ខេត្តត្បូងឃ្មុំ៖ ថ្ងៃទី១៥ ខែសីហា ឆ្នាំ២០២២ ឯកឧត្តម ឈា ប៊ុនរិទ្ធ អគ្គនាយកកិច្ចការបច្ចេកទេស រួមដំណេីរដោយប្រធាននាយកដ្ឋានជំនាញពាក់ព័ន្ធ បានចុះពិនិត្យជាក់ស្តែងការជីកប្រឡាយកាត់ក្បាលទំនប់នៃប្រព័ន្ធធារាសាស្ត្រទំនប់កំពង់រាំង ស្ថិតនៅព្រំប្រទល់រវាង ស្រុកតំបែរ ខេត្តត្បូងឃ្មុំ និងស្រុកឆ្លូង ខេត្តក្រចេះ ដែលបានសាងសង់ឡេីងក្នុងសម័យ ប៉ុល ពត និងធ្វេីការជួសជុលស្តារឡេីងវិញដោយក្រសួងធនធានទឹក និងឧតុនិយមនៅឆ្នាំ ២០១១ សម្រាប់ការស្រោចស្រពលេីដីស្រែប្រាំងចំនួន ០៤ឃុំ ក្នុងស្រុកឆ្លូង ព្រមទាំងផ្នែកខ្លះទៀតនៃស្រុកតំបែរ លេីផ្ទៃដីសរុបប្រមាណ ១.០០០ហិកតា។
គោលបំណងនៃបេសកកម្មនេះ គឺដឹកនាំក្រុមការងារបច្ចេកទេសក្រសួង និងមន្ទីរទាំងពីរ ចុះពិនិត្យទីតាំងសំណើសុំ សំណង់ទ្វារចំនួន០២ កន្លែង ដែលជាតម្រូវការ និងសំណូមពរចាំបាច់របស់របស់ប្រជាពលរដ្ឋនៅភូមិកំពង់រាំង និងភូមិស្រែខ្សាច់ ព្រមទាំងដេីម្បីសិក្សាបច្ចេកទេសសមិទ្ធិលទ្ធភាពធ្វេីសំណង់ទ្វារដោះទឹក លេីទំនប់ដែលមានស្រាប់ សម្រាប់បង្ហូរទឹកចេញជួយដោះស្រាយនូវផលប៉ះពាល់ដោយជំនន់ទឹកភ្លៀង ក៏ដូចជាសម្រួលដល់ការងារបង្កបង្កេីនផលស្រូវរដូវប្រាំងរបស់ប្រជាកសិករក្នុងតំបន់នោះផងដែរ។
ឯកឧត្តមប្រធាន ក៏បានបញ្ជាក់ផងដែរថា ការងារនេះជាប្រយោជន៍រួមអន្តរខេត្ត ដូចនេះអាចសម្រេចទៅបានទាល់តែមានកិច្ចសហការពីប្រជាពលរដ្ឋក្នុងតំបន់ រដ្ឋបាលគ្រប់ជាន់ថ្នាក់ រួមទាំងមន្ទីរទាំងពីរ និងនាយកដ្ឋានជំនាញពាក់ព័ន្ធផងដែរ។
គិតចាប់តាំងពីដើមឆ្នាំ រហូតមកដល់ថ្ងៃទី១៥ ខែសីហា ឆ្នាំ២០២២ នេះ ខេត្តក្រចេះទទួលបានបរិមាណទឹកភ្លៀងសរុបប្រមាណ ១.៣០០មីល្លិម៉ែត្រ ចំណែកកម្រិតកម្ពស់ទឹកអតិបរមានៅស្ថានីយជលសាស្ត្រទន្លេមេគង្គ-ក្រចេះគឺ ១៩ម៉ែត្រ (ថ្ងៃទី១២ ខែសីហា ឆ្នាំ២០២២)។ ស្ថិតនៅកម្រិតកម្ពស់ទឹកនេះ ទឹកបានហូរចូលព្រែកធំចំនួន០៥ និងគ្រប់ព្រែកតូចៗទាំងអស់ទូទាំងខេត្តក្រចេះ។
ឯកឧត្តមអគ្គនាយក និងក្រុមការងារ ក៏បានផ្តាំផ្ញេីដល់មន្ទីរធនធានទឹក និងឧតុនិយមខេត្តក្រចេះ ត្រូវចុះមកពិនិត្យស្ថានីយជលសាស្ត្រនីមួយៗឲ្យបានជាទៀងទាត់ និងសហការជាមួយនាយកដ្ឋានជំនាញពាក់ព័ន្ធ ដោយបង្កេីតគ្រុបក្រុមការងារ ក្នុងការចែករំលែកនូវព័ត៌មាន ដេីម្បីអាចគ្រប់គ្រងស្ថានការនានាបានទាន់ពេលវេលាផងដែរ៕
