មនុស្សគ្រប់តែងជួបរឿងនិងបញ្ហាក្នុងជីវិតផ្សេងៗគ្នា។ ប៉ុន្តែត្រង់ថា នៅពេលជួបបញ្ហាតើនៅតែបន្តដើរទៅរកគោលដៅនៅខាងមុខទៀតឬអត់? រឿងរ៉ាវមួយចំនួនពីអនាគតប្រធានាធិបតីថ្មីសហរដ្ឋអាមេរិកគឺលោក ចូ ប៊ៃឌិន ត្រូវបានសារព័ត៌មានលើកយកមកបង្ហាញពីដំណើរជីវិតរបស់លោកដែលត្រូវជួបនឹងរឿងរ៉ាវធំៗក្នុងជីវិតរបស់លោកពិសេសជារឿងរ៉ាវសោកនាដកម្មក្នុងជីវិត ប៉ុន្តែលោកមិនបោះបង់គោលដៅក្នុងកិច្ចការនយោបាយរបស់ខ្លួនឡើយ។ ហើយពេលខាងមុខឆាប់ៗនេះលោកនឹងក្លាយជាប្រធានាធិបតីទី៤៦ របស់សហរដ្ឋអាមេរិក។ តើជីវិតលោកបានជួបរឿងរ៉ាវអ្វីខ្លះតាមដានទាំងអស់គ្នា៖
១.ជីវិតនៅតែស៊ូទោះមានរឿងអ្វីកើតឡើងនៅតែបន្តដើរទៅគោលដៅ
ខែវិច្ឆិកាឆ្នាំ១៩៧២ នៅអាយុ៣០ឆ្នាំ លោក ប៊ៃឌិន ត្រូវជាប់ឆ្នោតជាសមាជិកសភាដោយសម្លេង៣ពាន់សម្លេង។ ត្រឹមរយៈពេល១ខែក្រោយពេលជោគជ័យក្នុងអាជីពរឿងរ៉ាវអាក្រក់ ក៏បានកើតឡើងលើខ្សែជីវិតលោកប៊ៃឌិន។
ខណៈពេលទៅរកទិញដើមឈើគ្រិស្មម៉ាស ភរិយារបស់លោក គឺលោកស្រីNeilia និងកូនស្រីលោកNaomi ត្រូវបានបាត់បង់ជីវិតដោយសារគ្រោះថ្នាក់ចរាចរណ៍។ កូនប្រុសទាំងពីររបស់លោកគឺ Beau និងHunter បានរងរបួសធ្ងន់ធ្ងរប៉ុន្តែពួកគេបានរួចពីសេចក្តីស្លាប់។
លោកប៊ៃឌិនដំបូងបានបដិសេធមិនទៅកាន់តំណែងជាសមាជិកសភាឡើយ។ ប៉ុន្តែក្រោយពេលសហការីរបស់លោកបានព្យាយាមលើកទឹកចិត្តលោកទើបលោកប៊ៃឌិន ព្រមទៅកាន់តំណែង។ លោកប៊ៃឌិន បានស្បថកាន់តំណែងដែលធ្វើឡើងនៅក្នុងបន្ទប់ព្យាបាលរបស់កូនប្រុសទាំងពីររបស់ខ្លួន។
លោកបានបន្តកិច្ចការងារនយោបាយ និងក្លាយជាប្រធានគណៈកម្មការយុត្ថាធិការនៃសភានៅឆ្នាំ១៩៨៧។
២.រៀនពីកំហុស
ឆ្នាំ១៩៨៨ប៊ៃឌិនបានចូលរួមប្រកួតប្រជែងជាបេក្ខភាពប្រធានាធិបតីប៉ុន្តែក្នុងរបាយការណ៍ត្រូវគេសើរើ ថាលោកកាលនៅសិក្សាថ្នាក់ច្បាប់ថាធ្លាប់បានចម្លងស្នាដៃពីគេ និងលទ្ធផលមិនប្រក្រតីនៃឯកសារពិន្ទុសិក្សារបស់លោកដែលធ្វើឱ្យយុទ្ធនាការឃោសនារបស់លោកមានបញ្ហា។ លោកក៏បានទទួលយកកំហុសទាំងនោះហើយសន្យានឹងបង្ហាញដោយឥតលាក់លៀម។
ពេលក្រោយៗគេបានសម្គាល់ថាលោកជាបុគ្គលសាធារណៈដែលមានភាពស្មោះត្រង់បំផុតមួយ។ ឆ្នាំ២០១៥លទ្ធផលរបាយការណ៍ផ្លូវការមួយចេញផ្សាយដោយសារព័ត៌មាន CBSនិង NewYork Times បានបង្ហាញឈ្មោះលោកប៊ៃឌិន ស្ថិតក្នុងបញ្ជីអ្នកនយោបាយដែលគួរទុកចិត្តបំផុត។
៣.ស្មារតីលះបង់ជាផ្នែកមួយនៃជីវិតអ្នក
នៅឆ្នាំ២០១៥សោកនាដកម្មមួយទៀតបានកើតឡើងលើលោកប៊ៃឌិនជាថ្មី គឺកូនប្រុសច្បងរបស់លោកឈ្មោះ Beauបានស្លាប់ ដោយសារមហារីកខួរក្បាលនៅអាយុ៤៦ឆ្នាំ។ សោកនាដកម្មផ្ទួនៗបានជះឥទ្ធិពលខ្លាំងក្នុងការសម្រេចចិត្តរបស់លោកជាក់ស្តែងការសម្រេចមិនចូលរួមជាបេក្ខភាពប្រធានាធិបតីនៅឆ្នាំ២០១៦ ដែលលោក បាននិយាយនៅពេលនេះថា"ជាការសោកស្តាយមួយផងដែរ"។
ប៉ុន្តែពេលនេះបុរសវ័យ៧៨ឆ្នាំរូបនេះ នៅតែសកម្មនឹងនយោបាយហើយកិច្ចការងាររបស់លោកក៏ធ្វើឡើងដោយសារឧទ្ទិសដល់មនុស្សជាទីស្រលាញ់របស់លោក។ ហើយកិច្ចការរបស់លោកប៊ៃឌិនមិនដែលនិយាយរួចទុកចោលនោះទេ។
អនាគតប្រធានាធិបតីសហរដ្ឋអាមេរិកទី៤៦បាននិយាយថា"បរាជ័យត្រង់ចំណុចណាមួយនៃជីវិតគឺជារឿង មិនអាចចៀសរួចប៉ុន្តែការចុះចាញ់ដោយមិនប្រឹងអស់សមត្ថភាពជារឿងមិនល្អនោះឡើយ"៕
