ភ្នំពេញ៖ ជារឿយៗគេតែងឃើញមានបណ្តាអ្នកជំនាញក្នុងវិស័យឯកជន ក៏ដូចជាមន្ត្រីជំនាញវិស័យរដ្ឋ បានធ្វើការណែនាំទៅដល់បណ្តាប្រជាពលរដ្ឋទូទៅដែលមានបំណងចង់ទិញគម្រោងដីឡូតិ៍សម្រាប់ធ្វើជាកម្មសិទ្ធិនិងសាងសង់លំនៅដ្ឋាននោះ ត្រូវមានការប្រុងប្រយ័ត្នឲ្យបានខ្ពស់ជៀសវាងចាញ់បោកជនខិលខូចជាពិសេសគម្រោងអភិវឌ្ឍន៍ដីឡូតិ៍ដែលស្ថិតនៅតាមបណ្តាខេត្តគោលដៅទេសចរណ៍។
ប្រធានក្រុមប្រឹក្សាភិបាលសមាគម អ្នកជំនាញអចលនទ្រព្យកម្ពុជា លោកឧកញ៉ា ឃាង ពុទ្ធី បានមានប្រសាសន៍ប្រាប់គេហទំព័រ KramaPost ថា រហូតមកដល់ពេលនេះ សកម្មភាពឆបោក ការលក់អចលនទ្រព្យមិនមានភាពស្មោះត្រង់និងការរង់គ្រោះរបស់អតិថិជនដែលជាអ្នកទិញគម្រោង នៅតែបន្តកើតមាន ដូច្នេះសម្រាប់អ្នកដែលមានបំណង់ទិញគម្រោងដីឡូតិ៍ ក៏ដូចជាគម្រោងអភិវឌ្ឍន៍អចលនទ្រព្យដទៃទៀតត្រូវបង្កើនការយកចិត្តទុកដាក់ឲ្យបានខ្ពស់បំផុត ជៀសវាងជួបការខាតបង់ទាំងពេលវេលាទាំងថវិកាដែលប្រឹងរកបានទាំងលំបាក។
លោកឧកញ៉ា ឃាង ពុទ្ធី បានមានប្រសាសន៍ថា ៖ «បច្ចុប្បន្នដោយសារតែការព្យាយាមរបស់រាជរដ្ឋាភិបាលដែលមានសម្ដេចតេជោ ហ៊ុន សែន ជាប្រមុខដឹកនាំក្នុងការស្វះស្វែងរកនូវវ៉ាក់សាំង ប្រឆាំងការឆ្លងរាលដាលនៃជំងឺកូវីដដើម្បីចាក់ជូនប្រជាពលរដ្ឋនៅទូទាំងប្រទេសរហូតដល់ជិត៩០ភាគរយទៅហើយ នោះសកម្មភាពអាជីវកម្មនានាស្ទើរគ្រប់វិស័យ បានចាប់មានដំណើរការឡើងវិញ ហើយក្នុងនោះវិស័យអចលនទ្រព្យក៏ចាប់មានសកម្មភាពឡើងវិញ ទាំងការសាងសង់ទាំងការទិញលក់»។
លោកឧកញ៉ាបានបន្តថា៖«ឥលូវដូចជាមិនសូវមានគម្រោងអភិវឌ្ឍន៍ដីឡូតិ៍នៅតាមតំបន់ជាយក្រុងភ្នំពេញដូចកាលពីប៉ុន្មានឆ្នាំមុននោះទេ ប៉ុន្តែវាបានបង្វែរគោលដៅទៅតាមបណ្តាខេត្តមួយចំនួន ជាពិសេសខេត្តដែលមានសក្ដានុពលដែលជាគោលដៅសេដ្ឋកិច្ច និងទេសចរណ៍ ដោយភាគច្រើនអ្នកអភិវឌ្ឍន៍ពុះដីក្នុងទំហំធំសម្រាប់សាងសងលំនៅដ្ឋានបែបលំហែរ។ ប៉ុន្តែ ខ្ញុំសូមក្រើនរំលឹកថាមុនពេលសម្រេចចិត្តទិញ ចាំបាច់ត្រូវតែ សិក្សាឲ្យបានច្បាស់លាស់ ពីទីតាំងគម្រោងសិក្សាពីក្រុមហ៊ុនអភិវឌ្ឍន៍ និងលក់ឲ្យបានស៊ីជម្រៅ ដើម្បីអាចប្រាកដថាជាក្រុមហ៊ុនស្របច្បាប់ ជាដីកម្មសិទ្ធិរបស់ក្រុមហ៊ុន និងមានប្លង់ដែលចេញដោយក្រសួងឬមន្ទីរត្រឹមត្រូវ ដើម្បីធ្វើយ៉ាងណាជួបការចាញ់បោកគេ ទិញអស់លុយហើយមិនទទួលបានដីសូម្បីមួយម៉ែត្រ» ៕
