ម៉ាស់ដែលយើងប្រើប្រាស់ប្រចាំថ្ងៃដើម្បីបិទបាំងមុខ ច្រមុះ និងមាត់ ជាផ្នែកមួយនៃវិធានការដើម្បីការពារខ្លួនយើងពីកូវីដ-១៩។ បន្ថែមពីនោះការស្វែងយល់ពីប្រភេទម៉ាស់ដែលមាននៅលើទីផ្សារក៏ជាចំណែកមួយឱ្យយើងយល់ដឹងបន្ថែមពីមុខងាររបស់វាបានច្បាស់លាស់សម្រាប់ប្រសិទ្ធិភាពការពារខ្លួនយើងពីវីរុសផ្លូវដង្ហើមកូវីដ-១៩ផងដែរ។ តាមយៈវីដេអូផ្សព្វផ្សាយរបស់អង្គការសហប្រជាជាតិ បានបង្ហាញចំណុចគួរយល់ដឹងពីប្រភេទម៉ាស់ដូចខាងក្រោមនេះ៖
***ម៉ាស់វេជ្ជសាស្រ្តឬម៉ាស់ពេទ្យ៖
ម៉ាស់វេជ្ជសាស្រ្ត (អាចហៅបានថាជាម៉ាស់សម្រាប់វះកាត់ សម្រាប់បុគ្គលិកពេទ្យ)៖ គួរតែប្រើប្រាស់ដោយបុគ្គលិកសុខាភិបាល បុគ្គលដែលមានរោគសញ្ញាជំងឺកូវីដ-១៩ និងបុគ្គលដែលកំពុងថែទាំអ្នកដែលមានការសង្ស័យ ឬបញ្ជាក់ថាមានជំងឺកូវីដ-១៩។
សម្រាប់ម៉ាស់វេជ្ជសាស្រ្តនេះ គឺគួរប្រើនៅទីតាំងដែលមានការរីករាលដាល នៃជំងឺកូវីដ-១៩ ព្រមទាំងទីតាំងដែលមិនអាចអនុវត្តគម្លាតសុវត្ថិភាពមួយម៉ែត្រកន្លះបាន ហើយម៉ាស់ប្រភេទនេះ គួរដែលប្រើសម្រាប់មនុស្សដែលមានវ័យ៦០ឆ្នាំឡើងទៅ និងអ្នកដែលមានបញ្ហាសុខភាពស្រាប់។
***ម៉ាស់ក្រណាត់ ឬម៉ាស់ធម្មតា៖
ដោយឡែកសម្រាប់ម៉ាស់មួយប្រភេទទៀតហៅថាម៉ាស់ក្រណាត់
ម៉ាស់ក្រណាត់ (ត្រូវបានគេស្គាល់ផងដែរថា ជាម៉ាស់ទូទៅមិនមែនម៉ាស់វេជ្ជសាស្រ្ត)៖ គួរតែប្រើប្រាស់ដោយបុគ្គលដែលមិនមានរោគសញ្ញាជំងឺកូវីដ-១៩ (មនុស្សទូទៅធម្មតា) ប្រើនៅទីតាំងដែលមានការរីករាលដាល នៃជំងឺកូវីដ-១៩ និងទីតាំងដែលមិនអាចអនុវត្តគម្លាតសុវត្ថិភាពមួយម៉ែត្រកន្លះបាន។
ម៉ាសក្រណាត់ គួរប្រើដោយបុគ្គលដែលមានទំនាក់ទំនងជិតស្និទ្ធជាមួយអ្នកដទៃ ដូចជាបុគ្គលិកសង្គមកិច្ច អ្នកគិតលុយ និងអ្នកបម្រើសេវាកម្មនានាជាដើម។ ម៉ាស់ប្រភេទនេះ ក៏គួរប្រើប្រាស់នៅក្នុងទីកន្លែងសាធារណៈដែលមមាញឹក ដូចជាមធ្យោបាយធ្វើដំណើរផ្សេងៗ ឧទាហរណ៍ ឡានក្រុង រថយន្តតាក់ស៊ីរួមគ្នា និងរថភ្លើង កន្លែងធ្វើការ ហាងលក់គ្រឿងទេស និងទីតាំងដែលមានមនុស្សម្នាច្រើន៕
