មនុស្សជាច្រើនចូលចិត្តធ្វើការងារទាំងឡាយណាដែលងាយស្រួល មានភាពទាក់ទាញ ឬធ្វើឱ្យចិត្តរីករាយជាដើម តែការធ្វើការងារប្រភេទនេះមិនប្រាកដថា ធ្វើឱ្យគាត់រីកចម្រើនបានល្អនោះទេ ព្រោះការងារដែលធ្វើឱ្យមនុស្សអភិវឌ្ឍជាច្រើន ជាការងារលំបាកហើយមិនសូវមានមនុស្សចូលចិត្តធ្វើនោះទេ។
អគ្គនាយកក្រុមហ៊ុន Anussa Event Planer លោក សេង ពិសិដ្ឋ បានថ្លែងនៅក្នុងកម្មវិធី Ignite Phnom Penh ថា ក្នុងការរស់នៅជាក់ស្តែងគ្មានរបស់ល្អ ឬរឿងអស្ចារ្យណាដែល បានមកដោយឥតគិតថ្លៃនោះទេ ហេតុនេះដើម្បីទទួលបានទ្រព្យសម្បត្តិ ក៏ដូចជាតម្លៃអ្វីមួយ យើងត្រូវតែធ្វើអ្វីមួយដើម្បីប្តូរយកវាមក។ លោកថារឿងរ៉ាវអ្វីៗទាំងអស់ក្នុងពិភពលោកនេះ គឺស្ថិតក្នុងប្រព័ន្ធនៃការទូទាត់។ ដូច្នេះ ដើម្បីទទួលបានចំណូល យើងត្រូវតែមានអាជីវកម្ម ឬសមត្ថភាពការងារ ដើម្បីមានលទ្ធភាពស្រូបយកចំណូលទាំងអស់នោះមកក្នុងជីវិតយើង។ បន្ថែមពីលើនេះ ដើម្បីទទួលបានកិត្តិយស និងការឱ្យតម្លៃ លុះត្រាតែយើងមានសមត្ថភាព ដើម្បីបង្កើតរឿងដែលគួរឱ្យគេគោរព ហើយគន្លឹះដែលអាចធ្វើឱ្យយើងទទួលបានជោគជ័យ គឺត្រូវធ្វើខ្លួនជាមនុស្សសំខាន់និងមានតម្លៃគ្រប់គ្រាន់ ដើម្បីសមនឹងទទួលរបស់ទាំងអស់នោះ។
លោក សេង ពិសិដ្ឋ បានបញ្ជាក់ថា៖«ការងារដែលធ្វើឱ្យយើងក្លាយជាមនុស្សសំខាន់ និងមានតម្លៃគឺជាប្រភេទការងារដែលមនុស្សភាគច្រើនចង់គេចចេញ ឬមិនចង់ធ្វើ។ ហេតុនេះ បើសិនជាមនុស្សគ្រប់គ្នាអាចធ្វើរឿងលំបាកបានមនុស្សទាំងនោះសុទ្ធតែជោគជ័យហើយ តែជាទូទៅមនុស្ស 70% ទៅ80%មិនចង់ធ្វើរឿងដែលលំបាកៗនោះទេ»។
សហគ្រិនខាងលើបានបញ្ជាក់ផងដែរថា ប្រសិនបើយើងចង់ក្លាយជាមនុស្សសំខាន់ លុះត្រាតែយើងមានសមត្ថភាពធ្វើ ការងារលំបាកៗ ឬធ្វើការងារដែលគ្រប់គ្នាមិនចង់ធ្វើ។ ពេលខ្លះការធ្វើការការងារដែលគេខ្ជិល នឹងធ្វើអាចជាឱកាសយ៉ាងសំខាន់ក្នុងការធ្វើឱ្យយើងក្លាយជាមនុស្សសំខាន់និងត្រូវបានគេចាប់អារម្មណ៍ ព្រោះនៅពេលដែលយើងអាចធ្វើការងារទាំងអស់នោះបាន គ្រប់គ្នានឹងមើលឃើញតម្លៃពិតប្រាកដរបស់យើងហើយសម្មិទ្ធិផលដែលយើងទទួលបានក៏ជាសម្មិទ្ធិផលប្លែកខុសពីអ្នកដទៃដែរ។ ចរន្តនេះនឹងធ្វើឱ្យយើងក្លាយជាមនុស្សលេចធ្លោរ ឬក្លាយជាអ្នកដែលគេត្រូវការសំខាន់បំផុតក្នុងចំណោមអ្នករាល់គ្នាដែលនៅជុំវិញខ្លួនយើង៕
