អ្នកលក់គឺជាមនុស្សម្នាក់ដែលបំពេញតម្រូវការផ្តល់គុណតម្លៃ បង្កើតដំណោះស្រាយ និងផ្តល់ផលចំណេញឬជាប្រយោជន៍ទៅដល់មនុស្សគ្រប់គ្នា។ ជាមួយគ្នានេះយើងក្រលេកទៅមើលវិធីនៃការផ្តល់ទាំងនោះ(ការលក់)គឺមានច្រើនយ៉ាងដោយមានតាំងពីការលក់អនឡាញ Live លក់ លក់រាយ លក់ដុំ-ល-។ តែយ៉ាងណា ឈ្មោះជាអ្នកលក់ក៏អាចស្វែងយល់នូវគ្រឹះនៃវិធីសាស្រ្តលក់ធំៗ៣ ដែលបានលើកឡើងដោយ លោកស៊ូ សាវឿន ជាគ្រូបណ្តុះបណ្តាលផ្នែកលក់ដើម្បីជាការពិចារណារសម្រាប់អនុវត្តទៅតាមកាលៈទេសៈ ឬស្របតាមលក្ខខណ្ឌបរិយាកាសដែលខ្លួននៅ៖
១.លក់ដោយផ្តោតលើផលិតផលជាធំ
តាំងពីសម័យមុនរហូតមកដល់បច្ចុប្បន្នអ្នកលក់ចូលចិត្តវិធីពេញនិយមមួយ គឺវិធីផ្តោតលើផលិតផលជាធំមានន័យថា អ្នកលក់មិនសូវសួរ មិនសិក្សា ឬមិនសូវស្តាប់អតិថិជនច្រើន។ កន្លែងនេះ បានន័យថាគ្រាន់តែដឹង ឬឮថាអតិថិជនចង់ទិញផលិតផល ឬសេវាកម្ម គាត់ក៏ចាប់ផ្តើមអួតពីផលិតផល ឬសេវាកម្មភ្លាមហើយពួកគាត់ក៏មិនខ្វល់ពីអតិថិជនថាចង់បានអ្វីចង់បានក្នុងកម្រិតណាឬក្នុងលទ្ធភាពប៉ុណ្ណានោះទេ។ ទោះជាយ៉ាងណា ក៏មកដល់សម័យបច្ចុប្បន្នវិធីសាស្រ្តនេះនៅតែពេញនិយមនិងគាំទ្រពីសំណាក់អតិថិជនដែលមានតម្រូវការ។
២.លក់ដោយផ្តោតលើតម្រូវការអតិថិជន
នេះជាវិធីថ្មីមួយដែលអ្នកលក់ដាក់ចិត្តពីអ្នកពូកែបង្ហាញនូវសេវាកម្ម ឬផលិតផល មកជាអ្នកពូកែសួរស្តាប់ និងផ្តល់ជាដំណោះស្រាយ។ ជាទូទៅ គេហៅវិធីនេះថាវិធីអ្នកលក់មិនលក់ផលិតផល ឬសេវាកម្មគឺលក់តែអ្វីដែលអតិថិជនត្រូវការឬចង់ទិញ។ ពួកគេមិននិយាយអ្វីដែលពួកគេចង់និយាយពួកគេនិយាយតែអ្វីដែលអតិថិជនចង់ស្តាប់ចង់ដឹង និងចង់យល់ប៉ុណ្ណោះ។
របៀបសំខាន់នៃវិធីនេះគឺអ្នកលក់ត្រូវសួរបណ្តើរស្តាប់បណ្តើរដោយបញ្ជាក់ក្នុងគោលបំណងពីរយ៉ាង៖
គោលបំណងទី១៖ ស្តាប់ឱ្យយល់ពីអ្វីដែលអតិថិជននិយាយដើម្បីកំណត់បញ្ហា និងតម្រូវការរបស់ពួកគេ។ក្រោយពេលកំណត់បញ្ហា និងតម្រូវការអ្នកលក់តែងតែចាក់ជម្រុញអតិថិជនឱ្យមើលកាន់តែច្បាស់ពិសេសធ្វើឱ្យពួកគេទទួលស្គាល់ថាបើមិនដោះស្រាយបន្ទាន់គេនឹងខាតបង់។ សរុបខ្លឹមសារគឺស្តាប់ដើម្បីលក់។
