មុនពេលសម្រេចចិត្តដើរចូលក្រុមហ៊ុនណាមួយ មនុស្សម្នាក់ៗតែងផ្តោតសំខាន់លើប្រភេទការងារ កម្រិតរបស់ក្រុមហ៊ុន និងបរិយាកាសផ្សេងៗជុំវិញរបស់ការងារទាំងអស់នោះជាដើម។ តែជាក់ស្តែង មានពេលខ្លះមនុស្សទទួលបានក្រុមហ៊ុនដែលខ្លួនពេញចិត្ត ហើយថែមទាំងស្ថិតក្នុងតួនាទី ដែលខ្លួនស្រឡាញ់ថែមទៀត បែរជាដាក់ពាក្យសុំឈប់ទៅវិញ។
ពាក់ព័ន្ធនឹងបញ្ហានេះលោក Christopher Lee អ្នកជំនាញអភិវឌ្ឍមនុស្សបានលើកឡើងថា បុគ្គលិកល្អដើរចេញពីក្រុមហ៊ុនភាគច្រើន មិនមែនពួកគាត់ស្អប់ការងារ និងក្រុមហ៊ុនទេតែដោយសារតែពួកគាត់មិនពេញចិត្តការដឹកនាំរបស់ថ្នាក់ដឹកនាំ។ លោកថា ការដឹកនាំមានសារៈសំខាន់ខ្លាំងណាស់ សម្រាប់វាសនារបស់ក្រុមហ៊ុនទាំងមូល ព្រោះកាលណាស្ថាប័នមួយមិនមែនការដឹកនាំល្អ បុគ្គលិកច្បាស់ជាមិនទទួលបានសេចក្តីសុខនោះទេ។
អ្នកធ្វើការងារទាំងអស់សុទ្ធតែចង់អភិវឌ្ឍសមត្ថភាព និងអនាគតជាមួយស្ថាប័នដែលមានការគ្រប់គ្រងដឹកនាំល្អ ហេតុនេះកាលណាគ្មានការដឹកនាំល្អ ពួកគេនឹងយល់ថាប្រាក់ខែខ្ពស់ និងតួនាទីល្អជាដើម ច្បាស់ជាលែងមានតម្លៃទៀតហើយ ព្រោះពួកគេអាចធ្វើការងារក្នុងសម្ពាធជារៀងរាល់ថ្ងៃ។ មានអ្នកខ្លះទៀតដោយសារតែការដឹកនាំមិនល្អ ក៏សម្រេចចិត្តឈប់ទៅវិញ ព្រោះពួកគេមើលមិនឃើញភាពរីកចម្រើនទៅថ្ងៃខាងមុខ។
អ្នកជំនាញអប់រំខាងលើបានបញ្ជាក់ផងដែរថា ផ្ទុយមកវិញកាលណាមានការគ្រប់គ្រង ឬការដឹកនាំល្អ ពីអ្នកដឹកនាំស្ថាប័នទោះបីជាស្ថាប័ននោះមិនធំ ឬល្បីល្បាញក៏ដោយក៏បុគ្គលិកល្អៗជាច្រើនចាប់អារម្មណ៍ចង់ចូលមកអភិវឌ្ឍជាមួយគ្នាដែរ។ ការដឹកនាំល្អអាចបង្ហាញឱ្យឃើញពីអនាគតយ៉ាងត្រចះត្រចង់ ហេតុនេះមនុស្សមានសមត្ថភាពស្ទើរគ្រប់គ្នា សុទ្ធតែរីករាយនឹងឆ្លងកាត់ដំណាក់កាលលំបាកដោយភាពជឿជាក់ខ្ពស់ថា នឹងអាចទទួលបានការអភិវឌ្ឍនៅថ្ងៃអនាគតប្រកបដោយភាពវិជ្ជមាន។
ជារួមសម្រាប់អ្នកគ្រប់គ្រងស្ថាប័ន ទន្ទឹមនឹងយកចិត្តទុកដាក់លើផលចំណេញការពង្រីកអាជីវកម្ម ឬការផ្តល់ឱ្យផ្សេងៗទៀតចំពោះបុគ្គលិក ចាំបាច់ត្រូវតែអភិវឌ្ឍវិធីសាស្រ្តដឹកនាំឱ្យបានល្អជាមុនសិនដើម្បីឱ្យបុគ្គលិកគ្រប់គ្នា មានភាពកក់ក្តៅនិងមានទឹកចិត្តកាន់តែខ្លាំង ដើម្បីចូលរួមអភិវឌ្ឍទាំងអស់គ្នា៕
