវិនិយោគអចលនទ្រព្យបានផ្តោតសំខាន់ទៅលើគុណភាពសេវាជូនដល់អតិថិជន ហើយជាពិសេសក៏ផ្តល់ភាពងាយស្រួលតាមការផ្តល់សេវាដល់អតិថិជនលើផ្ទាំងបច្ចេកវិទ្យាអនឡាញ (Online platform) ដែលជាហេតុធ្វើឱ្យក្រុមហ៊ុននេះទទួលជោគជ័យនិងការសាទរពីអតិថិជន។
នៅឆ្នាំ២០១៥ តម្លៃរបស់ក្រុមហ៊ុនZipmatch បានកើនដល់ថ្លៃ ២.៥លានដុល្លារ ដែលធ្វើឱ្យម្ចាស់ក្រុមហ៊ុនវ័យក្មេងខាងលើទទួលភាពជោគជ័យ ហើយក្នុងនោះ Chow ក៏បានលើកឡើងជាគំនិតថា ការព្យាយាម បូករួមទាំងភាពវៃឆ្លាត និងច្នៃប្រឌិត ដោយផ្តោតលើគុណភាពសេវាជូនអតិថិជន គឺជាផ្លូវនាំទៅរកលទ្ធផលផ្លែផ្កាជាវិជ្ជមានដូចអ្វីដែលនាងកំពុងទទួលបាននេះ៕
