ដោយសារបញ្ហាជម្ងឺកូវីដ១៩នេះ បានធ្វើឱ្យប្រជាជនកម្ពុជាភាគច្រើនត្រូវសម្រេចចិត្តនៅផ្ទះមិនហ៊ានចេញក្រៅញឹកញាប់ និងដើម្បីរក្សាគម្លាតសង្គម តាមការណែនាំរបស់ក្រសួង។ ច្បាស់ណាស់អ្នកប្រាកដជាមានអារម្មណ៍ធុញថប់ជាក់ជាមិនខានជាមួយនឹងការសំងំក្នុងផ្ទះ ច្រើនម៉ោង ហើយមិនមានអ្វីត្រូវធ្វើដូចនៅខាងក្រៅឡើយ។

ក្នុងនោះផងដែរ ជំនួសឱ្យការធុញថប់នេះក៏មានរឿងដែលសប្បាយៗ និងមានប្រយោជន៍ជាច្រើនដែលអ្នកអាចធ្វើនៅផ្ទះបាន ដោយមិនចាំបាច់អង្គុយកាន់ទូរស័ព្ទតែមួយមុខនោះទេ។

១) រៀនធ្វើម្ហូប ឬនំ

ឆ្លៀតពេលដែលអ្នកទំនេរនៅផ្ទះច្រើនម៉ោងហើយមិនមានអ្វីត្រូវធ្វើការរៀនធ្វើម្ហូបរសជាតិថ្មី គឺជារឿងដែលសាកសមបំផុតសម្រាប់លោកអ្នកដែលនឹងអាចក្លាយជាជំនាញមួយទៀត។ ជាការពិតណាស់ អ្នកគួរតែរៀនធ្វើម្ហូបឱ្យបានច្រើនមុខជាពិសេសសម្រាប់មិត្តនារីៗ ពីព្រោះថាវានឹងជួយឱ្យអ្នកទាំងអស់គ្នាបំបាត់ការអផ្សុក​និងធ្វើឲ្យអ្នកមានអារម្មណ៍ល្អ ប្រសើរឡើងវិញ នៅពេលដែលអ្នកបានចេះពីវិធីធ្វើមុខម្ហូបថ្មីៗនិងរសជាតិឆ្ងាញ់ពិសារ។ ទាំងនេះ បើលោកអ្នកមានសួនបន្លែធម្មជាតតូចមួយនៅផ្ទះ ដែលអាចដាំដុះជាប្រចាំ នោះនឹងកាន់តែពិសេស។

វាមិនពិបាកនោះទេក្នុងការស្វែងរកវិធីដើម្បីរៀនធ្វើម្ហូបថ្មីៗលោកអ្នកអាចមើលតាមរយៈ Youtube, Facebook និងលើទំព័រអនឡាញផ្សេងៗទៀត។អ្នកនឹងធ្វើឲ្យគេឆ្ងល់ថា ស្ងាត់ៗក៏ចេះធ្វើម្ហូបឆ្ងាញ់ៗ និងប្លែក មកពីកន្លែងណា។

២) ការអានសៀវភៅ

នៅផ្ទះក៏ជាឪកាសល្អមួយក្នុងការអានសៀវភៅ ដើម្បីបំបាត់ភាពអផ្សុក ព្រមទាំងទទួលបាននូវចំណេះដឹងថ្មីបន្ថែមទៀត។ ដំបូងអ្នកអាចជ្រើសរើសសៀវភៅ ឬក៏អត្ថបទបែបសប្បាយៗប្លែកៗ ដែលអ្នកគិតថា អានហើយនឹងបំបាត់ភាពអផ្សុកបាន ឬអាចបង្កើននូវចំណេះដឹងបន្ថែម តាមជំនាញដែលអ្នកចូលចិត្ត។ វានឹងជួយកាត់បន្ថយអារម្មណ៍ស្ត្រេស ដោយមិនដឹងថាត្រូវធ្វើអ្វី មកជាការបង្កើតទម្លាប់នៃអានសៀវភៅដល់អ្នកផងដែរ។

