ភ្នំពេញ៖ គម្រោងអភិវឌ្ឍន៍ធំៗជាច្រើនរួមមានរោងចក្រ សហគ្រាស និងតំបន់សួនឧស្សាហកម្ម បាននឹងកំពុងបោះទីតាំងនៅតាមបណ្តោយផ្លូវជាតិលេខ ៥១ ដែលធ្វើឱ្យតម្លៃដីនៅជាប់ផ្លូវធំមានការកើនឡើងដល់ ២០០ ដុល្លារអាមេរិកក្នុងមួយម៉ែត្រការ៉េ។

លោក គីម ហេង អ្នកលក់ដីឡូតិ៍នៅតំបន់ផ្លូវជាតិលេខ៥១ នេះ បានមានប្រសាសសន៍ថា តំបន់ផ្លូវជាតិ៥១ នៅតែមានសន្ទុះរីកចំរើនខ្លាំងលើតម្លៃដីធ្លី ខណៈតំបន់នេះបាននឹងកំពុងក្លាយជាតំបន់នេះបណ្តុំទៅដោយផ្សារ រោងចក្រសហគ្រាស និងឃ្លាំងស្តុកទំនិញជាច្រើន ។ 

លោកបន្តថា រដ្ឋបាលរាជធានីភ្នំពេញបានឱ្យរោងចក្រសហគ្រាសផ្សេងៗចេញពីទីក្រុង ដើម្បីកាត់បន្ថយការកកស្ទះចរាចរណ៍ ដែលភាគច្រើន វាមកកាន់នៅតំបន់នេះ ដែលធ្វើឱ្យតម្លៃនៅទីនេះកាន់តែឡើងថ្លៃជាបន្តបន្ទាប់។ 

លោកថ្លែងថា «តម្លៃដីឡូតិ៍ គឺចាប់ពី ២ម៉ឺនទៅ ៣ម៉ឺនដុល្លារអាមេរិកក្នុងមួយឡូតិ៍ ដែលជាដីនៅជាប់ផ្លូវជាតិ ប៉ុន្តែមិនមែន ៥ ម៉ែត្រ X ២០ ម៉ែត្រ ទេ    គឺ ៥ ម៉ែត្រ X ៣០ម៉ែត្រ ឬលើសនេះ និងដីដែលស្ថិតនៅកន្លែងហ្វុងសុយ និងនៅជាប់ផ្លូវជាតិ ៥១»។    

លោក គីម ហេង បញ្ជាក់ថាចំពោះដីដែលមានទំហំធំៗ ហើយនៅជាផ្លូវជាតិលេខ ៥១ នេះមានតម្លៃចាប់ពី ២០០ដុល្លារអាមេរិកឡើងនៅក្នុងមួយម៉ែត្រការ៉េ  និងទៅមុខទៀតអាចកើនដល់ ៣០០-៤០០ ដុល្លារអាមេរិក  ព្រោះមានរោងចក្រធំៗកំពុងដំណើរការសាងសង់ ដូចជាគម្រោងរោងចក្រតម្លើងម៉ូតូហុងដារ និងសួនឧស្សាហកម្មរបស់កាណាឌីយ៉ា។

ប្រធានក្រុមប្រឹក្សាភិបាលសមាគមអ្នកជំនាញអចលនទ្រព្យកម្ពុជា លោក ឃាង ពុទ្ធី បានឱ្យដឹងដែរថា ដីធ្លីនៅតាមបណ្តោយផ្លូវជាតិលេខ៥១ និងតំបន់ជុំវិញកំពុងមានសក្តានុពលកាន់តែខ្លាំងជាមួយនឹងកំណើនតម្លៃហក់ឡើងជាប្រចាំផងដែរ។

លោកថ្លែងថា« នៅតាមបណ្តោយផ្លូវជាតិលេខ៥១នេះ មានសក្តានុពលទៅលើការសងសង់រោងចក្រ និងឧស្សាហកម្មផ្សេងៗ ព្រោះវានៅឆ្ងាយពីក្រុង និងនៅជិតផ្លូវជាតិលេខ៤មានភាពងាយស្រួលក្នុងការដឹកទំនិញទៅកាន់កំពងផែក្រុងព្រះសីហនុ តែនាពេលបច្ចុប្បន្ននេះសន្ទុះនៃការរីកចម្រើននៅមានកម្រិតនៅឡើយ ដោយត្រូវប្រើពេលប្រមាណជា២ទៅ៣ឆ្នាំ ទៅមុខទៀត ទើមមានការរីកចម្រើន»។

ផ្លូវជាតិលេខ៥១ តភ្ជាប់ពីផ្លូវជាតិលេខ៤ ត្រង់ចំណុចថ្នល់ទទឹងទៅផ្លូវជាតិលេខ៥ ត្រង់ចំណុចផ្សារឧដុង្គ ដែលមានប្រវែង៣៧.៩៥គីឡូម៉ែត្រ និងចម្ងាយប្រមាណជាង១៨គីឡូម៉ែត្រពីទីក្រុងភ្នំពេញ (គិតពីចោមចៅ ទៅផ្សារថ្នល់ទទឹង)៕