ជាធម្មតា ក្នុងការរស់នៅមនុស្សម្នាក់ៗតែងតែជួបរឿងរ៉ាវជាច្រើន​ដែលមិនសមប្រកប បង្កើតឱ្យមានការខឹងក្រោធឬធ្វើឱ្យមិនសប្បាយចិត្តជាដើម។

នៅក្នុងខណៈចិត្តនោះ ជាទូទៅក្រោយពេល​​ទទួលរងនូវសម្ពាធផ្លូវចិត្ត ឬប៉ះជាមួយនឹងព្រឹត្តិការណ៍ភ្លាមមនុស្សតែងតែប្រតិម្មភ្លាមៗឆ្លើយតបនឹងព្រឹត្តិការណ៍នោះ ដោយ​មិនសូវប្រើវិចារណាញាណនោះទេ។ ហេតុនេះហើយ ទើបជារើយៗ​ក្រោយពេលប្រតិកម្មជាមួយនឹងអារម្មណ៍ខឹងក្រោធ ហើយមនុស្សជាច្រើន​តែងតែមានអារម្មណ៍ថាស្តាយក្រោយ ឬមានអារម្មណ៍ថាមានកំហុស។

នៅថ្ងៃនេះ ក្រមា ប៉ុស្តិ៍ សូមលើកយក​ចំណុចសំខាន់ៗចំនួន ២យ៉ាង ដើម្បីជាការពិចារណាមុននឹង​ឆ្លើយតបជាមួយនឹងព្រឹត្តិការណ៍ណាមួយ។

១.កុំបុរេវិនិច្ឆ័យ

បុរេវិនិច្ឆ័យ គឺជាការយល់ឃើញឬស្ថានភាពអារម្មណ៍ដែល​បកស្រាយ​សាច់រឿងណាមួយដែលខ្លួនបានឃើញ​ដោយមិនបានពិចារណាលើភាពពិតជាក់ស្តែងរបស់វាតែមនុស្សបែរជាប្រើប្រាស់ការយល់ឃើញផ្ទាល់ខ្លួន ឬបទពិសោធន៍ជីវិតមកបកស្រាយសាច់រឿងនោះទៅវិញ។

ចំណុចនេះបានធ្វើឱ្យ​អ្នកគិតមិន​អាចទៅឱ្យដល់ភាពស៊ីជម្រៅបំផុតនៃសាច់រឿង ឬយល់ឃើញផ្ទុយពីសាច់រឿងពិតជាក់ស្តែងថែមទៀតផង។ ហេតុនេះប្រសិនបើយើងចាប់ផ្តើមយល់ឃើញខុស ហើយសកម្មភាពដែលបញ្ចេញមក​ក៏នឹងបង្កើតជាកំហុសដូចគ្នាដែរ។​

យកល្អ គួរដកឃ្លាពិចារណា និងយកចិត្ត ស្ថានភាពរួមទាំង​ព័ត៌មានរបស់គេមកដាក់ក្នុងខ្លួនឯងបន្តិច ដើម្បីដឹងឱ្យបានច្រើនជាងមុន​មុននឹងធ្វើការសម្រេចចិត្ត។ បន្ថែមពីលើនេះ បើអាចគួរសួរនាំឱ្យបានច្បាស់លាស់ដើម្បីដឹងឱ្យច្បាស់ពីស្ថានភាពនៃភាគីម្ខាងទៀត ដើម្បីធានាថាយើងមិនសន្និដ្ឋានខុស។​

២.គិតពីលទ្ធផលនៃសកម្មភាពរបស់ខ្លួនឯង (imagination)

ភាគច្រើន នៅពេលមនុស្សម្នាក់ខឹងគាត់មិនសូវ​ខ្វល់ច្រើនពីលទ្ធផលនៃសកម្មភាពរបស់គាត់នោះទេតែគាត់ផ្តោតសំខាន់បំផុតលើការឆ្លើយតបជាមួយនឹងអ្នកដែលធ្វើឱ្យគាត់ខឹង។ ហេតុនេះប្រសិនបើយើងបានដកឃ្លាគិតពីលទ្ធផលចុងក្រោយនៃទង្វើដែលយើងនឹងធ្វើ ឬបង្កើតជាជម្រើសសម្រាប់ខ្លួនឯងនោះអារម្មណ៍ខឹងក្រោធនឹងបាត់បង់អស់មួយចំណែក។

ការធ្វើបែបនេះអាចធ្វើឱ្យយើងបន្ថយសម្ពាធផ្លូវចិត្តហើយថែមទាំង​អាចធ្វើឱ្យយើង​គិតបានវែងឆ្ងាយពីសកម្មភាពរបស់យើង។ ពេលខ្លះបើតាមចិត្តខឹងយើងអាចនឹងបង្កើតកំហុសធំ តែក្រោយពេលគិតពីជម្រើសនៃសកម្មភាពយើងអាចនឹងធ្វើសកម្មភាពណាដែល​ឆ្លើយតបដោយភាពវិជ្ជមាន ហើយមិនបង្កើតកំហុសថែមទៀតផង៕