នៅលើលោកយើងនេះ មនុស្សណាក៏ចង់ទទួលបានជោគជ័យមានភាពរីកចម្រើន មានការទទួលស្គាល់ និងមានភាពស្ងប់សុខក្នុងជីវិតដែរ។ ហេតុនេះហើយទើបមនុស្សម្នាក់ៗខិតខំប្រឹងប្រែងគ្រប់លទ្ធភាព ដើម្បីអភិវឌ្ឍសមត្ថភាពខ្លួនឯងដើម្បីផ្លាស់ប្តូរជាវិជ្ជមានម្តងមួយដំណាក់កាលៗឥតឈប់ឈរ។
ទោះជាយ៉ាងនេះក្តី ក្នុងចំណោមអ្នកដែលខិតខំប្រឹងប្រែងទាំងអស់មិនមែនសុទ្ធតែអាចទទួលបានភាពរីកចម្រើនទាំងអស់នោះទេ តែក៏មានអ្នកខ្លះជួបបញ្ហាជាច្រើនផងដែរលើវិថីជីវិត។ បញ្ហាត្រង់ថាពួកគេមិនដឹងចំណុចដែលត្រូវខំ ឬខំប្រឹងប្រែងមិនចំគោលដៅ។
លោកបណ្ឌិត សួន រ៉ានី អនុរដ្ឋលេខាធិការក្រសួងមុខងារសាធារណៈបានលើកឡើងថា មនុស្សម្នាក់ៗសុទ្ធតែចង់ទទួលបានជោគជ័យ មានកិត្តិយសល្អនិងមានការទទួលស្គាល់ជាដើម។ ទោះជាយ៉ាងនេះក្តីដើម្បីឈានទៅដល់គោលដៅវិជ្ជមានទាំងអស់នោះមិនមែនជារឿងងាយស្រួលពេកនោះទេ វាទាមទារឱ្យមានការខិតខំប្រឹងប្រែងឱ្យបានត្រឹមត្រូវ ដើម្បីឈានដល់គោលដៅដែលខ្លួនចង់ទៅឱ្យដល់។
លោកបណ្ឌិតបញ្ជាក់ថា មនុស្សម្នាក់ៗមានថាមពលសំខាន់ៗចំនួនន៤ គឺថាមពលសុខភាព ថាមពលចិត្ត ថាមពលគំនិតនិងថាមពលឆន្ទៈ។ ហេតុនេះប្រសិនបើយើងពង្រឹងថាមពលទាំង៤នេះបានល្អ នោះយើងនឹងអាចឈានជើងឆ្ពោះទៅរកការអភិវឌ្ឍឥតឈប់ឈរ និងទទួលបានជោគជ័យជាបន្តបន្ទាប់។
បើតាមលោកបណ្ឌិតមនុស្សត្រូវការសុខភាពល្អ ព្រោះបើទោះបីជាមានទ្រព្យសម្បត្តិច្រើនប៉ុណ្ណាក៏ដោយ បើសុខភាពមិនល្អហើយរបស់ទាំងអស់នោះ ច្បាស់ជាមិនមានន័យនោះទេ។ ហេតុនេះដើម្បីធ្វើឱ្យជីវិតប្រសើរឡើងគឺចាំបាច់ត្រូវមានសុខភាពល្អជាមុនសិន។ បន្ទាប់មកទៀត យើងត្រូវចេះប្រើប្រាស់ថាមពលផ្លូវចិត្តឱ្យបានល្អដើម្បីធ្វើយ៉ាងណាឱ្យយើងមានភាពនឹងនរគ្រប់កាលៈទេសៈឬអាចនិយាយបានថា យើងអាចគ្រប់គ្រងខ្លួនឯងបានល្អនៅពេលជួបបញ្ហា។ បន្ថែមពីលើនេះ មនុស្សក៏ត្រូវការថាមពលគំនិតដើម្បីអភិវឌ្ឍផែនការសកម្មភាពសំខាន់ៗ សម្រាប់គ្រប់កិច្ចការងារទាំងអស់។
កាលណាយើងមានគំនិតត្រូវ ច្បាស់ណាស់ថា យើងនឹងអាចបញ្ចេញសកម្មភាពត្រូវឬអាចនឹងធ្វើឱ្យជីវិតរបស់យើងសកម្មជាមួយនឹងភាពវិជ្ជមាន។ ចំណុចសំខាន់ចុងក្រោយគឺថាមពលឆន្ទៈ ព្រោះវាជាចំណុចសំខាន់បំផុតក្នុងការរក្សាគោលជំហរឱ្យនៅតែរឹងមាំមិនប្រែប្រួល៕
