រាជធានីភ្នំពេញ៖ ការនាំចេញអង្កររបស់កម្ពុជា ក្នុងខែមករា ឆ្នាំ២០២១ ទៅកាន់ទិសដៅចំនួន២៨ប្រទេស សម្រេចបានជារួម ៣៤,២៧៣តោន គិតជាទំហំទឹកប្រាក់ ចំនួន ៣០.៧៦លានដុល្លារសហរដ្ឋអាមេរិក ដែលមានការថយចុះជារួម៣២.០៧%។
ការធ្លាក់ចុះនេះ ប្រទេសនៅក្នុងទ្វីបអឺរ៉ុប បានធ្លាក់ចុះជិត៦០% ខណៈដែលទីផ្សារប្រទេសចិន នៅតែបន្តមានភាពវិជ្ជមាន ពោលគឺកើតឡើង ជិត៨% បើប្រៀបធៀបនឹងខែមករា ឆ្នាំមុន។ នេះបើតាមរបាយការណ៍របស់ សហព័ន្ធស្រូងអង្ករកម្ពុជា។
ការធ្លាក់ចុះ នៃការនាំចេញអង្ករ ក្នុងខែមករានេះ សហព័ន្ធស្រូវអង្ករកម្ពុជា បានលើកពីមូលហេតុចម្បង គឺការដឹកជញ្ជូនតាមកបា៉ល់ ដោយកង្វះទូកុងតឺន័រសំរាប់អង្ករ ដែលជាទំនិញធ្ងន់ មិនមានកន្លែងផ្ទុកគ្រប់គ្រាន់ (Shipping Space) របស់កប៉ាល់ដឹកជញ្ជូនពីកំពង់ផែក្រុងព្រះសីហនុ (Pre-Courier) ទៅប្តូរនៅកប៉ាល់មេទៅអឺរ៉ុប (Mollier Vessel) និងតម្លៃទៀតសោតបានឡើងខ្ពស់ ដល់ទៅ៥ ដង នៃតម្លៃឆ្នាំមុន។
ចំពោះទីផ្សារប្រទេសចិន បានកាន់កាប់ចំណែក ៤៧.១៥% នៃការនាំចេញសរុប ដែលគិតជាបរិមាណ គឺមានចំនួន ១៦,១៦៣ តោន និងមានការកើនឡើង៧.៧% បើធៀបនឹងខែមករា ឆ្នាំ២០២០។
ចំពោះប្រភេទអង្ករនាំចេញក្នុងខែមករា ឆ្នាំ២០២១នេះ ឃើញថា ៨៧.៦៣% គឺជាចំណែករបស់អង្ករក្រអូប ដែលរួមមានទាំង ក្រអូបប្រណីតសែនក្រអូប អង្ករសរីរាង្គផ្កាម្លិះជាដើម៕
