សូមចូល Telegramក្រមាប៉ុស្ដិ៍ ទទួលបានអត្ថបទឆាប់រហ័ស
ជាឪពុកម្តាយពេលខ្លះយើងត្រូវឆ្លើយសំនួរកូនៗ ដែលពួកគេតែងឆ្ងល់នេះឆ្ងល់នោះជារឿងធម្មតា។ តាមធម្មជាតិរបស់កូនក្មេងៗតែងឆ្ងល់ច្រើនមិនថារឿងជំងឺរាតត្បាតសាកលកូវីដ-១៩ ការបិទសាលាហើយរៀនតាមប្រព័ន្ធអនឡាញ ឬគ្រោះថ្នាក់ធម្មជាតិដែលកើតឡើង។ ពិតណាស់ទាំងនោះជារឿងកើតឡើងពិតៗប៉ុន្តែអាចប្រាប់ពួកក្នុងន័យជាក្តីសង្ឃឹមថាបញ្ហាទាំងនោះនឹងមានដំណោះស្រាយ ហើយពួកគេក៏អាចចូលរួមដោះស្រាយបានបើទោះបីពួកគេនៅអាយុតិចក៏ដោយ អ្នកវិទ្យាសាស្រ្តអាមេរិកផ្នែកបរិស្ថាន និងជាអ្នកម្តាយពីររូបគឺលោកស្រីវេជ្ជបណ្ឌិតKatharine Hayhoe និងអ្នកស្រាវជ្រាវស្ត្រី Rosimar Rios-Berrios បានចែករំលែកជាចំណុចដូចខាងក្រោម៖
១.ចាប់ផ្តើមពីការស្តាប់
ចំណុចចាប់ផ្តើមដំបូងនោះគឺហោចណាស់យើងត្រូវស្វែងយល់ដោយខ្លួនឯងជាមុនសិនថា តើយើងមានអារម្មណ៍បែបណាចំពោះគ្រោះធម្មជាតិនោះ ហើយអ្នកអាចព្យាយាមស្តាប់កូនៗអ្នករៀបរាប់នូវអ្វីដែលគេរៀបរាប់ប្រាប់អារម្មណ៍គេដល់អ្នក ហើយត្រលប់មកវិញអ្នកជួយពួកគេឱ្យនឹកឃើញពីអ្វីដែលពួកគេនៅតែអាចជួយដល់បរិស្ថាននៅក្នុងវ័យរបស់ពួកគេ។
២.បន្តស្រាវជ្រាវរៀនសូត្រ
ងារជាឪពុកម្តាយអ្នកត្រូវទទួលស្គាល់ថាជារឿងពិបាកពិសេសត្រូវឆ្លើយសំនួរកូនៗ ដែលពេលខ្លះជាសំនួរពិបាកដែលសឹងមិនអាចឆ្លើយបាន។ យ៉ាងណាមិញអ្នកអាចពិចារណាថ្លឹងថ្លែងឆ្លើយតបទៅពួកគេនៅក្នុងកម្រិតមួយដែលពួកគេអាចយល់បានទៅតាមសមត្ថភាពដែលអ្នកដឹង ហើយទន្ទឹមនឹងនោះអ្នកក៏នៅតែអាចស្រាវជ្រាវជាចំណេះដឹងបន្តដើម្បីអាចបកស្រាយប្រាប់កូនៗ។ ទាំងនេះអ្នកបានជាចំណេះដឹងផង និងបានប្រាប់ជាពន្លឺដល់អ្នកជំនាន់ក្រោយផង។
៣.ផ្សារភ្ជាប់នឹងធម្មជាតិ
អ្នកអាចដឹកនាំកូនៗអ្នកឱ្យទៅលេងខាងក្រៅដោយមានបរិស្ថានធម្មជាតិនៅជុំវិញ។ តាមការសិក្សាក៏បានបង្ហាញថាក្មេងៗដែលបានលេងខាងក្រៅគឺមានទំនោរចាប់អារម្មណ៍នឹងស្រលាញ់ថែរក្សាធម្មជាតិដូចមនុស្សធំដែរ។ អាចនាំកូនៗទៅជិះកង់ខាងក្រៅ ឬទៅលេងឧទ្យានជាតិដូចនេះក្មេងៗអាចមានបទពិសោធផ្សារភ្ជាប់នឹងធម្មជាតិ។ គួរបញ្ជាក់ដែរថាលទ្ធផលស្រាវជ្រាវបែបវិទ្យាសាស្រ្តជាច្រើនបង្ហាញថាក្មេងៗ ដែលបានទៅរៀនសង្កេតនិងនៅទីកន្លែងធម្មជាតិគឺនាំឱ្យសុខមាលភាពពួកគេបានល្អ និងមានគំនិតច្នៃប្រឌិត។
៤.ដឹកនាំកូនៗឱ្យចេះធ្វើ
ពិតណាស់ពេលខ្លះកូនៗរបស់អ្នកបានដឹងហើយអំពីអ្វីទៅជាការប្រែប្រួលអាកាសធាតុ ឬគ្រោះធម្មជាតិប៉ុន្តែពេលខ្លះពួកគេក៏មិនទាន់បានដឹងពីរបៀបដែលអាចចូលរួមដោះស្រាយលើបញ្ហានេះនោះទេ។ អ្នកអាចបង្កើតឱកាសឱ្យកូនៗចូលរួមដោះស្រាយក្នុងបញ្ហាបរិស្ថានឧទាហរណ៍ដូចជាការចូលរួមក្នុងឱកាសកម្មវិធីដាំដើមឈើ ឬកម្មវិធីក្នុងសាលាឬអង្គការ ដែលផ្តល់ឱកាសឲ្យក្មេងៗបានស្វែងយល់រៀនសូត្រ និងចូលរួមជាសកម្មភាពដោះស្រាយបញ្ហាបរិស្ថានតាមសមត្ថភាពដែលពួកគេមានជាចំណុចមួយដែលអ្នកអាចធ្វើបាន៕
