មិនថាមនុស្សវ័យចំណាស់ ពេញវ័យឬយុវជន គឺតែងមានបញ្ហាខ្លះដល់សុខភាពផ្លូវចិត្តរបស់ពួកគេ។ បើយោងតាមប្រភពពីអង្គការសហប្រជាជាតិ បានឲ្យដឹងនៅក្នុងឱកាសទិវាសុខភាពផ្លូវចិត្តពិភពលោក កាលពីថ្ងៃទី១០ ខែតុលា ២០២០នេះ បានឱ្យដឹងថា មនុស្សជិត១ពាន់លាននាក់នៅទូទាំងពិភពលោកមានបញ្ហាផ្លូវចិត្ត ហើយមានមនុស្ស១នាក់ស្លាប់រៀងរាល់៤០វិនាទី ពីការធ្វើអត្តឃាត។ យ៉ាងណាមិញការប្រឈមនឹងបញ្ហាទាំងនោះ ដោយការរួមគ្នាដោះស្រាយគឺជាដំណោះស្រាយមួយដែល ស្ថាប័នសកលមួយនេះបានលើកឡើងបង្ហាញជាវិធី៤ចំណុចធំៗដែលមនុស្សភាគច្រើនអាចជួយគ្នាទៅវិញទៅមកបាន៖
១.លើកទឹកចិត្តឱ្យចែករំលែកអារម្មណ៍ចំពោះគ្នា
អ្នកអាចសួរសុខទុក្ខទៅកាន់មិត្តភក្តិថាតើពួកគេមានបញ្ហាអ្វីខ្លះ អាចចែករំលែកឬអ្នកអាចរៀបចំចម្អិនអាហារញ៉ាំរួមគ្នាដើម្បីមានពេលសួរសុខទុក្ខគ្នា។ ហើយជាមួយគ្នានោះយើងអាចពោលពាក្យលើកទឹកចិត្តគ្នាទៅវិញទៅមក ដែលការលើកទឹកចិត្តនោះធ្វើឱ្យមានអារម្មណ៍កក់ក្តៅ ក្នុងការចែករំលែក។អ្នកអាចចំណាយពេលដោយយកចិត្តទុកដាក់ដើម្បីស្តាប់ពីអារម្មណ៍ចំពោះបញ្ហាពួកគេហើយអាចលើកសរសើរនូវអ្វីដែលពួកគេបានប្រឹងប្រែងជម្នះដោះស្រាយ។
២.ចំណាយពេលខ្លះ ជួយគាំទ្រពួកគេ
ចំណាយពេលវេលាសមគួរខ្លះដើម្បីចូលរួមសកម្មភាពជាមួយគ្នា មិនថាសមាជិកគ្រួសារ សាច់ញាតិឬមិត្តភក្តិ។ ហើយអ្នកក៏អាចដឹងដែរថាពេលខ្លះពួកគេក៏ត្រូវការពេលវេលាសម្រាប់ខ្លួនឯងដែរប៉ុន្តែនៅពេលពួកគេត្រូវការជំនួយពីអ្នកអ្នកក៏អាចចូលរួមជួយពិភាក្សា រិះរកដំណោះស្រាយជួយដល់ពួកគេប៉ុន្តែសូមកុំព្យាយាមសម្រេចឱ្យ ឬប្រាប់ពួកគេនូវអ្វីដែលត្រូវធ្វើឬដោះស្រាយ។
៣.ឆ្លងកាត់បញ្ហាតានតឹងខ្លះ
បើមានបញ្ហាខ្វែងគំនិតគ្នាអ្នកក៏អាចមានពេលស្តាប់ពួកគេដើម្បីអាចមានពេលពិចារណាច្រោះយកនូវអ្វីដែលជាទំនាស់ខ្វែងគំនិតគ្នា។អ្នកគួរចាំថា មនុស្សគ្រប់គ្នាសុទ្ធសឹងតែជួបបញ្ហាស្រ្តែស ដូចនេះពុំគួរជជែកវែកញែក នៅពេលអារម្មណ៍ខឹង ឬអារម្មណ៍មិនល្អនោះឡើយ។ អ្នកអាចរកកន្លែងណាសមរម្យសម្រាក ដកដង្ហើម រួចសឹមពិភាក្សានៅពេលអារម្មណ៍បានស្រស់ថ្លា។ គួរចាំថានៅពេលវេលាសមគួរ អ្នកអាចមានពេលពិចារណានូវរបៀបដែលអ្នកដោះស្រាយនិងរបៀបដែលមិត្តភក្តិដែលខ្វែងគំនិតគ្នាដោះស្រាយ ដូចនេះនឹងអាចរកឃើញពីដោះស្រាយរួមដោយមិនឱ្យប៉ះពាល់ដល់ផ្លូវចិត្តទាំងសងខាងទៀតផង។
៤.មើលថែសុខភាពអ្នក
នៅពេលយើងជាអ្នកជួយចែករំលែកនិងលើកទឹកចិត្តដល់មនុស្សគ្រប់គ្នា យ៉ាងណាក៏ខ្លួនឯងត្រូវការការមើលថែ និងលើកទឹកចិត្តសម្រាប់ខ្លួនឯងផងដែរ។ការជួយគាំទ្រ និងរក្សាសុខភាពខ្លួនឯង គឺជាគំរូល្អមួយដែលមានឥទ្ធិពលវិជ្ជមានទៅដល់អ្នកដទៃ ដែលគំរូល្អនោះមានដូចជា៖
· សុំជំនួយនៅពេលមានបញ្ហាដែលនេះជារឿងធម្មតា និងជារឿងល្អហើយអ្នកអាចរកនិយាយចែករំលែកបញ្ហាក្នុងចិត្តជាមួយគ្រួសារឬមនុស្សដែលអ្នកទុកចិត្ត។
· មានពេលវេលាខ្លះដើម្បីអ្នកអាចសម្រួល និងបំបាត់ស្រ្តេសដើម្បីសុខភាពរបស់អ្នកដូចជាការសម្រាក ការធ្វើលំហាត់ប្រាណការរីករាយនឹងសកម្មភាពដែលជាចំណូលចិត្តរបស់អ្នកឬសកម្មភាពថ្មីៗជាដើម៕
