ប្រព័ន្ធបច្ចេកវិទ្យារីកចម្រើនឥតឈប់ឈរ ជាមួយគ្នានេះតាមការស្រាវជ្រាវរបស់នាយកដ្ឋានព័ត៌មានវិទ្យានៃក្រសួងមហាផ្ទៃក៏បានក្រើនរំលឹក ឱ្យសាធារណជនប្រុងប្រយ័ត្ននូវបទល្មើសឆបោកឬបន្លំផ្ទេរប្រាក់តាមរយៈប្រព័ន្ធធនាគារ។
ក្រុមការងារបច្ចេកទេសនៃក្រសួងបានលើកយកបទល្មើសបច្ចេកវិទ្យាដែលកំពុងផ្តោតគោលដៅលើគ្រឹះស្ថានហិរញ្ញវត្ថុនៃព្រះរាជាណាចក្រកម្ពុជា តួយ៉ាងដូចជាការឆបោកផ្ទេរប្រាក់ដោយប្រើប្រាស់វិស្វកម្មបណ្តាញសង្គម (Social Engineering) ការវាយប្រហារចូលប្រព័ន្ធលួចផ្ទេរប្រាក់(Banking System/Business LogicHacking) និងការកែ្លងបន្លំផ្សេងៗ។
-ការឆបោកផ្ទេរប្រាក់ដោយប្រើប្រាស់វិស្វកម្មបណ្តាញសង្គម(Social Engineering)៖ ឧក្រិដ្ឋជនប្រើប្រាស់បច្ចេកទេសឆបោកផ្សេងៗ(ឧទាហរណ៍៖ផ្សព្វផ្សាយកម្មវិធីរង្វាន់ផ្សេងៗតាមរយៈសារអេឡិចត្រូនិក ឬសារ SMSផ្តល់តំណភ្ជាប់ Phishing ឬបន្លំជាបុគ្គលិកធនាគារ។ល។) ដើម្បីលួងលោមម្ចាស់គណនីធនាគារផ្តល់នូវលេខកូដសម្ងាត់លេខកូដផ្ទេរប្រាក់ ឬលេខកូដផ្ទៀងផ្ទាត់(OTP) ឬធ្វើការផ្ទេរប្រាក់ទៅកាន់ឧក្រិដ្ឋជនក្នុងស្រុក ឬក្រៅប្រទេស។
-ការវាយប្រហារចូលប្រព័ន្ធលួចផ្ទេរប្រាក់ (Banking System/Business LoopholeHacking)៖ ឧក្រិដ្ឋជនបានប្រើប្រាស់ចន្លោះខ្វះខាតផ្នែកសន្តិសុខប្រព័ន្ធ(Internet/MobileBanking) កេងបន្លំតួនាទីកម្មវិធីប្រព័ន្ធធនាគារឬលួចចូលក្នុងគណនីអ៊ីម៉ែលសម្ងំលួចមើលការឆ្លើយឆ្លងស្តីពីការទូទាត់ប្រាក់និងបោកបញ្ឆោតជនរងគ្រោះផ្ទេរប្រាក់។
-ក្រៅពីបទល្មើសដូចរៀបរាប់ខាងលើក៏នៅមានករណីក្លែងបន្លំផ្សេងៗមួយចំនួនទៀតដែលបានប្រើប្រាស់ដោយឧក្រិដ្ឋជនតួយ៉ាង៖ ការបញ្ឆោតផ្ទេរប្រាក់តាមរយៈការទិញទំនិញអនឡាញការឆបោកក្នុងសកម្មភាពវិនិយោគ។ល។
សម្រាប់ករណីខាងលើនាយកដ្ឋានព័ត៌មានវិទ្យានៃក្រសួងមហាផ្ទៃក៏បានក្រើនរំលឹកឱ្យសាធារណជនឱ្យប្រុងប្រយ័ត្នចំពោះសកម្មភាពឆបោកទាំងនោះហើយអនុវត្តវិធីសាស្រ្តមួយចំនួនដើម្បីទប់ស្កាត់ដូចជា៖
-ពិចារណានិងធ្វើការផ្ទៀងផ្ទាត់មុននឹងធ្វើការផ្ទេរប្រាក់ឱ្យជនណាម្នាក់។
-សូមប្រើប្រាស់លេខសម្ងាត់ការពារកម្មវិធី ឬប្រព័ន្ធបច្ចេកវិទ្យាព័ត៌មានដែលពិបាកទស្សទាយ។
-ត្រួតពិនិត្យតំណភ្ជាប់(គេហទំព័រ)មុននឹងវាយបញ្ចូលឬផ្តល់ព័ត៌មានសម្ងាត់មានដូចជា លេខាគណនីលេខអត្តសញ្ញាប័ណ្ណលិខិតឆ្លងដែន លេខសម្ងាត់ឬលេខ OTP។ល។
-ជៀសវាងការផ្តល់នូវព័ត៌មានស្តីពី លេខសម្ងាត់ លេខកូដផ្ទេរប្រាក់ឬលេខកូដផ្ទៀងផ្ទាត់(OTP) ឱ្យជនណាម្នាក់ទោះបីពួកគេអះអាងថាជាបុគ្គលិកធនាគារក៏ដោយ៕