៣) សាកល្បងរៀនគូសរូប

ការគូសរូបលេង អាចជាមួយគ្រួសារ ក៏ជាសកម្មភាពមួយបែប ដែលជួយកាត់បន្ថយអ្នកពីភាពស្រ្តេស ហើយកាន់តែស្និទ្ធស្នាលជាមួយអ្នកផ្ទះ។ អ្នកអាចចំណាយពេលនៅផ្ទះរបស់អ្នក មកធ្វើការគូសរូបផ្សេងៗ​ ដូចជារូប រូបផ្ទះឬទេសភាពអ្វីផ្សេងៗដែលអ្នកចូលចិត្ត។​ ប្រសិនបើអ្នកមិនសូវចេះគូ វាមិនជាបញ្ហាអ្វីទេ គឺអ្នកអាចរៀនតាមយូធូបបានហើយសម្រាប់លទ្ធដែលចេញមក ច្បាស់ណាស់ អ្នកប្រាកដជាពេញចិត្តជាក់ជាមិនខាន ពេលខ្លះវាអាចធ្វើឱ្យអ្នកអស់សំណើចនឹងអ្វីដែលអ្នកគូសចេញមកក៏មានដែរ។

៥)​ ការធ្វើលំហាត់ប្រាណ

សភាពរាងកាយអ្នកនឹងអាចទ្រុធទ្រោម ខណៈដែលអ្នកពុំបានបញ្ចេញញើស ឬធ្វើសកម្មភាពឲ្យបានច្រើន។ អ្នកអាចធ្វើការហាត់ប្រាណនៅផ្ទះបាន ដោយមិនចាំបាច់ទៅដល់កន្លែងហាត់ផ្ទាល់នោះទេ។ វាគឺជាសកម្មភាពមួយដែលជួយបំបាត់ភាពតានតឹង​​ និងស្ត្រេសបាន ជាពិសេសគឺជំនួយដល់សុខភាព និងជួយថែរក្សារូបរាងរបស់អ្នកឱ្យស្អាតថែមទៀតផង។

មានឧបករណ៍ហាត់ប្រាណទំនើបៗជាច្រើន ដែលលោកអ្នកអាចទិញយកមកដាក់ក្នុងផ្ទះ ឬបើអ្នកមិនមានថវិការគ្រប់គ្រាន់ក្នុងការទិញទេអាចហាត់តាមធម្មតាដោយមិនមានឧបករណ៍ក៏បានដែរ។ វាជាវិធីដ៏ល្អក្នុងការធ្វើក្នុងអំឡុងពេលនៅផ្ទះ។

៥) ជួបជុំមិត្តភក្តិតាមប្រព័ន្ធ Digital 

ការជួបជុំគ្នាសឹងតែរៀងរាល់ថ្ងៃ ហើយបែរ ជាមកសំងំក្នុងផ្ទះបែបនេះប្រាកដជានៅមិនសុខជាក់ជាមិនខាន តែបច្ចុប្បន្ន វាមិនជាបញ្ហាអ្វីធំដុំនោះទេ បើទោះបីជាអ្នកនៅផ្ទះផ្សេងគ្នាក៏ដោយក៏លោកអ្នកអាចជួបជុំគ្នាតាមប្រព័ន្ធ Digital បានដែរ។លោកអ្នកអាចប្រើប្រាស់កម្មវិធីដូចជា Zoom និងកម្មវិធីជាច្រើនទៀតដែលអាចទាញយកពី Store ដោយមិនចាំបាច់បង់ប្រាក់។ការជួបជុំតាមវិធីនេះគឺមានភាពងាយស្រួលខ្លាំងមែនទែន ក្នុងស្ថានភាពនៃជម្ងឺកូវីតកំពុងរាត្បាតនេះ។

អនុវត្តន៍ វិធីទាំង៥ខាងលើនេះនៅផ្ទះនឹងជួយឱ្យអ្នកកាត់បន្ថយការអប្សុកបានច្រើនក្នុងស្ថានភាពដែលជម្ងឺកូវីត១៩កំពុងរាតត្បាតនេះជាពិសេសគឺទទួលបានអត្ថប្រយោជន៍ជាច្រើនដល់អ្នកផ្ទាល់ថែមទៀតផង ទាំងសុខភាព ចំណេះដឹងនិងគំនិតច្នៃប្រឌិត៕