ឈឺភ្នែកជាបញ្ហាមួយដែលកើតឡើង ប្រហែល៥០ ទៅ៩០% នៃអ្នកដែលចំណាយពេលមុខកុំព្យូទ័រច្រើននេះបើតាមវិបសាយសុខភាពអាមេរិក WebMD។ ដើមហេតុនោះ គឺដោយសារតែសាច់ដុំភ្នែកក៏ត្រូវធ្វើការផងដែរ ពេលត្រូវសម្លឹងមើលអេក្រង់កុំព្យូទ័រយូរតែយ៉ាងណាមិញយើង ក៏អាចមានដំណោះស្រាយវិញផងដែរករណីដែលត្រូវធ្វើការពុំអាចចៀសរួច។ តាមរយៈ អ្នកជំនាញផ្នែកសុខភាពភ្នែកនៅអាមេរិក ក៏បានចែករំលែកគន្លឹះរក្សាភ្នែកចៀសឆ្ងាយពីបញ្ហានោះដូចខាងក្រោម៖
១.សម្រាកខ្លះ
ការសិក្សាបានបង្ហាញថាអ្នកដែលបានមានពេលខ្លះៗ សម្រាកចេញពីអេក្រង់កុំព្យូរទ័រគឺជួយឱ្យពួកគេបានចៀសឆ្ងាយពីបញ្ហាឈឺភ្នែក។ ក្នុងរយៈពេលប្រហែល២ម៉ោង មានពេលសម្រាកខ្លះៗប្រហែល ៥ទៅ១០នាទី គឺជួយឱ្យសេរីរាង្គមានសំណើមវិញបាន សម្រាកភ្នែក មិនឆាប់ស្ងួត និងសម្រាលសាច់ដុំភ្នែកបានច្រើន។
២.ញ៉ាំអាហារជំនួយដល់ភ្នែកខ្លះ
ពពួកវីតាមីនA C និង E គឺ ជួយសុខភាពភ្នែកឱ្យបានប្រសើរ ហើយវាសម្បូរក្នុងបន្លែ និងផ្លែឈើ ហើយពិសេសជាតិ Omega-3 ដែលមាននៅក្នុងសាច់ត្រី ក៏ជាប្រភពល្អជួយដល់ភ្នែកបានច្រើន នេះបើតាមការបញ្ជាក់ជាទូទៅពីគ្រូពេទ្យ។
៣.ផ្តល់ជាតិក្នុងខ្លួនបានច្រើន
ជាតិសំណើមឬជាតិទឹកក្នុងខ្លួន គឺមានឥទ្ធិពលដល់រាងកាយទាំងមូលរបស់យើង ក្នុងនោះមានទាំងសេរីរាង្គភ្នែកផងដែរ។ ញ៉ាំទឹកឱ្យបានគ្រប់គ្រាន់ក្នុងមួយថ្ងៃ (មនុស្សពេញវ័យ គឺជាមធ្យមប្រហែល ២លីត្រ ឬ៨កែវ/១ថ្ងៃ)។ ជាតិទាំងនោះ នឹងជួយឱ្យភ្នែកអ្នកចៀសឆ្ងាយ ពីអាការៈភ្នែកស្ងួត។
៤.អង្គុយឆ្ងាយពីអេក្រង់ប្រហែល១លាតដៃ
តាមការណែនាំរបស់អ្នកជំនាញ យើងអាចអង្គុយធ្វើការដោយដាក់អេក្រង់កុំព្យូទ័រឆ្ងាយពីមុខប្រហែល ៥០ ទៅ៦០ សង់ទីម៉ែត្រ ឬប្រវែងប្រហែល ១លាតដៃទៅមុខ។ បូករួមទាំងការស្វែងរកទីតាំងពន្លឺសមល្មមសម្រាប់ភ្នែកអាចមើលបាន នឹងជួយភ្នែកយើងចៀសពីបញ្ហាដូចខាងលើ។ បន្ថែមពីនោះ នៅពេលយប់អ្នកជំនាញក៏បានណែនាំឱ្យយើងប្រើមុខងារបន្ថយពន្លឺចេញពីអេក្រង់ ដូចជា Light Filter ឬ EyesConform ជាដើមសម្រាប់បំពេញមុខងារមុខអេក្រង់កុំព្យូទ័រ ពេលដែលមិនអាចចៀសបាន។
៥.ប្រើថ្នាំភ្នែកនិងមានពេលទៅពិនិត្យភ្នែក
ចំណុចចុងក្រោយ គឺយើងអាច ប្រើទឹកថ្នាំលាងភ្នែកដើម្បីជួយសម្រួលភ្នែកឱ្យបានប្រសើរ។ ជាមួយគ្នានេះ ការប្រើទឹកថ្នាំបន្តក់សម្រាប់ភ្នែក ក៏គួរគប្បីសុំការណែនាំនិងពិគ្រោះជាមួយគ្រូពេទ្យជំនាញផងដែរ ដើម្បីទទួលបានវេជ្ជបញ្ជា និងការណែនាំសម្រាប់ប្រើប្រាស់ឱ្យបានត្រឹមត្រូវ៕
