ការធ្វើលំហាត់ប្រាណ គឺជាផ្នែកដ៏សំខាន់មួយដែលរាងកាយរបស់អ្នកត្រូវការជាចាំបាច់។ វាជួយសម្រួលដល់ចរន្តឈាម ​និងធ្វើឱ្យការលូតលាស់នៃសរីរាង្គកាយរបស់អ្នក មានដំណើរការល្អប្រសើរ។ ម៉្យាងវិញទៀតចំពោះលោកអ្នកដែលមានវ័យចំណាស់ គឺពិតជាទាមទារឱ្យមានការហាត់ប្រាណជាញឹកញាប់ ដើម្បីជំនួយដល់សុខភាពឱ្យបានរឹងមាំការពារជម្ងឺឈឺថ្កាត់ផ្សេងៗ​ និងរូបរាងស្រឡូនស្អាត។​ ជាមួយគ្នានេះដែរអត្ថបទនេះនឹងបង្ហាញអ្នកអំពីលំហាត់ប្រាណល្អៗចំនួន៥ប្រភេទ ដែលមនុស្សចាស់គួរតែធ្វើជាប្រចាំថ្ងៃ។​

១) ការដើរល្បឿនលឿន (Brisk Walking)

ការដើរល្បឿនលឿនគឺជាលំហាត់ប្រាណមួយប្រភេទដែលមានអត្ថប្រយោជន៍ជាច្រើន សម្រាប់មនុស្សវ័យចំណាស់។ ជាមួយគ្នានេះដែរការដើរល្បឿនលឿន គឺជាការដើរឱ្យបានលឿន ដែលខុសពីការរត់ត្រង់ថា ​វាមានល្បឿនយឺតជាង។​ ម៉្យាងវិញទៀតអ្នកត្រូវតែរក្សាលំនឹងក្នុងការដើរត្រង់បរិវេណស្មារបស់អ្នក ឲ្យបានត្រង់ល្អដើម្បីទទួលបានសុខភាពកាន់តែប្រសើរថែមទៀត។ ក្នុងនោះផងដែរ​វានឹងជួយឱ្យសុខភាពនិងសរីរាង្គកាយរបស់អ្នកឱ្យកាន់តែរឹងមាំ។​

២) កីឡាធាក់កង់ (Stationary Cycling)

បច្ចុប្បន្ន គឺមានភាពងាយស្រួលមែនទែនក្នុងការស្វែងរកកន្លែងដើម្បីហាត់កីឡាធាក់កង់ ពីព្រោះថា​​មានក្លឹបហាត់ប្រាណជាច្រើនដែលមានឧបករណ៍ប្រភេទនេះ ឬមួយអ្នកអាចទិញដាក់ក្នុងផ្ទះ ដើម្បីធ្វើការហាត់ប្រាណដោយខ្លួនឯងជារៀងរាល់ថ្ងៃក៏បាន។ ទន្ទឹមនឹងនេះដែរការធាក់កង់ជួយសម្រួលដល់ផ្នែកផ្សេងៗនៃសន្លាក់ និងចលនាសាច់ដុំរបស់អ្នកឱ្យដំណើរការបានយ៉ាងល្អ។

៣) ការហាត់យូហ្គា (Yoga)

ការហាត់យូហ្គា​គឺជាការហាត់ប្រាណមួយប្រភេទ ​ដែលតម្រូវឱ្យអ្នកលាតសន្ធឹងដងខ្លួន និងដៃជើងរបស់អ្នកថ្មមៗ។ការហាត់យូហ្គា គឺល្អបំផុតចំពោះមនុស្សដែលមានបញ្ហាឆ្អឹង​ និងឈឺសន្លាក់ដៃជើងនៅក្នុងរាងកាយ។​ម៉្យាងវិញទៀតវាក៏ជួយឱ្យលោកអ្នកមានសុខភាពផ្លូវចិត្តជាមួយការផ្តោតអារម្មណ៍ស្ងប់បាន។​

៤) ការលើដុំដែកដែលមានទម្ងន់ស្រាលៗ (Arm Weights)

មនុស្សវ័យចំណាស់គួរតែធ្វើការហាត់ប្រាណដោយការលើដុំដែក ដែលមានទម្ងន់ស្រាលៗ ឱ្យបានយ៉ាងតិច២ថ្ងៃក្នុងមួយសប្តាហ៍ ដោយមិនចាំបាច់ធ្វើវាជារៀងរាល់ថ្ងៃនោះឡើយ។ ការចំណាយពេលហាត់ឱ្យបាន ៣០នាទីគឺសាកសមបំផុតសម្រាប់មនុស្សចាស់ដែលវានឹងជួយឱ្យសាច់ដុំ និងឆ្អឹងរបស់អ្នកមានដំណើរការបានរលូន។​

៥) ការលាតសន្ធឹងខ្លួនប្រាណ (Regular Stretching)

ការលាតសន្ធឹងខ្លួនប្រាណ គឺជាប្រភេទលំហាត់ប្រាណដែលតម្រូវការឱ្យអ្នក​ធ្វើការបត់បែននិងលាតសន្ធឹងរាងកាយនៅផ្នែកផ្សេងៗ​ដូចជា ក ខ្នង ទ្រូង ពោះ ដៃ ចំហៀងខ្លួននិងភ្លៅរបស់អ្នក។ ដូចគ្នានេះដែរវានឹងជួយសម្រួលដល់សន្លាក់ និងឆ្អឹង​របស់អ្នកឲ្យដំណើរការល្អនិងមិនរឹង ឬមិនងាយទទួលរងនូវការគ្រេចថ្លោះជាដើម។ ចំពោះលំហាត់ប្រាណប្រភេទ​នេះ ប្រសិនបើអ្នកអនុវត្តន៍វាជារៀងរាល់ថ្ងៃ​នឹងកាន់តែផ្តល់ផលល្អចំពោះសុខភាពរបស់អ្នក។

ជារួមមកវិញលំហាត់ប្រាណទាំង ៥ខាងលើនេះគឺសាកសមបំផុតសម្រាប់មនុស្ស ដែលស្ថិតក្នុងវ័យចំណាស់។ ហើយលោកអ្នកគួរតែធ្វើលំហាត់ប្រាណឱ្យបានញឹកញាប់ ​ជាពិសេសចំពោះមនុស្សចាស់​ដើម្បីជំនួយដល់សុខភាព និងការលូតលាស់នៃសរីរាង្គកាយរបស់អ្នកឱ្យកាន់តែល្អ៕