សូមចូល Telegram ក្រមាប៉ុស្ដិ៍ ទទួលបានអត្ថបទឆាប់រហ័ស
អារម្មណ៍តានតឹងតែងកើតមានឡើងលើមនុស្សម្នាក់ៗ និងទៅលើមនុស្សគ្រប់ៗគ្នា ដោយសារឥទ្ធិពលពីសកម្មភាពប្រចាំថ្ងៃបរិយាកាសជុំវិញខ្លួនផ្សេងៗ។ យ៉ាងណាមិញ យើងក៏មានវិធីដោះស្រាយបន្ថយភាពតានតឹងនោះតាមបែបផ្សេងៗ រៀងៗខ្លួនដែរជាមួយចំនុចខាងក្រោមនេះជាវិធីខ្លះៗ ដែលលោកRick Hanson អ្នកជំនាញផ្នែកចិត្តសាស្រ្តនៅសាកលវិទ្យាល័យCalifornia,Berkeley បានផ្តល់ជាអនុសាសន៍ជាការបន្ថយភាពតឹងតែងដូចខាងក្រោម៖
១.គួរចាប់អារម្មណ៍ដឹងនៅពេលណាអ្នកជួបអារម្មណ៍ហត់នឿយខ្លាំង
គឺជាចំណុចទីមួយដែលអ្នកគួរធ្វើនិងគួរចាប់អារម្មណ៍ព្រោះថា អារម្មណ៍ហត់នឿយតានតឹង ឬធុញទ្រាន់ក្នុងកម្រិតមួយអាចនាំឱ្យសកម្មភាពអ្នកច្រើនធ្វើខុស ឬមិនសមគួរណាមួយកើតឡើង។ ក្រោយពីដឹងថាអ្នកជួបអារម្មណ៍ខាងលើនេះជំហានបន្ទាប់គឺ យើងអាចបន្លប់ ឬនាំអារម្មណ៍ទៅធ្វើអ្វីផ្សេងដែលនាំឱ្យស្រស់ស្រាយចិត្តដូចជាការដកឃ្លាសម្រាកកាយសម្រាកចិត្ត ឬមួយការសម្រាកលំហែនៅទីស្រលះមានខ្យល់អាកាសបរិសុទ្ធ ឬមួយវិធីសាស្រ្តល្អៗផ្សេងទៀតរបស់អ្នកដែលធ្លាប់មានប្រសិទ្ធិភាពជាដើម។
២.ចាប់អារម្មណ៍អ្វីអ្នកកំពុងធ្វើអ្វី
នៅវិនាទីនេះតើអ្នកកំពុងធ្វើអ្វី? ដើម្បីជាអ្វី? វាជាប្រយោជន៍ល្អឬទេ?ជាសំនួរជំនួយដើម្បីដាស់ស្មារតីអ្នកប្រសិនបើអ្នកកំពុងគិតអ្វីមួយខុស ឬជារឿងមិនមានប្រយោជន៍សម្រាប់អ្នកនិងសម្រាប់អ្នកដទៃពិសេសសម្តៅលើការបណ្តោយចិត្តឱ្យគិតលើអារម្មណ៍តានតឹងម៉ួហ្មងនោះឯង។ យើងត្រូវបញ្ចៀសមិនឱ្យកើតមានជាផលវិបាកដល់ខ្លួនឯងផង និងជះឥទ្ធិពលដល់អ្នកដទៃផង។
៣.រំលឹកខ្លាចភ្លេចអ្វីមួយ
អាចមានពេលឆ្លៀតកត់ទុកនូវរឿងត្រូវធ្វើប្រចាំថ្ងៃខ្លះចៀសវាងការភ្លេចពិសេសលើការប្រហែសលើសកម្មភាពណាមួយដែលនាំឱ្យខូចកិច្ចការងារ។ ដូចនេះ គួរឆ្លៀតរំលឹកខ្លួនឯងខ្លះថាបានធ្វើអ្វីហើយមកទល់ពេលនេះ និងនៅមិនទាន់បានធ្វើអ្វីខ្លះដែលអាចសម្រាលកិច្ចការអ្នកមួយកម្រិតផងដែរតាមរយៈការកត់ត្រាទុក។
៤.ផ្តល់រង្វាន់ដល់ខ្លួនឯងខ្លះសម្រាប់ការបំពេញការងារបានល្អ
ការងារមិនរាប់ថាជាជំនាញអាជីព ឬការងារផ្ទះអ្នកក៏អាចផ្តល់ជារង្វាន់ដល់ខ្លួនអ្នកប្រសិនបើបានធ្វើការងារនោះល្អ។រង្វាន់នឹងបានលើកទឹកចិត្តអ្នកឱ្យស្រស់ស្រាយបន្ថយភាពតានតឹងក្នុងខ្លួន និងជម្រុញចិត្តសម្រាប់ទៅបំពេញកិច្ចការខាងមុខបន្ទាប់ទៀត ហើយក៏ត្រូវប្រាកដដែរថារង្វាន់នោះគឺមានប្រយោជន៍មិនមែនផ្តល់ផលមិនល្អនោះទេ។
៥.រៀនប្រឈមនឹងបញ្ហា
នៅពេលមួយអ្នកជឿជាក់ជាមួយខ្លួនឯងថាអ្នកអាចប្រឈមនឹងបញ្ហាតានតឹងនោះបាន ដូច្នេះអ្នកក៏គួររៀនដោះស្រាយបានភ្លាមៗខ្លះផងដែរ ព្រោះការរៀនដោះស្រាយនេះនឹងធ្វើឱ្យអ្នករឹងមាំជាប្រចាំទៅនឹងបញ្ហាផ្សេងទៀត។ ប៉ុន្តែទន្ទឹមនឹងនេះអ្នកក៏គួររៀនថ្លឹងថ្លែងនឹងសមត្ថភាពខ្លួន ដោយត្រូវដោះស្រាយសមស្របទៅតាមពេលវេលាត្រឹមត្រូវតាមកាលៈទេសៈ និងត្រូវចេះសម្រាកបន្ថយភាពតានតឹងខ្លះទើបអាចបំពេញកិច្ចការនៅសល់ផ្សេងៗទៀតបានប្រសិទ្ធិភាព៕