គោលបំណងទី២៖ ស្តាប់ដើម្បីបែងចែកកំណត់ចំណុចមិនចាំបាច់ពិសេសរឿងក្នុងចិត្តអតិថិជន។ គន្លឹះនៃចំណុចនេះគឺកំណត់ឱ្យបាននូវអ្វីដែលអ្នកលក់មិនគួរនិយាយព្រោះចៀសវាងការផ្តល់ព័ត៌មានឱ្យអតិថិជនច្រើនពេក។ ការផ្តល់ព័ត៌មានលើសភាពចាំបាច់អាចបណ្តាលឱ្យអតិថិជនច្រឡំ និងមិនច្បាស់គន្លឹះសំខាន់នៃផលិតផល ឬសេវាកម្ម។
៣.លក់ដោយផ្តោតលើបណ្តាញ
ប្រិយមិត្តប្រហែលជាធ្លាប់ឮ ពីពាក្យថា Network Marketing។ វិធីសាស្រ្តផ្តល់ផលល្អថែមទាំងមានភាពយូរអង្វែងបើអនុវត្តត្រឹមត្រូវតាមក្បួនខ្នាតរបស់វា។ តែផ្ទុយទៅវិញក្នុងផ្នត់គំនិតមួយភាគយល់ថាអ្នកអនុវត្តទ្រឹស្តីនេះជាក្រុមបោកប្រាស់។ វិធីសាស្រ្តរកស៊ីជោគជ័យគឺការរកស៊ីតាមបណ្តាញដូច្នេះបណ្តាញទីផ្សារមិនអាក្រក់ទេអាក្រក់គឺមនុស្សដែលប្រើវិធីនេះដើរបោកបញ្ឆោតអ្នកដទៃ។ វិធីសាស្រ្តបណ្តាញផ្តោតសំខាន់ពីរគឺបង្ហាញទំនុកចិត្តលើផលិតផលឬសេវាកម្មនិងបង្ហាញផលចំណេញរយៈពេលវែងដែលគេចូលចិត្តហៅថាចំណូលអកម្ម។ អតិថិជនមួយភាគធំចាប់អារម្មណ៍វិធីសាស្រ្តនេះមិនដោយសារពួកគេចូលចិត្ត ឬចង់បានផលិតផល ឬសេវាកម្មប៉ុន្តែផលប្រយោជន៍រយៈពេលវែង។ផលប្រយោជន៍រយៈពេលវែងនេះគឺជាផ្នែកមួយដ៏សំខាន់សម្រាប់ទាក់ទាញអតិថិជន។
សរុបវិញនៃវិធីសាស្រ្តទាំងបីអ្នកលក់ក៏មិនគួរភ្លេចសួរខ្លួនឯងថា៖
-ធ្វើដូចម្តេចដើម្បីឱ្យអតិថិជនចូលចិត្ត?
-ធ្វើដូចម្តេចដើម្បីឱ្យអតិថិជនគោរពរាប់អាន?
-ធ្វើដូចម្តេចដើម្បីឱ្យអតិថិជនជឿជាក់?
-ធ្វើដូចម្តេចដើម្បីឱ្យអតិថិជនយល់ថាអ្នកជាទីប្រឹក្សា?
-ធ្វើដូចម្តេចដើម្បីឱ្យអតិថិជនយល់ថាអ្នកកំពុងជួយគេ?
-ធ្វើដូចម្តេចដើម្បីឱ្យអតិថិជនសម្រេចចិត្តរកស៊ីជាមួយអ្នក?
-ធ្វើដូចម្តេចដើម្បីឱ្យអតិថិជនទិញពីអ្នក?
-ធ្វើដូចម្តេចដើម្បីឱ្យអតិថិជនពង្រីកបណ្តាញសម្រាប់អ្នក?
