តើអ្នកធ្លាប់ឬអត់ធ្វើការងារផ្សេងៗពេញមួយថ្ងៃហើយ ប៉ុន្តែនៅមានអារម្មណ៍ថា មិនបានបំពេញការងារអ្វីគាប់ប្រសើរតាមលទ្ធផលរំពឹងទុកសោះ។ តាមការលើកឡើង របស់លោកស្រី Ashley Stahl ជាគ្រូបង្វឹកផ្នែកអាជីពការងារ ជាអ្នកនិពន្ធ ក៏ដូចជាសហគ្រិនមួយរូបនៅសហរដ្ឋអាមេរិក បានលើកឡើងពីចំណុចខ្លះៗតាមពិសោធលោកស្រីដែលជួយដល់ផលិតភាពការងារបានប្រសើរ៖
សូមចុចទីនេះដើម្បីទាញយកកម្មវិធី ក្រមា ប៉ស្ដិ៍ ដាក់ក្នុងទូរស័ព្ទដៃ១.ឈប់ធ្វើការងារច្រើនក្នុងពេលតែមួយ
ផ្តោតលើការងារតែមួយ ក្នុងពេលមួយឲ្យហើយគឺមានល្បឿនលឿនជាង ការធ្វើការងារច្រើនមុខក្នុងពេលតែមួយនេះបើតាមការលើកឡើងរបស់លោកស្រី Ashley។ ជាមួយគ្នានេះ លោកសាស្រ្តាចារ្យផ្នែកប្រសាទវិទ្យាមកពីសហរដ្ឋអាមេរិក លោក Earl K. Miller ក៏បានលើកឡើងដែរថាការធ្វើរឿងច្រើនក្នុងពេលតែមួយ ដើម្បីទទួលបានប្រសិទ្ធិភាពពោលគឺមិនអាចទៅរួចនោះទេ មិនថាអំឡុងពេលនិយាយទូរសព្ទ ធ្វើបទបង្ហាញឬសូម្បីតែការញ៉ាំ ហើយធ្វើរឿងអ្វីផ្សេង ទោះជារឿងតូចតាចក៏ដោយ។ ដូចនេះ ការផ្តោតលើការងារតែមួយ ក្នុងពេលមួយឲ្យហើយអ្នកនឹងឃើញពីប្រសិទ្ធិភាព។
២.សម្រាកខ្លះ
អ្នកអាចគិតថា ធ្វើការងារយូរម៉ោងនឹងទទួលបានលទ្ធផលការងារឆាប់ហើយរួចរាល់ ប៉ុន្តែយ៉ាងណាអ្នកពុំគួរបង្ខំធ្វើទាំងហត់នឿយរហូតហួសកម្លាំងនោះទេ។ លោកស្រី Ashley បានយោងលើការស្រាវជ្រាវមួយចំនួនថា ការមានពេលសម្រាកខ្លះៗក្នុងចន្លោះពេលការងារ នឹងជួយឱ្យអារម្មណ៍ល្អផ្តោតលើការងារបានប្រសើរឡើងវិញ និងប្រកបដោយអារម្មណ៍រីករាយស្រស់ថ្លា។ អាចមានពេល៥នាទី ដើរជុំវិញការិយាល័យ ឬក្បែរកន្លែងការងារ ឬចំណាយពេល១៥នាទីសម្រាប់សម្រាកញ៉ាំកាហ្វេជាដើម។
៣.បែងចែកចំណែកការងារជាចំណុចតូចៗ
ពេលខ្លះគ្រាន់តែមើលការងារគរដូចភ្នំ ក៏នឹងធ្វើឱ្យយើងហត់នឿយមុនដែរ ប៉ុន្តែយើងក៏នៅមានវិធីបំពេញការងារទាំងនោះរួចរាល់បានតាមការចែកវាជាចំណែកតូចៗ។ ដូចនេះ អ្នកនឹងមានអារម្មណ៍ថា អាចគ្រប់គ្រងការងារទាំងនោះបាននិងប្រកបដោយប្រសិទ្ធិភាពទៀតផង ដោយការទម្លាប់ធ្វើវាបន្តិចម្តងៗជាជំហានៗ ក្នុងមួយថ្ងៃៗ។
៤.ចាប់ធ្វើកិច្ចការសំខាន់ នៅពេលអ្នកមានអារម្មណ៍ល្អនឹងការងារ
ពេលខ្លះយើងអាចទុកការងារធំៗចោល ដោយគិតថា ត្រូវការពេលវេលាច្រើនជាប់គ្នាដើម្បីធ្វើវា ប៉ុន្តែអ្នកជំនាញផ្នែកអាជីពខាងលើ បានលើកឡើងថានោះជាកំហុសមួយ។ ចាប់ធ្វើការងារធំៗ ឬសំខាន់ នៅពេលណាមួយដែលអ្នកមានអារម្មណ៍ល្អនឹងធ្វើការងារ ឬពេលដែលអ្នកគិតថា អ្នកស្វាហាប់ក្នុងកិច្ចការងារមិនថាពេលយប់ ពេលព្រឹក ឬរសៀលនោះទេ។ ស្វែងយល់ និងដឹងពីពេលណាដែលអ្នកមានអារម្មណ៍ល្អនឹងការងារ ក៏ជួយបង្កើនផលិតភាពការងារក៏ដូចជាបង្ការការងារមិនឲ្យរាំងស្ទះឬនៅក្បែរថ្ងៃ Deadline (ពេលកំណត់ ត្រូវប្រគល់ការងារ)ផងដែរ។
៥.អនុវត្តវិធី គោលការណ៍២នាទី
គោលការណ៍២នាទី មានន័យថាអំឡុងពេលធ្វើការងារជាធម្មតា ប៉ុន្តែក៏មានការងារបន្ទាន់ខ្លះៗ មកកាត់ផ្តាច់ចង្វាក់ការងារ តែបើការងារនោះត្រូវប្រើពេលតែ២នាទីឬតិចជាងនេះ នឹងអាចបញ្ចប់រួច ដូចនេះយើងអាចធ្វើវាឲ្យហើយដោយចាប់ផ្តើមធ្វើវាឥលូវ។ ប្រើពេលតែ២នាទី រួចហើយ ដូចនេះយើងនឹងចំណេញពេលវេលា ត្រឡប់ទៅផ្តោតលើការងារសំខាន់វិញ៕
