សូមចុចទីនេះដើម្បីទាញយកកម្មវិធី ក្រមា ប៉ុស្ដិ៍ ដាក់ក្នុងទូរស័ព្ទដៃមិនថាអ្នកធ្វើការអ្វីក្នុងតួនាទីអ្វីទេ ការធ្វើការជាក្រុមគឺជារឿងសំខាន់ដើម្បីទទួលបានជោគជ័យនិងរីកចម្រើនទៅមុខ។ ប៉ុន្តែការធ្វើការជាក្រុមមិនមែនជារឿងស្រួលប៉ុន្មានឡើយ ដោយសារតែមនុស្សច្រើននាក់ គំនិតក៏ច្រើន រីឯអត្តចរិតរបស់បុគ្គលក៏ខុសៗគ្នាទៅតាមនោះដែរ។ ការពិបាកចុះសម្រុងគ្នាតែងកើតមាននៅកន្លែងការងារ ហើយមានតែមនុស្សប៉ុន្មានប្រភេទប៉ុណ្ណោះដែលអាចបន្សាំខ្លួនឯងឱ្យសម្របខ្លួនតាមបរិបទការងារ ឬងាយចូលជាមួយមនុស្សគ្រប់ប្រភេទបាន។
១.អ្នកដែលមានចរិតរួសរាយ៖
មនុស្សដែលរួសរាយច្រើនបើកចិត្តទូលាយចំពោះការប្រាស្រ័យទាក់ទងជាមួយអ្នកដទៃ មិនថាក្នុងក្រុមរបស់ខ្លួន ឬក្រុមឯទៀតឡើយ។ ពួកគេមិនសូវចេះប្រកាន់ថាអ្នកណាគួរចាប់ផ្ដើមការសន្ទនាមុននោះទេ ពោលគឺពួកគេតែងចាប់ផ្ដើមពាក្យសន្ទនាមុន ប្រកបដោយទឹកមុខរួសរាយរាក់ទាក់ ដែលជាហេតុធ្វើឱ្យអ្នកនៅជុំវិញខ្លួនមានអារម្មណ៍ល្អ និងចូលចិត្តពួកគេ។
២.មនុស្សដែលចង់រៀនអ្វីថ្មីៗ៖
មនុស្សប្រភេទនេះតែងព្យាយាមសម្របខ្លួនជាមួយមនុស្សជុំវិញខ្លួន ដោយគិតថាអ្នកទាំងនោះអាចផ្ដល់ការរៀនសូត្រថ្មីដល់ពួកគេ។ មនុស្សប្រភេទនេះក៏មិនចេះប្រកាន់ខ្លួនដែរ ពោលគឺពួកគេតែងតែចេះឈឺឆ្អាល និងជួយយកអាសាមនុស្សនៅជុំវិញខ្លួន ហើយមិនចេះក្អេងក្អាងថាខ្លួនពូកែ ហើយអ្នកផ្សេងអន់ជាងខ្លួននោះទេ។
៣.មនុស្សដែលមិនផ្ដោតលើឯកជនភាពរបស់អ្នកដទៃ៖
ធម្មតានៅកន្លែងធ្វើការបុគ្គលម្នាក់ៗតែងមានឯកជនភាពរបស់ខ្លួនរៀងៗខ្លួន គិតទាំងទម្លាប់ និងអត្តចរិតផ្ទាល់ខ្លួន។ ប៉ុន្តែមនុស្សប្រភេទទី៣នេះ គឺមិនបានយកភាពឯកជនរបស់អ្នកដែលនៅជុំវិញខ្លួននោះមកដាក់ក្នុងចិត្តដែលប៉ះពាល់ដល់អារម្មណ៍ធ្វើការជាក្រុមឡើយ។ ពួកគេចេះបត់បែននិងសម្របខ្លួនយ៉ាងណាដើម្បីឱ្យការងារក្រុមបានដល់ចំណុចរួមមួយ ហើយទោះបីគេមិនចូលចិត្តអ្នកណាម្នាក់ព្រោះហេតុផលឯកជនក៏ដោយ តែក្នុងម៉ោងធ្វើការគឺពួកគេចេះបែងចែកអារម្មណ៍បានល្អ៕
