១.តែឱសថបុរាណ
ដើម្បីទទួលបានការថែរក្សាសុខភាពបានកាន់តែប្រសើរក្នុងរដូវរងានេះអ្នកគួរប្ដូរពីការផឹកតែធម្មតាមកជាតែដែលផ្សំឡើងពីរុក្ខជាតិផ្កា ឬបន្លែជាដើមវិញ។ អ្នកអាចរកតែទាំងនេះបាននៅតាមផ្សារទំនើបឬរៀនធ្វើដោយខ្លួនឯងភ្លាមៗតែម្ដង។ វាអាចប្រើជំនួសភេសជ្ជៈដែលមានជាតិកាហ្វេអ៊ីនដូចជាកាហ្វេ និងតែកញ្ចប់ ហើយតែឱសថបុរាណដែលអ្នកអាចជ្រើសរើសមកផឹកក្នុងអំឡុងពេលនេះមានដូចជាតែខ្ញី តែស្លឹកគ្រៃ តែបៃតង តែផ្កាអមតៈ ឬផ្កាមេអំបៅជាដើម។
២.ទឹកដោះគោរមៀត(ទឹកដោះគោមាស)
ភេសជ្ជៈមួយមុខនេះត្រូវបានគេដាក់ឈ្មោះក្រៅថាជាទឹកដោះគោមាស ដោយការផ្សំឡើងពីម្សៅរមៀតជាមួយនឹងទឹកដោះគោ ហើយផ្ដល់គុណប្រយោជន៍ច្រើនសម្រាប់សុខភាព។ រមៀតមានផ្ទុកជាតិប្រឆាំងអុកស៊ីតកម្មការពារការរលាកនិងប្រឆាំងពពួកវីរុស។ ការផឹកទឹកដោះគោមាសនេះជាប្រចាំគឺល្អសម្រាប់អ្នកកើតជំងឺទឹកនោមផ្អែម ជំនួយសុខភាពបេះដូង ឆ្អឹង ស្បែក និងគុណប្រយោជន៍ជាច្រើនទៀត។
៣.ទឹកក្រូចឆ្មារក្ដៅឧណ្ហៗ
ក្រូចឆ្មារសម្បូរទៅដោយវីតាមីនCដែលជួយពង្រឹងប្រព័ន្ធភាពស៊ាំនិងសុខភាពស្បែក។ បន្ថែមពីនេះវាជួយកាត់បន្ថយហានិភ័យនៃជំងឺបេះដូងផងដែរ។ ការផឹកទឹកក្ដៅឧណ្ហៗដោយច្របាច់ក្រូចឆ្មារមួយចំណិតក្នុងរដូវរងានេះ ជាពិសេសនៅពេលព្រឹកគឺល្អសម្រាប់សុខភាពដោយវាជួយកម្ចាត់ជាតិពុលពីក្នុងរាងកាយ ជួយបង្កើនអារម្មណ៍ស្រស់ស្រាយ និងការពារជំងឺនានាបាន។
៤.ទឹកដោះអាល់ម៉ុន
គ្រាប់ផ្លែអាល់ម៉ុនមានផ្ទុកវីតាមីនE ប៉ូតាស្យូម ម៉ង់ហ្កាណែស និងប្រូតេអ៊ីនសំខាន់ៗជាច្រើនទៀត។ ទឹកដោះគោលាយជាមួយគ្រាប់ផ្លែអាល់ម៉ុនដែលក្រឡុកឱ្យម៉ត់ ហើយផឹកជាប្រចាំរៀងរាល់ព្រឹកសម្បូរទៅដោយជាតិកាល់ស្យូមដែលជាសារធាតុខនិជសំខាន់សម្រាប់ការលូតលាស់ឆ្អឹង ជំនួយសុខភាពបេះដូង សរសៃប្រសាទ និងសាច់ដុំ៕
