ប្រទេសចិន៖ បន្ទាប់ពីសហរដ្ឋអាមេរិក និងរុស្ស៊ី ពេលនេះប្រទេសចិន បាននាំយកគំរូដុំថ្មពីភពព្រះចន្ទមកដល់ផែនដីដោយជោគជ័យ រយៈពេលនេះមានគម្លាតគ្នាជាងបួនទសវត្សរ៍ទើបអាចសម្រេចបាន។
ការនាំយកដីថ្មពីភពព្រះចន្ទចុងក្រោយនៅឆ្នាំ១៩៧៦ គឺបានមកពីបេសកកម្ម យាន Luna 24 របស់សហភាពសូវៀត ដែលនាំយកមកនូវវត្ថុធាតុដើមប្រហែល ១៧០ ក្រាម។ តែនេះ ប្រទេសចិនបាននាំយកវត្ថុធាតុពីភពព្រះចន្ទនេះ ដល់ទៅ ២គីឡូក្រាម។
កិច្ចខិតខំប្រឹងប្រែងនេះ ប្រទេសចិន បានចាប់ផ្តើមបាញ់បង្ហោះយាន្តនៅថ្ងៃទី ២៤ ខែវិច្ឆិកា និងបានទៅដល់តាមគន្លងព្រះចន្ទ នៅថ្ងៃទី១ខែធ្នូ។ ពេលនេះ យាន្តឆាងអ៊ឺ បានចុះចត នៅម៉ោង១ និង៥៩ នាទីព្រឹក (ម៉ោងនៅទីក្រុងប៉េកាំង) ថ្ងៃទី១៦ ធ្នូនេះ នៅភាគខាងជើងប្រទេសចិន ក្នុងតំបន់ស្វ័យយ័ត្ន ម៉ុងហ្គោលី នេះបើយោងតាមរដ្ឋបាលអវកាសជាតិចិន (CNSA) ។
ប្រធានាធិបតីចិន លោកស៊ី ជីនភីង មានប្រសាសន៍ថា វាគឺជាការបោះជំហានទៅមុខដ៏អស្ចារ្យមួយនៅក្នុងឧស្សាហកម្មអវកាសរបស់ប្រទេសចិន ហើយនឹងរួមចំណែកដល់ការយល់ដឹងកាន់តែស៊ីជម្រៅ អំពីប្រភពដើមនៃព្រះចន្ទនិងប្រវត្តិនៃការវិវត្តន៍នៃប្រព័ន្ធព្រះអាទិត្យ។
វាជាការសន្និដ្ឋានជោគជ័យនៃកម្មវិធីរុករកនៅភពព្រះចន្ទ ទាំង៣ជំហាន គឺ ដំណើរនៃការបើក និងចុះចត និងការនាំយកមកវិញនូវគំរូមកវិញ ដែលបានចាប់ផ្តើមនៅឆ្នាំ ២០០៤៕
