ខេត្តបាត់ដំបង៖ លោកតា ប្រាក់ ហ៊ាប ជាកសិកររស់នៅភូមិចំការអូរ ឃុំកន្ទឺ២ ស្រុកបាណន់ខេត្តបាត់ដំបង។ ពីកសិករ ដែលមានដីស្រែតែ១០រ៉ៃ ដែលទទួលបានប្រាក់ចំណូលត្រឹមតែ៣លានរៀលក្នុងមួយឆ្នាំ។
បច្ចុប្បន្ននេះ រូបគាត់ក្លាយជាកសិករចិញ្ចឹមមាន់ស្រែយកសាច់ និងភ្ញាស់កូនមាន់លក់តាមរយៈការផ្តល់នឹងការគាំទ្រមួយផ្នែក មានជាសម្ភារៈកសិកម្មនិងសេវាបច្ចេកទេស ពីមន្ទីរជំនាញខេត្តបាត់ដំបង នៃកម្មវិធីផ្សព្វផ្សាយ ASPIRE កាលពីឆ្នាំ២០១៨។ លោកពូ ប្រាក់ ហ៊ាប ក៏ទទួលបានការបណ្តុះបណ្តាល លើបច្ចេកទេសចិញ្ចឹមមាន់ និងភ្ញាស់កូនមាន់មានដូចជាការធ្វើចំណីការធ្វើទ្រុង ការពិនិត្យមើលស៊ុតការដាក់កម្រិតកំដៅនិងការចាក់វ៉ាក់សាំងជាដើម។
រូបគាត់បានបញ្ជាក់អោយដឹងដែរថា ភាពជោគជ័យរបស់គាត់បានមកដល់ពេលនេះគឺកើតចេញពីការទទួលបានការបណ្តុះបណ្តាលដែលធ្វើអោយរូបគាត់មានជំនាញច្បាស់លាស់ ហើយធ្វើអោយមាន់របស់គាត់មានភាពធន់ទៅនឹងជំងឺផ្សេងៗទាំងរដូវប្រាំងនិងរដូវភ្លៀង។
ក្រោយពីការផ្លាស់ប្តូររបរជាចំបង ពីការធ្វើស្រែមកការចិញ្ចឹមមាន់និងភ្ញាស់កូនមាន់វិញនោះ លោកពូ ប្រាក់ ហ៊ាប អាចទទួលបានប្រាក់ចំណូល ពីការលក់មាន់យកសាច់ និងកូនមាន់របស់គាត់រហូតដល់ទៅ៣០លានរៀល ក្នុងមួយឆ្នាំដោយចំណូលទាំងនេះ គឺរូបគាត់បានកាត់កងការចំណាយទាំងអស់រួមមានទាំងថ្លៃទិញចំណីមាន់ ទឹក ភ្លើងអគ្គីសនី ទិញពងមាន់ និងកំលាំងពលកម្មជាដើម៕
