រាជធានីភ្នំពេញ៖ គណៈកម្មាធិការជាតិរៀបចំការបោះឆ្នោត (គ.ជ.ប) បានជូនដំណឹងពីការប្រកាសលទ្ធផលផ្លូវការនៃការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៥ ដែលនឹងធ្វើឡើងនៅ រសៀលថ្ងៃទី២៦ មិថុនា ខាងមុខនេះ។ លទ្ធផលផ្លូវការនេះ នឹងមានការផ្សាយតាមកញ្ចក់ទូរទស្សន៍ និងវិទ្យុរបស់រដ្ឋ បណ្ដាញសង្គមនានារបស់ គជប ផងដែរ។
ការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៥ ឆ្នាំ២០២២ មានគណបក្សនយោបាយ ចូលរួមប្រកួតប្រជែងសរុបចំនួន ១៧គណបក្សនយោបាយ និងមានប្រជាពលរដ្ឋចំនួនជាង ៧លាននាក់បានចូលរួមបោះឆ្នោត ក្នុងក្នុងចំណោមប្រជាពលរដ្ឋជាង៩ លាននាក់ ដែលមានឈ្មោះបោះឆ្នោត។
ថ្លែងប្រាប់សារព័ត៌មានក្នុងស្រុក លោក ហង្ស ពុទ្ធា អ្នកនាំពាក្យ (គ.ជ.ប) បានឲ្យដឹងថា ក្រោយពីការពិនិត្យបណ្តឹងចំនួនជាង ២០០បណ្តឹង ជុំវិញការដំណើរការបោះឆ្នោតត្រូវបានបញ្ចប់ និងការប្រកាសលទ្ធផលបឋមរួចរាល់, គ.ជ.ប ឈានដល់ដំណាក់កាលចុងក្រោយ គឺការប្រកាសលទ្ធផលផ្លូវការ នៃការបោះឆ្នោតជ្រើសរើសក្រុមប្រឹក្សាឃុំ-សង្កាត់ ដែលនឹងធ្វើនៅថ្ងៃទី ២៦ មិថុនា ខាងមុខ៕
