ថ្លែងក្នុងមហាវិមានប្រជាជនចិន នៅចំពោះមុខមន្រ្តីបក្សកុម្មុយនិស្តចិនជាច្រើនរូបលោក ស៊ី បានប្តេជ្ញាថា នឹងបន្តបោះជំហានឆ្ពោះទៅមុខ ជាមួយគោលការណ៍កំណែទម្រង់សេដ្ឋកិច្ច នៃប្រទេសចិន ប៉ុន្តែលោកបានគូសបញ្ជាក់យ៉ាងច្បាស់ថា ទីក្រុងប៉េកាំង នឹងមិនងាករេពីប្រព័ន្ធគ្រប់គ្រង ដោយគណបក្សតែមួយ ឬក៏ទទួលបញ្ជាពីប្រទេសដទៃណាមួយដាច់ខាត។
ប្រារព្ធពិធីអបអរខួប ៤០ឆ្នាំ នៃគោលនយោបាយកំណែទម្រង់ និងបើកចំហជាប្រវត្តិសាស្រ្ដ លោក ប្រធានាធិបតីចិន ស៊ី ជិនពីង ក៏បានព្រមានថា ពុំមាននរណាមួយ អាចមកបង្គាប់បញ្ជាលើគន្លងផ្លូវអភិវឌ្ឍន៍សេដ្ឋកិច្ចរបស់ចិនបានឡើយ ។
ដោយមិនបានសំដៅចំៗ លើសហរដ្ឋអាមេរិក លោក ស៊ី ជិនពីង បានបន្តទៀតថា ចិនមិនបង្កការគំរាមកំហែងដល់ប្រទេសណាមួយនោះទេ ប៉ុន្តែលោកបានព្រមានច្បាស់ៗថា ប្រទេសចិន ក៏នឹងមិននៅស្ងៀមឲ្យគេរុញទៅរុញមកតាមចិត្តឡើយ។
គួរជម្រាបថា ឱកាសរំលឹកខួប ៤០ឆ្នាំ នៃគោលនយោបាយកំណែទម្រង់សេដ្ឋកិច្ចបើកចំហ ដែលផ្តួចផ្តើមឡើងដោយអតីតមេដឹកនាំចិនលោក តេង ស៊ានពីង កាលពីថ្ងៃទី១៨ ខែធ្នូ ឆ្នាំ១៩៧៨ បានប្រព្រឹត្តទៅចំពេលដែលចិនកំពុងស្ថិតក្នុងវិវាទការទូត និងសង្រ្គាមពាណិជ្ជកម្មជាមួយសហរដ្ឋអាមេរិក៕
